Kasemɔ Yehowa Ekpakpafeemɔ Lɛ
1 Beni wɔná hulushinyɔɔ ni yɔɔ fɛo loo niyenii ko ni ŋɔɔ ni wɔye lɛ he miishɛɛ sɛɛ lɛ, ani etsirɛɛɛ wɔ koni wɔda Yehowa, ni ji ekpakpafeemɔ fɛɛ Jɛɛhe lɛ shi? Ekpakpa ni efeɔ lɛ tsirɛɔ wɔ koni wɔsumɔ akɛ wɔbaakase lɛ. (Lala 119:66, 68; Efe. 5:1) Te wɔɔfee tɛŋŋ wɔjie su ni ji ekpakpafeemɔ lɛ kpo?
2 Jiemɔ lɛ Kpo Otsɔɔ Mɛi ni Heee Yeee Lɛ: Gbɛ kome ni wɔbaanyɛ wɔtsɔ nɔ wɔkase Yehowa ekpakpafeemɔ lɛ ji kɛtsɔ mɔ hesusumɔ ni wɔɔjie lɛ kpo yɛ anɔkwayeli mli wɔtsɔɔ mɛi ni jeee hemɔkɛyeli lɛ webii lɛ nɔ. (Gal. 6:10) Ekpakpafeemɔ kpo ni wɔɔjie yɛ gbɛ̀i ni anyɛɔ atsuɔ he nii anɔ lɛ baanyɛ aná hewalɛ ni sa yɛ bɔ ni amɛbuɔ Yehowa Odasefoi kɛ shɛɛ sane ni wɔhiɛ lɛ amɛhaa lɛ nɔ.
3 Ákɛ nɔkwɛmɔnɔ lɛ, beni nyɛmi nuu gbɛgbalɔ ni ji oblanyo fioo ko mɛɔ yɛ helatsamɔhe ko lɛ, etá yoo onukpa ko ni etamɔ nɔ ni ehe miiye waa fe mɛi krokomɛi ni yɔɔ jɛmɛ fɛɛ lɛ masɛi. Beni eshɛ enɔ ni ebaana datrɛfonyo lɛ, eŋmɛ gbɛ koni yoo lɛ aya dã. Sɛɛ mli lɛ ekɛ lɛ kpe ekoŋŋ, nɛkɛ be nɛɛ mli lɛ yɛ jara nɔ, ni yoo lɛ ná miishɛɛ waa beni ena lɛ lɛ. Eyɛ mli akɛ tsutsu lɛ ekpɛlɛɛɛ sanekpakpa lɛ nɔ moŋ, shi ekɛɛ akɛ agbɛnɛ ená ele akɛ Yehowa Odasefoi sumɔɔ amɛkutsoŋbii lɛɛlɛŋ. Akɛ lɛ je daa Biblia mli nikasemɔ shishi.
4 Jiemɔ lɛ Kpo Otsɔɔ Wɔnyɛmimɛi Lɛ: Wɔkaseɔ Yehowa ekpakpafeemɔ lɛ hu kɛji wɔkɛ wɔhe ha koni wɔye wɔbua nanemɛi heyelilɔi. Yɛ oshara bei amli lɛ, wɔfataa klɛŋklɛŋbii ni baa koni amɛbaye amɛbua wɔnyɛmimɛi lɛ ahe. Wɔjieɔ mumɔ nɛɛ nɔŋŋ kpo kɛji akɛ wɔye wɔbua mɛi ni tsɔne he hiaa amɛ kɛha kpeeiyaa, wɔsara mɛi ni bɛ gbɔmɔtsoŋ hewalɛ, ni wɔlɛɛ hedɔɔ ni wɔyɔɔ lɛ mli wɔha mɛi ni wɔleee amɛ jogbaŋŋ yɛ asafo lɛ mli lɛ.—2 Kor. 6:11-13; Heb. 13:16.
5 Gbɛ kroko hu ni Yehowa tsɔɔ nɔ ejieɔ ekpakpafeemɔ kpo yɛ ji klalo ni efee akɛ ‘eeeŋɔfa’ lɛ. (Lala 86:5) Yɛ ekasemɔ mli lɛ, wɔbaanyɛ wɔjie suɔmɔ ni wɔyɔɔ kɛha ekpakpafeemɔ lɛ kpo kɛtsɔ eshaifaa ni wɔɔkpã mli wɔha mɛi krokomɛi lɛ nɔ. (Efe. 4:32) Enɛ yeɔ ebuaa koni wɔkɛ nanemɛi heyelilɔi krokomɛi anaanyobɔɔ lɛ afee ‘nɔ ni hi ni yɔɔ fɛo.’—Lala 133:1-3.
6 Eba akɛ Yehowa ekpakpafeemɔ ni fa babaoo lɛ aaaha wɔyimɔ obɔbɔ kɛ yijiemɔ kɛha lɛ, ni wɔnya kɛ miishɛɛ. Ni eba akɛ no aaatsirɛ wɔ koni wɔbɔ mɔdɛŋ akɛ wɔɔkase ekpakpa ni efeɔ lɛ, yɛ nɔ fɛɛ nɔ ni wɔfeɔ lɛ mli.—Lala 145:7; Yer. 31:12.