Mɛi ni Sa lɛ ni Wɔɔtao
1 Gbɛtsɔɔmɔi ni Yesu kɛha yɛ shiɛmɔ nitsumɔ lɛ ni wɔɔtsu lɛ he lɛ kɛ nitsumɔ ni wa bahãa wɔ. Ekɛɛ akɛ: “Shi maŋ fɛɛ maŋ aloo akrowa fɛɛ akrowa mli ni nyɛaatee lɛ, nyɛbia mɔ ni sa shi yɛ jɛi.” (Mat. 10:11) Akɛni ŋmɛnɛ lɛ be falɛ ni mɛi kɛhiɔ shia lɛ baa shi be fɛɛ be hewɔ lɛ, mɛɛ gbɛ̀i anɔ wɔbaanyɛ wɔtsɔ ni wɔnitaomɔ nɛɛ afee nɔ ni mɔɔ shi jogbaŋŋ?
2 Pɛimɔ Oshikpɔŋkuku lɛ Mli: Jee shishi kɛtsɔ oshikpɔŋkuku lɛ mli ni ooopɛi okwɛ lɛ nɔ. Mɛɛ bei nɛkɛ ebaanyɛ eba lɛ akɛ mɛi pii baahi shia? Nɛgbɛ ji he ni abaanyɛ ana amɛ yɛ gbi lɛ mli? Ani gbi pɔtɛɛ ko yɛ otsi lɛ mli, aloo be ko yɛ gbi lɛ mli ni ebaanyɛ eba lɛ akɛ amɛbaabo sane lɛ toi jogbaŋŋ? Ní oootsake oshiɛmɔ nitsumɔ lɛ mli koni esa mɛi ni yɔɔ nyɛshikpɔŋkuku lɛ mli lɛ adaa gbi nifeemɔi kɛ bɔ ni amɛshihilɛ aaaŋmɛ amɛ gbɛ aha lɛ baanyɛ aye abua bo koni oye omanye babaoo.—1 Kor. 9:23, 26.
3 Shiɛlɔi babaoo anine eshɛ mɛi anɔ yɛ shia yɛ gbɛkɛnaashi mli. Shiatsɛmɛi komɛi bɛ nɔ ko feemɔ tsɔ yɛ nakai bei amli, ni amɛbaasumɔ ni amɛbo wɔ toi. Kɛji akɛ kɔɔyɔɔ lɛ mli ehiii lɛ, gbɛkɛnaashi tɛlifoŋ nɔ odaseyeli (yɛ hei ni abaanyɛ atsu he nii yɛ) lɛ baanyɛ afee nɔ ni mɔɔ shi jogbaŋŋ. Odase ni ayeɔ yɛ shikpɔŋkuku ni nitsumɔhei yɔɔ mli lɛ mli lɛ kɛ hei ni anaa mɛi yɛ lɛ hu ji gbɛ̀i krokomɛi anɔ ni atsɔɔ akɛ sanekpakpa lɛ shɛɔ gbɔmɛi aŋɔɔ.
4 Yɛ nyɔŋ ko ni atsu nitsumɔ krɛdɛɛ yɛ mli lɛ nɔ lɛ, asafo ko to gbɛkɛnaashi odaseyeli he gbɛjianɔ Hɔɔ kɛ Hɔgbaa kɛ leebi maŋkpa kɛ gbɛkɛnaashi odaseyeli Shɔ kɛ Sohaa. Amɛsaa amɛto gbɛjianɔ kɛha tɛlifoŋ nɔ odaseyeli koni amɛtsu nii yɛ shikpɔŋkuku ni nitsumɔhei yɔɔ mli lɛ hu mli. Nɛkɛ gbɛjianɔtoi nɛɛ kanya miishɛɛ babaoo ni ayɔɔ kɛha sɔɔmɔ nitsumɔ lɛ aahu akɛ asafo lɛ kpɛ yiŋ akɛ ebaatsa nɔ nakai.
5 Okɛ Ekãa Adi Sɛɛ: Kɛji akɛ eji nɔ ni wa yɛ oshikpɔŋkuku lɛ mli akɛ ooona mɛi yɛ shia kɛ́ oku osɛɛ lɛ, no lɛ bɔɔ mɔdɛŋ ni yɛ saramɔ fɛɛ saramɔ naagbee lɛ, okɛ mɔ lɛ ato be pɔtɛɛ ko akɛ obaaku osɛɛ oba ekoŋŋ, ni klɛŋklɛŋ gbi ni oyasara lɛ lɛ fata he. Kɛkɛ lɛ, bɔɔ mɔdɛŋ ni oye oshiwoo lɛ nɔ. (Mat. 5:37) Kɛ ebaahi lɛ, obaanyɛ ni obi shiatsɛ lɛ tɛlifoŋ nɔmba. Enɛ hu baaye abua bo koni oyasara mɔ lɛ ekoŋŋ.
6 Ekãa ni wɔkɛaabɔ mɔdɛŋ koni wɔtao mɛi ni sa lɛ ni wɔyadi miishɛɛ ni ajieɔ lɛ kpo lɛ sɛɛ lɛ kɛ Yehowa jɔɔmɔ baaba kɛ̃.—Abɛi 21:5.