Jajemɔ Yehowa Anunyam Lɛ
1 Lalatsɛ lɛ jaje akɛ: “Shikpɔŋ lɛ fɛɛ, nyɛlaa nyɛhaa Yehowa! Nyɛjajea enunyam lɛ nyɛtsɔa yɛ jeŋmaji lɛ ateŋ, kɛ enaakpɛɛ nii lɛ yɛ maji fɛɛ ateŋ.” Kɛ wɔjwɛŋ nibii ni Yehowa efee eha wɔ, nibii ni efeɔ ehaa wɔ, kɛ nibii ni ebaafee eha wɔ wɔsɛɛ lɛ anɔ lɛ, wɔtsuii tsirɛɔ wɔ ní wɔjaje enunyam lɛ!—Lala 96:1, 3.
2 Yɛ Wɔshiɛmɔ Nitsumɔ lɛ Mli: Eji hegbɛ ni Yehowa Odasefoi ená ákɛ akɛ Nyɔŋmɔ gbɛi lɛ aaatsɛ amɛ, ní amɛjie egbɛi lɛ yi amɛtsɔɔ jeŋmaji fɛɛ yɛ faŋŋ mli. (Mal. 1:11) Kwɛ bɔ ni enɛ yɔɔ srɔto yɛ Kristendom osɔfoi lɛ ni kɛ henɔwomɔ jieɔ Nyɔŋmɔ gbɛi lɛ kɛjɛɔ amɛ Biblia shishitsɔɔmɔi amli lɛ ahe! Nyɔŋmɔ gbɛi lɛ ni wɔɔha mɛi ale lɛ he miihia waa, ejaakɛ esa akɛ mɛi kɛ hemɔkɛyeli atsɛ nakai gbɛi lɛ koni ahere amɛyiwala kɛjɛ amanehulu kpeteŋkpele ni baa lɛ mli. (Rom. 10:13-15) Agbɛnɛ hu, toiŋjɔlɛ ni baahi ŋwɛi, kɛ toiŋjɔlɛ ni baahi mɛi ni yɔɔ shikpɔŋ lɛ nɔ lɛ ateŋ lɛ damɔ Nyɔŋmɔ gbɛi lɛ he ni aatse lɛ nɔ. Yɛ anɔkwale mli lɛ, Nyɔŋmɔ nitsumɔi lɛ fɛɛ kɛ egbɛi lɛ yɛ tsakpãa.
3 “Yehowa da ni esa yijiemɔ babaoo.” Shi kɛ́ mɛi ‘kɛ anunyam ni sa Yehowa gbɛi lɛ aaaha lɛ’ lɛ, no lɛ esa akɛ aha amɛle anɔkwale ni kɔɔ ehe lɛ. (Lala 96:4, 8) Shi kɛlɛ, mɛi komɛi kɛɔ akɛ Nyɔŋmɔ bɛ. (Lala 14:1) Mɛi krokomɛi hu gbeɔ ehe guɔ akɛ ebɛ hewalɛ, loo amɛkɛɔ akɛ ebɛ adesai ashihilɛ he miishɛɛ. Wɔjieɔ Yehowa yi be mli ni wɔyeɔ wɔbuaa mɛi ni hiɛ tsui ni ja lɛ koni amɛná wɔ-Bɔlɔ lɛ, eyiŋtoi, kɛ esui kpakpai lɛ ahe anɔkwa nilee lɛ.
4 Kɛtsɔ Wɔjeŋba Nɔ: Kɛ́ wɔhi shi yɛ Yehowa jalɛ shishitoo mlai anaa lɛ, wɔkɛwoɔ ehiɛ nyam. Anaa wɔjeŋba kpakpa lɛ. (1 Pet. 2:12) Ákɛ nɔkwɛmɔnɔ lɛ, ekolɛ wɔhesaamɔ ni he tse ni yɔɔ falefale lɛ baatsirɛ mɛi koni amɛwie wiemɔi kpakpai yɛ wɔhe, ni enɛ baaha wɔná hegbɛ ni wɔkɛ amɛ agba sɛɛnamɔi ni yɔɔ Nyɔŋmɔ Wiemɔ lɛ mli shishitoo mlai ni aaahi shi yɛ naa lɛ ahe sane. (1 Tim. 2: 9, 10) Kwɛ bɔ ni wɔnáa miishɛɛ kɛji akɛ mɛi krokomɛi ‘na wɔnifeemɔi kpakpai lɛ, ní amɛwo wɔ-Tsɛ ni yɔɔ ŋwɛi lɛ hiɛ nyam’ lɛ!—Mat. 5:16.
5 Nyɛhaa wɔtsɔa wɔwiemɔ kɛ wɔnifeemɔ nɔ wɔjiea wɔ-Nyɔŋmɔ ofe lɛ yi gbi fɛɛ gbi, ní wɔkɛ nakai feemɔ akpɛlɛ ninefɔɔ ni yɔɔ miishɛɛ nɛɛ nɔ akɛ: “Nyɛlaa nyɛhaa Yehowa, nyɛjiea egbɛi lɛ yi! Nyɛgbaa eyiwalaheremɔ lɛ he sane gbi fɛɛ gbi!”—Lala 96:2.