Ní Wɔɔhi Shi yɛ Wɔ Henɔjɔɔmɔ lɛ Naa
1 Kɛji abaptisi bo etsɛko loo etsɛ jio, eka shi faŋŋ akɛ okaiɔ nakai nifeemɔ ni he hiaa yɛ oshihilɛ mli lɛ. Wɔ baptisimɔ lɛ jeee naagbee nɔ ko, shi moŋ eji wala be mli fɛɛ henɔjɔɔmɔ sɔɔmɔ ko ni baanyɛ ahi shi kɛya naanɔ lɛ shishijee. (1 Yoh. 2:17) Ní wɔɔhi shi yɛ wɔ henɔjɔɔmɔ lɛ naa lɛ kɔɔ mɛni he?
2 Nyiɛmɔ Kristo Nɔkwɛmɔnɔ lɛ Sɛɛ: Beni abaptisi Yesu lɛ, ‘ebɔi enitsumɔ,’ ni ejaje “Nyɔŋmɔ maŋtsɛyeli lɛ he sanekpakpa lɛ.” (Luka 3:23; 4:43) Nakai nɔŋŋ hu beni wɔkɛ baptisimɔ fee wɔ henɔjɔɔmɔ kɛha Yehowa lɛ he okadi lɛ, wɔbatsɔmɔ sanekpakpa lɛ he sɔɔlɔi ni akpɛlɛ amɛnɔ. Yɛ be mli ni ekolɛ be kɛ hewalɛ babaoo he baahia koni akɛná heloonaa nibii ni baaha ahi wala mli lɛ, wɔnitsumɔ titri ji Kristofoi asɔɔmɔ nitsumɔ lɛ. (Mat. 6:33) Yɛ nɔ najiaŋ ni mɛi ni ejɔɔ amɛhe nɔ amɛha Nyɔŋmɔ lɛ aaabɔ mɔdɛŋ koni amɛná nii loo amɛhé gbɛi lɛ, amɛbɔɔ mɔdɛŋ ni ‘amɛwo amɛsɔɔmɔ lɛ hiɛ nyam,’ taakɛ bɔfo Paulo fee lɛ. (Rom. 11:13) Ani ohiɛ sɔɔ hegbɛ ni oná ni okɛsɔmɔɔ Yehowa lɛ, ni otsuɔ he nii jogbaŋŋ?
3 Taakɛ eji yɛ Yesu gbɛfaŋ lɛ, esa akɛ ‘wɔte shi wɔwo Abonsam.’ (Yak. 4:7) Satan ka Yesu yɛ E-baptisimɔ lɛ sɛɛ, ni nakai nɔŋŋ ŋmɛnɛ, ekɛ ehiɛ kaa Yehowa tsuji ni ejɔɔ amɛhe nɔ amɛha lɛ lɛ. (Luka 4:1-13) Akɛni Satan je lɛ ebɔle wɔ hewɔ lɛ, esa akɛ wɔye wɔhe nɔ, ni wɔkwa nɔ fɛɛ nɔ ni baanyɛ awo wɔjwɛŋmɔŋ muji loo efite wɔtsui lɛ. (Abɛi 4:23; Mat. 5:29, 30) Awoɔ Kristofoi ŋaa akɛ ‘amɛnyɛŋ Yehowa okpɔlɔ lɛ nɔ nii kɛ daimonioi anɔ̃ lɛ nɔ nii amɛye shikome.’ (1 Kor. 10:21) Enɛ biɔ ni wɔkwɛ wɔhe nɔ jogbaŋŋ yɛ hiɛtserɛjiemɔ ni esaaa, naanyobɔɔ fɔŋ, kɛ osharai ni yɔɔ Internet lɛ nɔ lɛ he. Ebiɔ ni wɔkpoo hemɔkɛyeli kwamɔ nibii hu. Enɛɛmɛi kɛ wɔhiɛ ni aaahi Satan ŋaatsɔɔi krokomɛi lɛ anɔ lɛ baaye abua wɔ koni wɔhi shi yɛ wɔhenɔjɔɔmɔ lɛ naa.
4 Okɛ Gbɛjianɔ ni Nyɔŋmɔ Eto lɛ Atsu Nii: Bɔni afee ni eye ebua wɔ ni wɔhi shi yɛ wɔ henɔjɔɔmɔ lɛ naa lɛ, Yehowa miiye kɛmiibua wɔ kɛtsɔ e-Wiemɔ kɛ Kristofoi asafo lɛ nɔ. Ha Biblia kanemɔ kɛ sɔlemɔ kɛha Yehowa afee odaa gbi shihilɛ lɛ fã. (Yosh. 1:8; 1 Tes. 5:17) Ná asafoŋ kpeei ahe miishɛɛ. (Lala 122:1) Okɛ mɛi ni sheɔ Yehowa gbeyei ni amɛyeɔ emlai anɔ lɛ abɔ.—Lala 119:63.
5 Yɛ Yehowa yelikɛbuamɔ naa lɛ, obaanyɛ ohi shi yɛ ohenɔjɔɔmɔ kɛha lɛ lɛ naa, koni oná miishɛɛ yɛ esɔɔmɔ lɛ mli kɛya naanɔ.—Lala 22:27, 28; Fil. 4:13.