Nyɛjiea Hiɛsɔɔ Kpo
1 Eyɛ mli akɛ wɔyɛ “jaramɔ bei” amli moŋ, shi wɔyɛ yiŋtoi babaoo ni wɔɔdamɔ nɔ wɔda Yehowa shi. (2 Tim. 3:1) Nɔ titri ni fata enɛɛmɛi ahe ji nikeenii ni jara wa ni ji e-Bi ni ekɛhã yɛ wɔ hewɔ lɛ. (Yoh. 3:16) Kɛfata he lɛ, beni mumɔŋ hɔmɔ miiye mɛi ni yɔɔ apasa jamɔ mli lɛ, wɔ lɛ wɔnáa mumɔŋ niyenii babaoo wɔyeɔ. (Yes. 65:13) Wɔfata jeŋ muu fɛɛ nyɛmifeemɔ lɛ he, ni wɔná hegbɛ hu akɛ wɔkɛ wɔhe awo anɔkwa jamɔ mlilɛɛmɔ ni yɔɔ miishɛɛ lɛ mli. (Yes. 2:3, 4; 60:4-10, 22) Wɔbaanyɛ wɔjie hiɛsɔɔ kpo wɔtsɔɔ Yehowa jɔɔmɔi lɛ yɛ mɛɛ gbɛ nɔ?—Kol. 3:15, 17.
2 Tsui Muu Fɛɛ Mli Ni Ajɛɔ Asɔmɔɔ Kɛ Miishɛɛ: Bɔfo Paulo ŋma beni ewieɔ nihamɔ he lɛ akɛ: “Tsuijurɔnaa halɔ Nyɔŋmɔ sumɔɔ.” (2 Kor. 9:7) Nɛkɛ shishitoo mla nɛɛ hu kɔɔ sɔɔmɔ ni wɔkɛhaa Nyɔŋmɔ lɛ he. Ekãa ni wɔyɔɔ kɛha anɔkwale lɛ, miishɛɛ ni wɔnáa yɛ Kristofoi akpeei ashishi, ekãa ni wɔyɔɔ yɛ shiɛmɔ nitsumɔ lɛ mli, kɛ miishɛɛ ni wɔkɛfeɔ Nyɔŋmɔ suɔmɔnaa nii lɛ jieɔ hiɛsɔɔ ni wɔyɔɔ kɛha Nyɔŋmɔ lɛ kpo.—Lala 107:21, 22; 119:14; 122:1; Rom. 12:8, 11.
3 Yɛ blema Israel lɛ, Mla lɛ biii afɔlei komɛi ni ashãa lɛ falɛ pɔtɛɛ ko kɛjɛɛɛ mɔ ko dɛŋ. Mɔ fɛɛ mɔ ni jáa Nyɔŋmɔ lɛ baanyɛ ajie shidaa kpo kɛtsɔ hamɔ ni eeeha yɛ ‘bɔ ni Yehowa e-Nyɔŋmɔ lɛ ejɔɔ lɛ eha lɛ’ naa. (5 Mose 16:16, 17) Nakai nɔŋŋ hu ŋmɛnɛ, tsui ni eyi obɔ kɛ hiɛsɔɔ lɛ baatsirɛ wɔ koni wɔfee bɔ ni wɔshihilɛ baaŋmɛ wɔ gbɛ yɛ Maŋtsɛyeli lɛ shiɛmɔ kɛ kaselɔ-feemɔ nitsumɔ lɛ mli. Bei pii lɛ latsaa bei lɛ haa wɔnáa hegbɛ koni wɔjie wɔ hiɛsɔɔ lɛ kpo wɔtsɔɔ. Mɛi komɛi kɛ gbɛhamɔ bei aloo bei ni akɛjɔɔ he kɛjɛ nitsumɔ mli, kɛ gbii ni hulu enyɔɔɔ shi mra lɛ tsuɔ nii ni amɛkɛ amɛhe woɔ gbɛgbalɔi awalɔ nitsumɔ lɛ mli bɔni afee ni bei ni amɛkɛwoɔ shiɛmɔ nitsumɔ lɛ mli lɛ aya hiɛ. Ani obaanyɛ olɛɛ osɔɔmɔ nitsumɔ lɛ mli yɛ latsaa bei nɛɛ mli?
4 Nyɛtekea Nɔ Kɛ Shidaa: Gbɛ kome ni wɔtsɔɔ nɔ wɔjieɔ shidaa kpo kɛhaa Yehowa ji yɛ sɔlemɔ mli. (1 Tes. 5:17, 18) Nyɔŋmɔ Wiemɔ lɛ woɔ wɔ hewalɛ koni ‘wɔteke nɔ kɛ shidaa.’ (Kol. 2:7) Kɛji akɛ wɔbɛ deka kwraa loo wɔhao po lɛ, esa akɛ wɔkɛ shidaa afata wɔdaa gbi sɔlemɔi ahe. (Fil. 4:6) Hɛɛ, nyɛhaa wɔtsɔa wɔsɔɔmɔ nitsumɔ lɛ kɛ sɔlemɔi anɔ wɔɔfee mɛi ni ‘daa Nyɔŋmɔ shi babaoo kɛtekeɔ nɔ.’—2 Kor. 9:12.