Vidio ko ni Gbalaa Jwɛŋmɔ Kɛyaa Tsofafeemɔ Mli Nifeemɔ ko ni He Hiaa Waa lɛ Nɔ

Nitsulɔi ni etee hiɛ yɛ mla kɛ helatsamɔ mli lɛ miiya hiɛ be fɛɛ be yɛ toiboo ni amɛfeɔ amɛhaa susumɔi ni helatsɛmɛi yɔɔ yɛ sui kpakpai kɛ hegbɛi ni amɛyɔɔ lɛ ahe lɛ amli. Enɛ eha aná tsofafeemɔi kɛ helatsamɔ nifeemɔi heei ni Yehowa Odasefoi baanyɛ aná he sɛɛ. (Bɔf. 15:28, 29) Enɛ ji nɔ ni vidio ni ji Transfusion-Alternative Health Care—Meeting Patient Needs and Rights (Helatsamɔ Mli Nɔ ni Yeɔ Lá ni Agbalaa Awoɔ Mɔ Mli lɛ Najiaŋ—Helatsɛ lɛ Hiamɔ Nii kɛ Hegbɛi) lɛ gbalaa jwɛŋmɔ kɛyaa nɔ. Kwɛmɔ vidio lɛ, ni no sɛɛ lɛ otĩ nibii ni okase lɛ amli.—Kadimɔ: Akɛni opireshɛn feemɔ he mfonirii fioo komɛi yɛ vidio lɛ mli hewɔ lɛ, esa akɛ fɔlɔi kɛ hiɛshikamɔ atsu nii kɛji amɛkɛ gbekɛbii ni darako lɛ miikwɛ vidio lɛ.

(1) Mɛni hewɔ tsofafeemɔ he nitsulɔi kwɛɔ lá ni agbalaa awoɔ mɔ mli kɛ nitsumɔ lɛ mli ekoŋŋ lɛ? (2) Okɛ opireshɛn srɔtoi ni yɔɔ hwanyaŋŋ ni afee ni akɛ lá ni agbalaa awoɔ mɔ mli tsuuu nii yɛ mli lɛ he nɔkwɛmɔnii etɛ aha. (3) Yɛ je lɛŋ fɛɛ lɛ, tsofafeelɔi kɛ opireshɛnfeelɔi enyiɛ etsɔɔ akɛ amɛmiisumɔ ni amɛtsu helatsɛmɛi ahe nii ni lá ni agbalaa awoɔ mɔ mli lɛ fataaa he? Mɛni hewɔ amɛsumɔɔ akɛ amɛfee nakai lɛ? (4) Mɛni nikasemɔi ni afee nyɛsɛɛ nɛɛ yɛ helatsamɔhei lɛ ejie lɛ kpo yɛ lá kɛ nitsumɔ he? (5) Mɛɛ tsofafeemɔŋ osharai yɔɔ lá ni agbalaa awoɔ mɔ mli lɛ he? (6) Te tsofafeemɔ he nitsulɔi babaoo ni he esa lɛ emu sane naa amɛha tɛŋŋ yɛ sɛɛnamɔi ni yɔɔ nibii ni akɛyeɔ lá ni agbalaa awoɔ mɔ mli lɛ najiaŋ lɛ he? (7) Mɛni haa mɔ lá nɔ gbɔ́ɔ? Nɛgbɛ ji he ni adesai agbɔmɔtso lɛ baanyɛ akpee naa kɛyashi? Mɛni abaanyɛ afee ni akɛtsĩ naa? (8) Mɛɛ gbɛ nɔ abaanyɛ atsɔ ni aha walayibii tsuji afalɛ ni yɔɔ helatsɛ ko gbɔmɔtso mli lɛ aya hiɛ yɛ? (9) Mɛɛ ŋaa gbɛ̀i akɛmiitsu nii bɔni afee ni akɛba lá falɛ ni hoɔ lɛ shi yɛ be mli ni afeɔ opireshɛn lɛ? (10) Ani abaanyɛ akɛ nibii ni akɛyeɔ lá ni agbalaa awoɔ mɔ mli lɛ najiaŋ lɛ atsu gbekɛbii bibii loo mɛi ni yɔɔ oshara shihilɛ ni yɔɔ gbeyei mli lɛ ahe nii? (11) Mɛni ji helatsamɔ mli sui kpakpai ahe shishitoo mlai ni fe fɛɛ lɛ ateŋ ekome? (12) Mɛni hewɔ ehe hiaa ni Kristofoi akpɛ amɛyiŋ kɛtsɔ hiɛ yɛ tsofafeemɔ ni akɛ lá tsuuu nii yɛ mli lɛ he lɛ? Mɛɛ gbɛ nɔ wɔɔtsɔ wɔfee enɛ?

Kpɛlɛmɔ ni aaakpɛlɛ tsofafeemɔ nifeemɔi komɛi ni je kpo yɛ vidio lɛ mli lɛ nɔ lɛ ji mɔ aŋkro yiŋkpɛɛ, yɛ mɔ fɛɛ mɔ henilee ni Biblia etsɔse lɛ lɛ naa. Ani okpɛ oyiŋ yɛ nibii ni akɛyeɔ lá ni agbalaa awoɔ mɔ mli lɛ najiaŋ lɛ amli nɔ ni obaasumɔ kɛha bo diɛŋtsɛ ohe kɛ obii lɛ he? Esa akɛ oha owekumɛi ni jeee Odasefoi lɛ hu ale oyiŋkpɛi ni ofee lɛ kɛ yiŋtoi ahewɔ ni okpɛ oyiŋ nakai lɛ hu he sane fitsofitso.—Kwɛmɔ “Sanebimɔi ni Jɛ Kanelɔi Adɛŋ” ni yɔɔ June 15 kɛ October 15, afi 2000 Buu-Mɔɔ srɔtoi lɛ amli lɛ.