Nyɛjwɛŋmɔ Mli Atsea yɛ Be Mli ni Naagbee lɛ Bɛŋkɛɔ Lɛ
1 Nyɔŋmɔ Wiemɔ lɛ wieɔ Yehowa gbi lɛ he shii abɔ akɛ eeba “tamɔ julɔ baa”—ni ji akɛ, trukaa, amrɔ nɔŋŋ, dioofeemɔ mli. (1 Tes. 5:2; Mat. 24:43; 2 Pet. 3:10; Kpoj. 3:3; 16:15) Yesu kɛɛ akɛ: “No hewɔ lɛ nyɛ hu nyɛsaa nyɛhe nyɛtoa, ejaakɛ nɔ̃ ŋmɛlɛtswaa ni nyɛsusuuu lɛ nɔ gbɔmɔ bi lɛ baa.” (Mat. 24:44) Te wɔɔfee tɛŋŋ wɔha wɔhiɛ ahi wɔhe nɔ be fɛɛ be yɛ mumɔŋ yɛ be mli ni naagbee lɛ bɛŋkɛɔ lɛ? Wɔnaa bɔ ni wɔɔfee wɔye omanye lɛ yɛ ŋaawoo ni jɛ mumɔŋ nɛɛ mli akɛ: “Nyɛjwɛŋmɔ mli atsea.”—1 Pet. 4:7.
2 Jwɛŋmɔ ni mli tse lɛ kɔɔ nibii ni wɔɔkwɛ yɛ bɔ ni Yehowa kwɛɔ nii ehaa lɛ naa lɛ he. (Efe. 5:17) Eyeɔ ebuaa wɔ ni wɔbuɔ wɔhe akɛ “gbɔi kɛ mɛi kpɔji” yɛ ŋmɛnɛŋmɛnɛ nibii agbɛjianɔtoo nɛɛ mli. (1 Pet. 2:11) Ehaa wɔnyɛɔ wɔyooɔ nibii ni he hiaa diɛŋtsɛ, wɔtoɔ nibii ni he hiaa titri lɛ ahe gbɛjianɔ, ni wɔfeɔ yiŋkpɛi kpakpai.—Fil. 1:10.
3 Okɛ Mumɔŋ Otii Amamɔ Ohiɛ: Kɛ́ wɔkɛ mumɔŋ otii mamɔ wɔhiɛ ni wɔshɛ he lɛ, eyeɔ ebuaa wɔ ni wɔjwɛŋmɔ mli tseɔ. Ani oyɛ mumɔŋ otii komɛi ni ootiu sɛɛ bianɛ? Ani oobɔ mɔdɛŋ koni okane Biblia lɛ gbi fɛɛ gbi, oya Kristofoi akpeei fɛɛ, okane Buu-Mɔɔ kɛ Awake! lɛ eko fɛɛ eko, loo ekolɛ oha bɔ ni okɛ ohe woɔ shiɛmɔ nitsumɔ lɛ mli lɛ aya hiɛ? Kɛ́ okɛ otii ni hi kɛha bo lɛ mamɔ ohiɛ, ni okɛ faishitswaa tiu sɛɛ, ni obi Yehowa koni ejɔɔ omɔdɛŋbɔi anɔ lɛ, onaa baakpɛ ohe yɛ nɔ ni baajɛ mli aba lɛ he.
4 Onukpa ko bi gbalashihilɛ mli hefatalɔi ni darako tsɔ lɛ mumɔŋ otii ni amɛkɛmamɔ amɛhiɛ. Sanebimɔ lɛ ha amɛyoo akɛ kɛji akɛ amɛha amɛshihilɛ fee mlɛo ni amɛjie nibii ni eha amɛye nyɔmɔ ni tsii lɛ kɛjɛ amɛnɔ lɛ, no lɛ amɛbaanyɛ amɛkɛ amɛhe awo gbɛgbamɔ sɔɔmɔ nitsumɔ lɛ mli. Amɛkpɛ amɛyiŋ akɛ amɛkɛ no baafee oti ni ma amɛhiɛ. Amɛbɔ mɔdɛŋ amɛwo nyɔmɔ lɛ, ni amɛna gbɛ̀i ni amɛaatsɔ nɔ amɛba nifeemɔi ni he ehiaaa ni fiteɔ amɛbe kɛ hewalɛ lɛ shi. Afi kome pɛpɛɛpɛ sɛɛ lɛ, amɛshɛ oti ni amɛkɛma amɛhiɛ lɛ he. Mɛni jɛ mli kɛba? Wu lɛ kɛɛ akɛ: “Wɔkɛ otii mamɔɔɔ wɔhiɛ kulɛ, wɔshɛko he ni wɔshɛ amrɔ nɛɛ. Wɔyɛ miishɛɛ waa. Wɔfeee yeyeeye yɛ shihilɛ mli ni wɔshihilɛ hu hi. Shishinumɔ kɛ yiŋtoo diɛŋtsɛ yɛ he.”
5 Yɛ be mli ni wɔmɛɔ Yehowa gbi lɛ, eba akɛ wɔɔha wɔhiɛ ahi wɔhe nɔ be fɛɛ be yɛ mumɔŋ kɛtsɔ wɔjwɛŋmɔ ni wɔɔha emli atse, ni wɔha wɔhiɛ ahi Nyɔŋmɔ suɔmɔnaa nii ni wɔɔfee lɛ nɔ lɛ nɔ.—Tito 2:11-13.