Kpokpaa Wuji kɛ Majimaji Ateŋ Kpeei Kanyaa Wɔ Koni Wɔkɛ Anunyam Aha Nyɔŋmɔ!

“Okɛ Anunyam Aha Nyɔŋmɔ” Kpokpaa Wuji kɛ Majimaji Ateŋ Kpeei ni áfee kɛbashi bianɛ lɛ eye odase kpele. Nɛkɛ teokrase nifeemɔi ni sa kadimɔ nɛɛ ewó Yehowa gbɛi lɛ nɔ gojoo, ni eha nyɛmɔ ni wɔyɔɔ akɛ ‘wɔkɛ anunyam ni sa Yehowa gbɛi lɛ aaaha lɛ’ lɛ etee hiɛ. (Lala 96:8) Hɛɛ, esa akɛ awo ehiɛ nyam yɛ edebɔɔ nitsumɔi ni yɔɔ naakpɛɛ, ní jieɔ esui ni yɔɔ nyam lɛ kpo lɛ hewɔ.—Hiob 37:14; Kpoj. 4:11.

Okɛ sanebimɔi ni nyiɛ sɛɛ nɛɛ kɛ wiemɔi lɛ amli otii ni okadi oshwie shi lɛ atsu nii, koni osaa ohe ni okɛ ohe awo kpee gbɛjianɔtoo lɛ mlitĩi ni abaafee yɛ February 16 otsi lɛ mli lɛ mli.

1. Adebɔɔ nibii ni wala bɛ mli lɛ kɛ anunyam haa Nyɔŋmɔ yɛ mɛɛ gbɛ nɔ, ni enɛ yɛ srɔto yɛ gbɛ ni adesai jieɔ eyi amɛhaa lɛ mli yɛ mɛɛ gbɛ nɔ? (Lala 19:2-4; “Adebɔɔ Jajeɔ Nyɔŋmɔ Anunyam lɛ Etsɔɔ”)

2. Mɛɛ nibii ni yɔɔ bianɛ lɛ tsakemɔ lɛ feɔ he mfoniri, ni anɔkwa sane nɛɛ woɔ Kristofoi ahewalɛ ŋmɛnɛ yɛ mɛɛ gbɛ nɔ? (Wiemɔ Krɛdɛɛ, “Anunyam Gbalɛ Ninaai Kanyaa Wɔ Koni Wɔya Nɔ!”)

3. Te wɔɔfee tɛŋŋ wɔjie heshibaa su ni gbalɔ Daniel jie lɛ kpo lɛ kpo, ni te wɔɔfee tɛŋŋ wɔná enɛ feemɔ he sɛɛ? (Dan. 9:2, 5; 10:11, 12; “Ajie Yehowa Anunyam lɛ Kpo Atsɔɔ Heshibalɔi”)

4. (a) Mɛɛ nibii etɛ ni kɔɔ ŋwɛi kojomɔ he wɔbaanyɛ wɔkase kɛjɛ Amos gbalɛ lɛ mli? (Amos 1:3, 11, 13; 9:2-4, 8, 14) (b) Mɛɛ nikasemɔ ni anyɛɔ atsuɔ he nii Yehowa Odasefoi baanyɛ akase kɛjɛ kɔkɔbɔɔ he nɔkwɛmɔnɔ ni anaa yɛ Amos 2:12 lɛ mli ŋmɛnɛ? (“Amos Gbalɛ Lɛ—Shɛɛ Sane ni Ehiɛ Kɛha Wɔgbii Nɛɛ”)

5. (a) Mɛɛ osharai yɔɔ dãa ni anuɔ fe nine lɛ mli, kɛji akɛ mɔ lɛ etɔɔɔ po? (b) Mɛɛ gbɛ nɔ aaatsɔ atsu dãa ni anuɔ fe nine he naagba lɛ he nii yɛ? (Mar. 9:43; Efe. 5:18; “Kwa Dãanumɔ Shɛii He Tsɔne Lɛ”)

6. Mɛɛ gbɛ nɔ onáa wolo hee ni ji ‘Kwɛmɔ Shikpɔŋ Kpakpa Lɛ’ he sɛɛ yɛ? (“‘Shikpɔŋ Kpakpa Lɛ’—Paradeiso ni Akpaa Gbɛ lɛ He Mfoniri Bibioo.”)

7. Mɛɛ gbɛi etɛ anɔ wɔbaanyɛ ‘wɔkpɛ́ Yehowa anunyam lɛ wɔtsɔɔ tamɔ ashwishwɛi’ yɛ? (2 Kor. 3:18; ‘Nyɛkpɛ́a Yehowa Anunyam lɛ Nyɛtsɔɔa Tamɔ Ashwishwɛi’)

8. Nɛgbɛ nyɛ̃ ni anyɛ̃ɔ wɔ yɛ gbɛ ni ejaaa nɔ lɛ jɛ, ni mɛni baanyɛ aye abua wɔ koni wɔhiɛ wɔ emuuyeli lɛ mli yɛ nakai nyɛ̃ɛ lɛ fɛɛ sɛɛ? (Lala 109:1-3; “Anyɛ̃ɔ Amɛ Yakatswaa”)

9. Mɛni ji susumɔ ni tamɔ Kristo nɔ̃ yɛ agbojee he, ni te mɔ ko aaafee tɛŋŋ ena akɛ esa akɛ ená nɛkɛ susumɔ nɛɛ babaoo kɛmɔ shi? (Mat. 20:20-26; “Susumɔ ni Tamɔ Kristo Nɔ̃ lɛ ni Aaaná yɛ Agbojee He”)

10. Mɛni baaye abua wɔ koni wɔhi shi akɛ mɛi ni he wa yɛ mumɔŋ, yɛ gbɔmɔtsoŋ tɔlɛ fɛɛ sɛɛ? (“Etɔ Wɔ, Shi Wɔgbɔjɔɔɔ”)

11. Mɛni ji gbɛjianɔtoi komɛi ni Satan tsɔɔ nɔ ekɛgbɛɔ lakamɔ eshwaa, ni mɛɛ Ŋmalɛi ni sa wɔbaanyɛ wɔkɛtsu nii ni wɔkɛtsi mɔdɛŋ ni ebɔɔ koni ekɛfite wɔhemɔkɛyeli lɛ naa? (Yoh. 10:5; “Kwɛmɔ Jogbaŋŋ yɛ ‘Mɛi Kpɔ̃ji Agbee’ He”)

12. (a) Te fɔlɔi aaafee tɛŋŋ amɛnyiɛ Yesu nɔkwɛmɔnɔ ni aŋma afɔ shi yɛ Marko 10:14, 16 lɛ sɛɛ? (b) Mɛni osumɔɔ yɛ wolo hee ni ji Kasemɔ Nii Kɛjɛ Tsɔɔlɔ Kpele lɛ Ŋɔɔ? lɛ he. (“Wɔbii Lɛ—Gboshinii ni Jara Wa”)

13. Mɛɛ gbɛ nɔ oblahii kɛ oblayei jieɔ Yehowa yi yɛ? (1 Tim. 4:12; “Bɔ ni Oblahii kɛ Oblayei Jieɔ Yehowa Yi”)

14. Mɛɛ nibii ni yɔɔ drama ni ji “Odaseyeli yɛ Ekãa Naa yɛ Shitee-kɛ-Woo Fɛɛ Sɛɛ” lɛ mli okaiɔ waa?

15. Te wɔɔfee tɛŋŋ wɔkase nɔkwɛmɔnɔ ni (a) Petro kɛ Yohane fee amɛfɔ shi lɛ? (Bɔf. 4:10) (b) Stefano fee efɔ shi lɛ? (Bɔf. 7:2, 52, 53) (c) klɛŋklɛŋ afii 100 lɛ mli Kristofoi asafo lɛ fee amɛfɔ shi lɛ? (Bɔf. 9:31; drama kɛ wiemɔ ni ji “Jajemɔ Sanekpakpa lɛ ‘ni Ofɔ̃ɔɔ’”)

16. (a) Mɛɛ gbɛ̀i anɔ wɔtswa wɔfai shi akɛ wɔkɛ anunyam baaha Nyɔŋmɔ yɛ? (b) Be mli ni wɔkɛ nɔ ni wɔkase yɛ “Okɛ Anunyam Aha Nyɔŋmɔ” Kpeei lɛ ashishi lɛ tsuɔ nii lɛ, mɛni he nɔmimaa wɔbaanyɛ wɔná? (Yoh. 15:9, 10, 16; “‘Nyɛyaa nɔ Nyɛwoa Yibii Pii’ Kɛwoa Yehowa Hiɛ Nyam”)

Kɛ́ wɔtee nɔ wɔjwɛŋ mumɔŋ gbɛtsɔɔmɔi kpakpai ni akɛha yɛ kpee lɛ shishi lɛ anɔ lɛ, ebaatsirɛ wɔ koni wɔkɛ nibii ni wɔkase lɛ atsu nii. (Fil. 4:8, 9) Enɛ baawaje ekãa ni wɔyɔɔ akɛ ‘wɔɔfee nibii fɛɛ ni wɔkɛwo Nyɔŋmɔ hiɛ nyam’ lɛ.—1 Kor. 10:31.