Ani Oyeɔ Obuaa Koni Nine Ashɛ Akɔntaabuu ni Ja Jogbaŋŋ Nɔ?

¹ Nɔ ni fata Biblia mli saji babaoo ahe ji yibɔ pɔtɛɛ, nɔ ni kɛ saji ni tee nɔ lɛ mlitsɔɔmɔ ni yɔɔ faŋŋ haa. Ákɛ nɔkwɛmɔnɔ lɛ, Gideon kɛ hii 300 pɛ ye Midianbii ata lɛ nɔ kunim. (Koj. 7:7) Yehowa bɔfo gbe Ashur asraafoi 185,000. (2 Maŋ. 19:35) Abaptisi mɛi aaafee 3,000 yɛ Pentekoste afi 33 Ŋ.B., ni yɛ no sɛɛ etsɛɛɛ lɛ, heyelilɔi lɛ ayifalɛ tee hiɛ kɛyashɛ aaafee mɛi 5,000. (Bɔf. 2:41; 4:4) Saji nɛɛ feɔ lɛ faŋŋ akɛ, Nyɔŋmɔ tsuji ni hi shi yɛ blema lɛ bɔ mɔdɛŋ waa koni amɛbua saji ni ja jogbaŋŋ kɛmɔ shi lɛ anaa.

² Yehowa gbɛjianɔtoo ni yɔɔ ŋmɛnɛ lɛ fãa wɔ koni wɔbu wɔshiɛmɔ nitsumɔ lɛ he akɔntaa yɛ daa nyɔɔŋ nɔ. Anɔkwayeli ni wɔkɛfiɔ gbɛjianɔtoo nɛɛ sɛɛ lɛ haa anyɛɔ akwɛɔ shiɛmɔ nitsumɔ lɛ nɔ yɛ gbɛ ni mɔɔ shi jogbaŋŋ nɔ. Akɔntaabui baanyɛ ajie lɛ kpo akɛ, ehe miihia ni agbala jwɛŋmɔ kɛya sɔɔmɔ nitsumɔ lɛ fã ko nɔ, loo ákɛ nitsulɔi babaoo ahe miihia yɛ shikpɔŋkuku ko nɔ. Shiɛmɔ nitsumɔ lɛ he akɔntaabuu yɛ asafo lɛ mli yeɔ ebuaa onukpai lɛ ni amɛyɔseɔ mɛi ni yɔɔ nyɛmɔ ni amɛkɛaalɛɛ amɛsɔɔmɔ nitsumɔ lɛ mli, kɛ mɛi hu ni ekolɛ yelikɛbuamɔ he baahia amɛ lɛ. Ni akɔntaabui ni kɔɔ bɔ ni Maŋtsɛyeli shiɛmɔ nitsumɔ lɛ yaa nɔ ehaa lɛ he lɛ ji nɔ ni woɔ Kristofoi anyɛmifeemɔ muu lɛ fɛɛ hewalɛ. Ani ootsu ogbɛfaŋnɔ koni nine ashɛ akɔntaabuu ni ja jogbaŋŋ nɔ?

³ Gbɛnaa Nii ni Kã Onɔ: Ani ewaa kɛhaa bo akɛ oookai nɔ ni onyɛ otsu yɛ shiɛmɔ nitsumɔ lɛ mli yɛ nyɔɔŋ lɛ naagbee? Kɛ nakai ni lɛ, mɛni hewɔ oŋmalaaa onitsumɔ lɛ he saji oshwieee shi be fɛɛ be ni okɛ ohe baawo shiɛmɔ nitsumɔ lɛ mli? Mɛi komɛi kɛ kalenda loo wolo ni aŋmalaa saji awoɔ mli tsuɔ nii. Mɛi krokomɛi hiɛɔ shiɛmɔ he akɔntaabuu woji ní aŋmalako nɔ nii lɛ eko yɛ amɛhe. Okɛ oshiɛmɔ yaa he akɔntaabuu lɛ aha osafo woloŋ nikasemɔ nɔkwɛlɔ lɛ mra yɛ nyɔɔŋ lɛ naagbee. Aloo kɛji oosumɔ lɛ, obaanyɛ ni okɛ oshiɛmɔ yaa he akɔntaabuu lɛ awo adeka ni akɛ shiɛmɔ yaa he akɔntaabuu woɔ mli ni yɔɔ Maŋtsɛyeli Asa lɛ nɔ lɛ mli. Kɛji ohiɛ kpa nɔ akɛ okɛ oshiɛmɔ yaa he akɔntaabuu aaahã lɛ, yaa ni oyana osafo woloŋ nikasemɔ nɔkwɛlɔ lɛ amrɔ nɔŋŋ, kaamɛ ni lɛ ebabi bo. Shiɛmɔ yaa he akɔntaa ní obu lɛ jogbaŋŋ ní okɛaaha lɛ tsɔɔ bulɛ ni oyɔɔ kɛha Yehowa kɛ suɔmɔ mli ni ojɛɔ osusuɔ nyɛmimɛi hii ni atuu awo amɛdɛŋ akɛ amɛhe akɔntaabui lɛ ni amɛbua naa lɛ.—Luka 16:10.

⁴ Gbɛfaŋnɔ ni Asafo Woloŋ Nikasemɔ Nɔkwɛlɔ lɛ Tsuɔ: Akɛni asafo woloŋ nikasemɔ nɔkwɛlɔ lɛ ji tookwɛlɔ ni hiɛ yɔɔ ehe nɔ ni yɔɔ suɔmɔ hewɔ lɛ, egbalaa ejwɛŋmɔ kɛyaa nitsumɔ ni ekuu lɛ tsuɔ yɛ nyɔɔŋ muu lɛ fɛɛ mli lɛ nɔ. (Abɛi 27:23) Ele kɛji ákɛ shiɛlɔ fɛɛ shiɛlɔ kɛ miishɛɛ náa gbɛfaŋnɔ daa yɛ shiɛmɔ nitsumɔ lɛ mli yɛ gbɛ ni mɔɔ shi nɔ, ni efee klalo akɛ ekɛ yelikɛbuamɔ baaha kɛji mɔ ko kɛ ehe woko shiɛmɔ nitsumɔ lɛ mli yɛ nyɔɔŋ muu lɛ fɛɛ mli. Bei pii lɛ, nɔ ni he baahia pɛ ji ekãawoo wiemɔ ko ni ekɛbaaha, ŋaawoo ni anyɛɔ akɛtsuɔ nii, loo ni eeefɔ̃ mɔ lɛ nine koni efata ehe yɛ shiɛmɔ nitsumɔ lɛ mli.

⁵ Yɛ nyɔɔŋ lɛ naagbee lɛ, asafo woloŋ nikasemɔ nɔkwɛlɔ lɛ kwɛɔ akɛ mɛi fɛɛ ni yɔɔ ekuu lɛ mli lɛ etsu gbɛnaa nii ni kã amɛnɔ akɛ amɛbu amɛnitsumɔ lɛ he akɔntaa lɛ he nii, bɔni afee ni woloŋmalɔ lɛ anyɛ ekɛ asafo akɔntaabuu ni ja kɛmɔ shi amaje nitsumɔhe nine lɛ yɛ nyɔɔŋ ni baanyiɛ sɛɛ lɛ nɔ gbi ni ji ekpaa lɛ nɔ. Ekolɛ ebaaye ebua lɛ akɛ ebaakai ekuu lɛ beni eshwɛ fioo ni nyɔɔŋ lɛ baagbo lɛ koni ekwɛ ni shiɛmɔ nitsumɔ lɛ he akɔntaabuu woji lɛ eko ahi he ni kuu lɛ kpeɔ yɛ lɛ. Kɛ amɛteŋ mɛi komɛi ahiɛ kpaa amɛhenɔ akɛ amɛbaabu amɛnitsumɔ lɛ he akɔntaa lɛ, ebaanyɛ ni ekɛ kaimɔi kɛ hewalɛwoo ni sa aha.

⁶ Wɔshiɛmɔ nitsumɔ lɛ he akɔntaabuu ni wɔkɛaaha oya lɛ yeɔ ebuaa ni nine shɛɔ akɔntaabuu ni ja jogbaŋŋ ní tsɔɔ nɔ ni anyɛ atsu yɛ shiɛmɔ nitsumɔ lɛ mli lɛ nɔ. Ani obaatsu ogbɛfaŋnɔ he nii kɛtsɔ oshiɛmɔ nitsumɔ lɛ he akɔntaabuu ni okɛbaaha oya yɛ daa nyɔɔŋ nɔ lɛ nɔ?