Fó Mɛi Krokomɛi Anɔ̃ Mli—Kɛtsɔ Sanesɛɛkɔmɔ Nɔ
1 Yehowa Nyɔŋmɔ kɛ Kristo Yesu he esa kɛ mɛi ahiamɔ nii pɔtɛɛi ayɔsemɔ kɛ yelikɛbuamɔ ni sa ní akɛhaa lɛ mli. (2 Kron. 16:9; Mar. 6: 34) Kɛji wɔyɔse nibii ni mɛi ni wɔkɛkpeɔ yɛ wɔshiɛmɔ nitsumɔ lɛ mli lɛ náa he miishɛɛ, kɛ nibii ni gbaa amɛnaa lɛ, wɔbaanyɛ wɔtsake gbɛ ni wɔtsɔɔ nɔ wɔkɛ sanekpakpa lɛ haa lɛ mli ni ekɔ amɛhe.
2 Gbalamɔ Ojwɛŋmɔ Kɛya Nibii ni Onaa lɛ Anɔ: Yesu kɔɔ sane sɛɛ. (Mar. 12:41-43; Luka 19: 1-6) Nakai nɔŋŋ wɔ hu kɛji wɔtee mɔ ko shinaa naa, ni wɔyɔse jamɔ mli okadii komɛi, wiemɔi ni aŋmala yɛ tsɔji ahe, loo shwɛmɔ nibii yɛ shĩa lɛ mli lɛ, wɔbaanyɛ wɔtsɔ ŋaa gbɛ nɔ ni wɔkɛ hegbɛi nɛɛ aye sanekpakpa lɛ he odase ni mɔɔ shi.
3 Mɔ ko nifeemɔ kɛ bɔ ni efee ehiɛ eha lɛ baanyɛ atsɔɔ wɔ shihilɛ mli ni eyɔɔ. (Abɛi 15:13) Ekolɛ suɔlɔ ko gbele loo shihilɛ ko ni haoɔ mɔ eha miishɛjemɔ he miihia lɛ. Ekolɛ ŋmalɛi komɛi ni sa ni oookane oha lɛ lɛ baaha emii ashɛ ehe. (Abɛi 16:24) Ani shiatsɛ lɛ miiye oyai kɛshi shĩa, aloo ehiɛ gbɛkɛ ko ni miifó? Kɛ́ nakai ni lɛ, no lɛ ekolɛ ebaahi akɛ okɛ lɛ ato gbɛjianɔ ni oku osɛɛ oyasara lɛ be kroko. Kɛ́ wɔjie mɛi ahesusumɔ kpo wɔtsɔɔ ní ‘wɔna mli wɔha mɛi’ lɛ, ekolɛ no baaha wɔkanya mɛi koni amɛbo wɔ toi kɛji wɔku wɔsɛɛ kɛtee amɛŋɔɔ ekoŋŋ.—1 Pet. 3:8.
4 Tsakemɔ Oshiɛmɔ Wiemɔ lɛ Mli: Bɔfo Paulo yɔse akɛ Ateene maŋtiase lɛ yɛ afɔleshaalatɛ ko ni ajɔɔ nɔ aha “Nyɔŋmɔ ni aleko lɛ” lɛ. Enɛ ná gbɛ ni etsɔ nɔ ekɛ sanekpakpa lɛ ha lɛ nɔ hewalɛ, ejaakɛ ekɛɛ akɛ: “Mɔ ni nyɛleee lɛ ni nyɛjáa lɛ kɛ̃ lɛ, lɛ nɔŋŋ ehe sane mijajeɔ mitsɔɔ nyɛ nɛɛ.” Ŋaa gbɛ ni Paulo tsɔ nɔ lɛ tsirɛ mɛi ni yɔɔ jɛmɛ lɛ ateŋ mɛi komɛi ni amɛsusu Maŋtsɛyeli shɛɛ sane lɛ he, ni amɛbatsɔmɔ heyelilɔi.—Bɔf. 17:23, 34.
5 Yɛ nakai gbɛ nɔ nɔŋŋ lɛ, kɛ́ wɔkɛ sanesɛɛkɔmɔ tsu nii lɛ, eyeɔ ebuaa wɔ koni wɔyɔse nibii ni mɔ lɛ naa he miishɛɛ, ni no yeɔ ebuaa wɔ ni wɔha wɔsane lɛ akɔ mɔ lɛ he. Bi saji ni baaha shiatsɛ lɛ ajie esusumɔi akpo. Kaimɔ ŋmalɛi ni obaanyɛ okɛtsu nii ni okɛha emiishɛɛ ni ená lɛ aya hiɛ lɛ. (Abɛi 20:5) Kɛ́ wɔkɛ sanesɛɛkɔmɔ tsu nii jogbaŋŋ ni wɔfó mɛi krokomɛi anɔ̃ mli lɛ, no baaye abua wɔ koni wɔkɛ hesaa ashiɛ sanekpakpa lɛ.