Tabilɔ ko ni Tá Okpɔŋɔ Nɔ ni Kɔɔ Ohe
1, 2. Gbalɛ ninaa ni aŋma yɛ Kpojiemɔ 9:13-19 lɛ mlibaa kɔɔ Nyɔŋmɔ tsuji ni yɔɔ ŋmɛnɛ lɛ ahe yɛ mɛɛ gbɛ nɔ?
1 “Bɔfo ni ji ekpaa lɛ kpã.” No sɛɛ lɛ, “tabilɔi ni tara okpɔŋɔi anɔ” ni amɛyibɔ ji “akpei nyɔŋmai enyɔ toi akpei nyɔŋma” lɛ kpã tɛtrɛmaŋtɛrɛ ni gbɛɛmɔ tamɔ nugbɔshiimɔ. Mɛnɛɛmɛi jeee tabilɔi foji kɛkɛ. “Okpɔŋɔi lɛ ayitsei tamɔ jatai ayitsei.” La, lasu, kɛ swɔɔ fãa kɛjɛɔ amɛdaaŋ, ni “amɛleii lɛ tamɔ onufui.” Hiɛkpatamɔ jɛ nɛkɛ mfonirifeemɔŋ tabilɔ ni ta okpɔŋɔ nɔ lɛ nifeemɔ lɛ mli kɛba. (Kpoj. 9:13-19) Ani ole bɔ ni gbalɛ ninaa ni sa kadimɔ nɛɛ mlibaa kɔɔ ohe ehaa?
2 Shwɛɛnii ni afɔ amɛ mu lɛ kɛ amɛhefatalɔi ni ji tooi krokomɛi lɛ kɛ ekomefeemɔ jajeɔ Nyɔŋmɔ kojomɔi lɛ. Enɛ haa akpaa mumɔŋ gbele shihilɛ mli ni Kristendom yɔɔ mli lɛ he mama kwraa. Nyɛhaa wɔpɛia gbalɛ ninaa lɛ mli fãi ni maa nɔ hewɔ ni Nyɔŋmɔ tsuji lɛ asɔɔmɔ nitsumɔ lɛ mɔɔ shi waa lɛ nɔ mi lɛ mli wɔkwɛa.
3. Mɛɛ tsɔsemɔ onine eshɛ nɔ koni okɛjaje Nyɔŋmɔ shɛɛ sane lɛ yɛ gbɛ ni mɔɔ shi nɔ?
3 Atsɔse ni Asaa Amɛ Koni Amɛjaje Nyɔŋmɔ Shɛɛ Sane Lɛ: Atsɔɔ Teokrase Sɔɔmɔ Skul lɛ kɛ asafoŋ kpeei krokomɛi anɔ atsɔseɔ Nyɔŋmɔ sɔɔlɔi lɛ koni amɛkɛ hewalɛ ajaje Nyɔŋmɔ shɛɛ sane lɛ. Yɛ Yesu kɛ ekaselɔi lɛ akasemɔ mli lɛ, amɛyataoɔ mɛi ni sa lɛ, ni amɛshiɛɔ yɛ he fɛɛ he ni amɛbaana gbɔmɛi yɛ. (Mat. 10:11; Mar. 1:16; Luka 4:15; Bɔf. 20:18-20) Kwɛ bɔ ni gbɛ ni atsɔɔ nɔ ashiɛɔ ni damɔ Biblia lɛ nɔ lɛ efee nɔ ni mɔɔ shi ha!
4. Mɛɛ dɛŋdadei shiɛlɔi babaoo yɔɔ ni baaye abua amɛ koni amɛtsu amɛnitsumɔ lɛ?
4 Sɔɔlɔi Kristofoi eja Bibliai, woji, woji bibii, kɛ woji tɛtrɛbii akpekpei toi akpei abɔ, ni amɛkɛtsu shiɛmɔ nitsumɔ ni Nyɔŋmɔ kɛwo amɛdɛŋ lɛ. Akala woji nɛɛ yɛ wiemɔi aaashɛ 400 mli, ni ewieɔ saji srɔtoi ahe, ni ekɛ gbɛ̀i ni gbɔmɛi srɔtoi náa he miishɛɛ lɛ tsuɔ nii. Ani okɛ woji nɛɛ miitsu nii jogbaŋŋ?
5, 6. Mɛni tsɔɔ akɛ Yehowa webii yɛ ŋwɛi sɛɛfimɔ?
5 Ŋwɛi Gbɛtsɔɔmɔ kɛ Sɛɛfimɔ: Gbalɛ ninaa lɛ hu feɔ lɛ faŋŋ akɛ Nyɔŋmɔ fiɔ nitsumɔ ni mfonirifeemɔŋ tabilɔ ko ni tá okpɔŋɔ nɔ lɛ tsuɔ lɛ sɛɛ. (Kpoj. 9:13-15) Jeee adesai anilee loo hewalɛ nɔ atsɔɔ atsuɔ jeŋ muu fɛɛ shiɛmɔ nitsumɔ lɛ, shi moŋ kɛtsɔ Nyɔŋmɔ mumɔ lɛ nɔ. (Zak. 4:6) Yehowa kɛ ŋwɛibɔfoi lɛ miitsu nii koni amɛkudɔ nitsumɔ nɛɛ. (Kpoj. 14:6) No hewɔ lɛ, Yehowa kɛ ŋwɛi sɛɛfimɔ fataa mɔdɛŋ ni adesai ni ji e-Dasefoi lɛ bɔɔ lɛ he koni akɛgbala heshibalɔi kɛba emasɛi.—Yoh. 6:45, 65.
6 Akɛni atsɔse Yehowa webii lɛ, ni asaa amɛ jogbaŋŋ koni amɛjaje Nyɔŋmɔ shɛɛ sane lɛ hewɔ lɛ, anyɛŋ amɛnaa atsi. Nyɛhaa wɔyaa nɔ wɔtsua wɔgbɛfaŋnɔ yɛ gbalɛ ninaa ni sa kadimɔ nɛɛ mlibaa mli lɛ he nii.