Kpee Yaa Daa—Ní Akɛaaye Klɛŋklɛŋ Gbɛhe
1 Kristofoi awekui kɛ asafoŋ kpeei ni amɛaaya daa lɛ yeɔ klɛŋklɛŋ gbɛhe. Shi kɛlɛ nibii ni shihilɛ biɔ ŋmɛnɛ lɛ baanyɛ ekɛ naagba aba. Ani shĩa nitsumɔi, heloonaa nitsumɔ, loo skul nitsumɔ miije shishi eehe be ni ato kɛha Yehowa jamɔ lɛ? Ní wɔɔkwɛ nii tamɔ bɔ ni Yehowa kwɛɔ nii lɛ baaye abua wɔ koni wɔya nɔ wɔhiɛ nibii ni wɔkɛyeɔ klɛŋklɛŋ gbɛhe lɛ amli.—1 Sam. 24:6; 26:11.
2 Nuu ko ni ji Israelnyo lɛ je gbɛ eku ehiɛ eshwie bɔ ni Yehowa kwɛɔ nii ehaa lɛ nɔ kɛtsɔ lai ni elɛ́ yɛ hejɔɔmɔ gbi lɛ nɔ lɛ nɔ. Ekolɛ esusu akɛ eefee enɛ kɛha eweku lɛ loo akɛ eji nɔ ko bibioo ko kɛkɛ. Shi kɛlɛ, kɛtsɔ kojomɔ ni Yehowa kɛha lɛ nɔ lɛ, etsɔɔ akɛ shihilɛ mli nibii kɛkɛ ni atiuɔ sɛɛ yɛ bei ni ato kɛha jamɔ lɛ mli lɛ ji sane ni hiɛdɔɔ yɔɔ he.—4 Mose 15:32-36.
3 Kaa lɛ Naadaamɔ: Eji nɔ ni wa waa kɛha mɛi babaoo akɛ amɛaakwɛ koni heloonaa nitsumɔ akatsi amɛnaa yɛ kpee ni amɛaaya lɛ mli. Mɛi komɛi eye kaa nɛɛ nɔ kɛtsɔ wiemɔ ni amɛkɛ amɛnitsumɔtsɛmɛi ewie he, bei ni amɛkɛ amɛnanemɛi nitsulɔi tsakeɔ, nitsumɔ kroko ni sa ni amɛtao, loo amɛshihilɛ ni amɛha efee mlɛo lɛ nɔ. Eka shi faŋŋ akɛ, nɛkɛ afɔlei ni ashãa yɛ anɔkwa jamɔ hewɔ nɛɛ saa Nyɔŋmɔ hiɛ jogbaŋŋ.—Heb. 13:16.
4 Skul nitsumɔ hu baanyɛ ekɛ kaa aba. Oblayoo ko kɛɛ akɛ: “Mifeɔ miskul nitsumɔ lɛ eko dani wɔyaa kpeei ni mifeɔ nɔ ni eshwɛ lɛ beni miba shia sɛɛ.” Kɛji akɛ anyɛɛɛ agbe skul nifeemɔi ni akɛbaa shĩa lɛ fɛɛ naa yɛ gbɛkɛ ni akɛyaa kpee nɔ lɛ, fɔlɔi komɛi gbalaa nibii amli kɛhaa tsɔɔlɔi lɛ akɛ Kristofoi akpee yaa ji nɔ ko ni amɛweku lɛ kɛyeɔ klɛŋklɛŋ gbɛhe.
5 Ekomefeemɔ kɛ gbɛjianɔtoo kpakpa ji nibii titri ni haa agbeɔ shĩa nifeemɔi anaa kɛsaa he kɛha kpee yaa yɛ be naa akɛ weku. (Abɛi 20:18) Abaanyɛ atsɔɔ gbekɛbii ni darako lɛ po koni amɛsaa amɛhe ni amɛfee klalo kɛha kpee yaa yɛ be pɔtɛɛ ko mli. Kɛtsɔ fɔlɔi lɛ anɔkwɛmɔnɔ lɛ nɔ lɛ, amɛbaanyɛ amɛdũ sɛɛnamɔ ni yɔɔ kpeei ahe lɛ amɛwo amɛbii lɛ amli.—Abɛi 20:7.
6 Be mli ni ŋmɛnɛŋmɛnɛ nibii agbɛjianɔtoo lɛ mli nɔnyɛɛi yaa hiɛ lɛ, ehe miiha ni wɔya asafoŋ kpeei daa. Eba akɛ wɔbaaya nɔ wɔkwɛ nibii tamɔ bɔ ni Yehowa kwɛɔ nii ehaa ni wɔkɛ kpee ni wɔɔya daa lɛ aye klɛŋklɛŋ gbɛhe.—Heb. 10:24, 25.