Majimaji Ateŋ Maŋtsɛyeli Asa Tsumaa
yɛ Europa Shikpɔji Komɛi Anɔ
1 Yɛ nyɛsɛɛ afii nyɔŋmai abɔ nɛɛ amli lɛ, atsĩ Yehowa Odasefoi ni yɔɔ Europa shikpɔji babaoo nɔ lɛ anitsumɔi anaa, ni Europa Bokagbɛ fata he. Yɛ shihilɛi babaoo mli lɛ, naatsii lɛ naa wa waa. Ewa waa akɛ aaafee kpeei yɛ faŋŋ mli, ni anyɛɛɛ aya kpee yɛ Maŋtsɛyeli Asa mli. Shi, yɛ nyɛsɛɛ afii nɛɛ amli lɛ, “Yehowa efee nibii wuji eha wɔ; no hewɔ wɔmii eshɛ wɔhe nɛɛ.”—Lala 126:3.
2 Yɛ afi 1983 shishijee mli lɛ, hewalɛ ni naa wa ni ayɔɔ yɛ Yehowa Odasefoi anɔ lɛ bɔi shibaa. Beni shɛɔ afi 1989 lɛ, no mli lɛ Poland kɛ Hungary ekpɛlɛ Yehowa Odasefoi lɛ anɔ yɛ mla naa. Yɛ afi 1991 mli lɛ, akɛ Yehowa Odasefoi agbɛi wo mla shishi yɛ Russia. Kɛjɛ no nɔ kɛbaa nɛɛ, nitsumɔ lɛ eshwere yɛ Russia kɛ tsutsu kwasafo maji ni yɔɔ Soviet Union lɛ mli. Kɛjɛ March 1996 kɛyashi October 1998 lɛ, Nɔyeli Kuu lɛ kpɛlɛ nɔ koni akɛ shika ni abi kɛjɛ nitsumɔhe niji ni kwɛɔ Europa shikpɔji 11 lɛ nɔ lɛ afa kɛha Maŋtsɛyeli Asai 359 he nitsumɔ.
3 Be mli ni okwɛɔ mfonirii ni yɔɔ nɔ ni aŋma ahɔ mli nɛɛ mli lɛ, jwɛŋmɔ nibii wuji ni yɔɔ naakpɛɛ ní Yehowa efee eha ewebii lɛ ahe. (Lala 136:4) Eeefee bo miishɛɛ akɛ ooole akɛ, akɛ onia ni jeŋ muu fɛɛ nyɛmifeemɔ kuu lɛ tsuɔ lɛ miitsu nii jogbaŋŋ diɛŋtsɛ, ni eejie nɔ ni Yesu kɛɛ, taakɛ aŋma afɔ shi yɛ Yohane 13:35 lɛ kpo kɛmiitsɔɔ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”
4 Romania, he ni beni shɛɔ July 2000 lɛ, no mli lɛ amamɔ Maŋtsɛyeli Asai 36 lɛ fata Europa maji ni miiná gbɛjianɔ ni ato koni akɛye abua kɛma Maŋtsɛyeli Asai yɛ shikpɔji ni shika fioo pɛ amɛyɔɔ lɛ nɔ lɛ he sɛɛ lɛ he. Akɛni akɛ tsumaa he gbɛjianɔtoo ko ni akpɛlɛ nɔ lɛ tsu Ukraine Maŋtsɛyeli Asai fɛɛ he nii hewɔ lɛ, Ukraine mamɔ 61 yɛ afi 2001 mli, kɛ 76 amɛfata he yɛ afi 2002 mli. Yɛ shika ni atsu awo Maŋtsɛyeli Asa Tsumaa Fotro lɛ mli hewɔ lɛ, anyɛ amamɔ Maŋtsɛyeli Asai ohai abɔ yɛ Bulgaria, Croatia, Macedonia, Moldova, Russia, kɛ Serbia kɛ Montenegro.
5 Maŋtsɛyeli Asai amaamɔ yɛ shikpɔji komɛi anɔ lɛ bɛ mlɛo, ni esa akɛ abɔ mɔdɛŋ waa koni anyɛ aje tsũ lɛ maa shishi. Bei pii lɛ, nifeemɔ lɛ heɔ bei waa. Agbɛnɛ hu, nyɔmɔ ni abɔɔ yɛ Maŋtsɛyeli Asa kome he yɛ nakai Europa maŋ lɛ mli lɛ fáa waa diɛŋtsɛ fe Afrika loo South America maji babaoo nɔ̃. Shi kɛlɛ, akɛni mɛi ni jáa Yehowa lɛ ayibɔ lɛ miifa hewɔ lɛ, Maŋtsɛyeli Asai ohai abɔ ahe miihia lolo yɛ Europa maji ni shika fioo pɛ amɛyɔɔ lɛ mli!
6 Kwɛ bɔ ni eyɔɔ miishɛɛ akɛ wɔɔna akɛ hiɛyaa babaoo ni tamɔ nɛkɛ eba yɛ Maŋtsɛyeli Asai amaamɔ nɛɛ mli! Aye odase fɛfɛo yɛ hei ni amamɔ tsui lɛ ekomɛi yɛ, taakɛ niiashikpamɔi babaoo tsɔɔ lɛ. Yɛ hei komɛi lɛ, maŋ lɛŋ onukpai lɛ anaa kpɛɔ amɛhe yɛ ekomefeemɔ mumɔ ni ajieɔ lɛ kpo lɛ he yɛ tsumaa he gbɛtsɔɔmɔi asɛɛ ni anyiɛɔ lɛ hewɔ.
7 Yesaia gba anɔkwa jamɔ shweremɔ yɛ nɛkɛ be nɛɛ mli yɛ gbɛ ni ja nɔ. Nyɔŋmɔ tsɔ gbalɔ lɛ nɔ egba akɛ: “Kɛ shɛ ebe lɛ, mi, Yehowa, maha afee oyá!” (Yes. 60:22) Eka shi faŋŋ akɛ, naagbee afii nyɔŋma ni ho nɛɛ lɛ efee be ni Yehowa kɛaaha shweremɔ aba Europa Bokagbɛ. Eba akɛ Yehowa baaya nɔ anɛ ejɔɔmɔi babaoo kɛshwie mɔdɛŋ ni wɔbɔɔ koni wɔha Maŋtsɛyeli Asai amaamɔ lɛ aya hiɛ oyayaayai yɛ shikpɔji babaoo nɔ lɛ nɔ yɛ be mli ni wɔkɛ yelikɛbuamɔ fiɔ Maŋtsɛyeli Asa Tsumaa Fotro lɛ sɛɛ lɛ! Enɛ baaha aná Maŋtsɛyeli Asai babaoo kɛfata he yɛ shikpɔji ni shika fioo pɛ amɛyɔɔ lɛ nɔ. Ebaaha jamɔ krɔŋŋ ashwere yɛ Europa hei babaoo, ni ebaafee odase kpele ni aaaye kɛyashi “shikpɔŋ lɛ naagbeehei lɛ.”—Bɔfoi lɛ Asaji 13:47.
[Caption on page 3]
Maŋtsɛyeli Asa Tsũi Moscow, Russia
[Caption on pages 4-6]
Maŋtsɛyeli Asai Heei yɛ Europa Bokagbɛ
Strumica, Macedonia
Daruvar, Croatia
Sokal yɛ Lviv Kpokpaa, Ukraine
Bitola, Macedonia
Sofia, Bulgaria
Plovdiv, Bulgaria
Krasnooktyabriskiy yɛ Maykop Area, Russia
Bački Petrovac, Serbia kɛ Montenegro
Tlumach yɛ Ivano-Frankivsk Kpokpaa, Ukraine
Rava-Ruska yɛ Lviv Kpokpaa, Ukraine
Stara Pazova, Serbia kɛ Montenegro
Zenica, Bosnia kɛ Herzegovina
Sokal Lviv Kpokpaa, Ukraine
Zhydachivl Lviv Kpokpaa, Ukraine