Nɔ ni Wɔshiɛmɔ Nitsumɔ lɛ Tsuɔ
1. Te Yehowa buɔ wɔshiɛmɔ nitsumɔ lɛ ehaa tɛŋŋ, ni te mɛi feɔ amɛnii yɛ he amɛhaa tɛŋŋ?
1 Nyɔŋmɔ Wiemɔ lɛ tsɔɔ bɔ ni Kristofoi yeɔ kunim yɛ Yehowa sɔɔmɔ lɛ mli, tamɔ kunimyelɔi ni miishi akoŋ. (2 Kor. 2: 14-16) Be mli ni wɔhaa aleɔ Nyɔŋmɔ he anɔkwale lɛ, wɔshiɛmɔ nitsumɔ lɛ bafeɔ tamɔ tsofa-kɛ-ŋma yɛ Yehowa hiɛ. Sanekpakpa lɛ ŋmajee lɛ haa mɛi komɛi kpɛlɛɔ nɔ; mɛi krokomɛi hu kpooɔ sanekpakpa lɛ. Shi sane lɛ toi ni mɛi babaoo booo lɛ etsɔɔɔ akɛ wɔyeee omanye yɛ wɔnitsumɔ lɛ mli. Susumɔ nɔ ni wɔshiɛmɔ nitsumɔ lɛ tsuɔ lɛ he okwɛ.
2. Mɛni wɔshiɛmɔ nitsumɔ lɛ yeɔ buaa ní wɔha ale?
2 Ekafoɔ Yehowa: Satan tswa mpoa akɛ adesai sɔmɔɔ Yehowa yɛ amɛ diɛŋtsɛ amɛhilɛ-kɛhamɔ hewɔ. (Hiob 1:9-11) Kristofoi ashiɛmɔ nitsumɔ lɛ haa wɔnáa hegbɛ ní wɔkɛtsɔɔ akɛ yiŋtoo kpakpa hewɔ wɔtu wɔhe wɔha Nyɔŋmɔ lɛ. Shiɛlɔi pii miiya nɔ amɛmiibo famɔ akɛ ashiɛ ni afee kaselɔi lɛ toi, yɛ shihilɛi ni mli wawai ni amɛkɛkpeɔ loo sane lɛ toi ni mɛi booo lɛ fɛɛ sɛɛ. Anɔkwayeli mli ni ajɛɔ aŋmɛɔ tsui shi yɛ gbɛ ni tamɔ nɛkɛ nɔ lɛ haa Yehowa tsui nyɔɔ emli!—Abɛi 27:11.
3. Mɛni hewɔ ehe hiaa waa akɛ wɔya nɔ wɔha ale Nyɔŋmɔ gbɛi kɛ eyiŋtoo lɛ?
3 Kɛfata he lɛ, wɔshiɛmɔ nitsumɔ lɛ tsuɔ gbɛfaŋnɔ ko he nii yɛ Nyɔŋmɔ yiŋtoo lɛ he nitsumɔ mli. Yehowa wie yɛ hiɛkpatamɔ ni ekɛbaaba Satan je lɛ nɔ lɛ he akɛ: “Jeŋmaji lɛ aaaná ale akɛ mi ji Yehowa.” (Ezek. 39:7) Kɛ́ je lɛ aaale enɛ lɛ, no lɛ ehe miihia waa ní Nyɔŋmɔ tsuji aya nɔ ajaje egbɛi kɛ eyiŋtoo lɛ amɛtsɔɔ “akutso fɛɛ akutso kɛ majianɔ wiemɔi fɛɛ kɛ maŋ fɛɛ maŋ.”—Kpoj. 14:6, 7.
4. Shiɛmɔ nitsumɔ lɛ bafeɔ nɔdaamɔnɔ kɛha kojomɔ yɛ mɛɛ gbɛ nɔ?
4 Eji Nɔdaamɔnɔ Kɛha Kojomɔ: Abaadamɔ sanekpakpa lɛ shiɛmɔ nɔ hu akojo. Bɔfo Paulo tsĩ tã akɛ Kristo Yesu aaatɔ “mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu Kristo sanekpakpa lɛ toi lɛ” anɔ owele. (2 Tes. 1: 8, 9) Abaadamɔ bɔ ni mɛi feɔ amɛnii amɛhaa yɛ sanekpakpa lɛ he lɛ nɔ akojo amɛ. Mɛɛ sɔ̃ ni tsii po enɛ kɛbafɔ̃ɔ Nyɔŋmɔ tsuji lɛ anɔ nɛkɛ! Bɔni afee ni wɔkaye la yi sɔ̃ lɛ, esa akɛ wɔjaje Maŋtsɛyeli shɛɛ sane ni akɛaahere mɛi ayiwala lɛ wɔtsɔɔ.—Bɔf. 20:26, 27.
5. Mɛɛ gbɛ nɔ wɔshiɛmɔ nitsumɔ lɛ haa anaa Nyɔŋmɔ mɔbɔnalɛ lɛ?
5 Mɔdɛŋ ni wɔyaa nɔ wɔbɔɔ koni wɔye wɔbua wɔkutsoŋbii lɛ ní Nyɔŋmɔ akpɛlɛ amɛnɔ lɛ ji Yehowa mɔbɔnalɛ kpojiemɔ. (1 Tim. 2:3, 4) Akɛni wɔle akɛ mɛi ashihilɛ tsakeɔ be fɛɛ be hewɔ lɛ, wɔyaa amɛŋɔɔ yɛ be kɛ beaŋ, ni wɔwoɔ amɛ hewalɛ ni amɛtao Yehowa sɛɛ gbɛ amrɔ nɛɛ ni be yɔɔ lolo lɛ. Wɔtsɔɔ nakai feemɔ nɔ wɔjieɔ “wɔ-Nyɔŋmɔ lɛ mɔbɔnalɛ ní haa emusuŋ tsɔɔ lɛ” lɛ kpo, mɔ ni ‘sumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui’ lɛ.—Luka 1: 78; 2 Pet. 3:9.
6. Yɛ mɛɛ gbɛ nɔ wɔdekã fɛɛ ni wɔkɛtsuɔ Yehowa sɔɔmɔ lɛ yeɔ buaa wɔ?
6 Ehe Baa Sɛɛnamɔ Kɛhaa Wɔ: Wɔdekã fɛɛ ni wɔkɛtsuɔ Yehowa sɔɔmɔ lɛ buɔ wɔhe. Eyeɔ ebuaa wɔ ni ‘wɔkwɛ gbɛ ni wɔshwe Nyɔŋmɔ gbi lɛ baa lɛ,’ ni wɔkaha nibii agbɛjianɔtoo fɔŋ nɛɛ miiwo wɔhe muji. (2 Pet. 3: 11-14; Tito 2: 11, 12) Belɛ eba akɛ ‘wɔbaafi shi ni wɔkagbugbãa, ni wɔteke nɔ yɛ Nuŋtsɔ lɛ nitsumɔ lɛ mli daa nɛɛ,’ ejaakɛ wɔle akɛ mɔdɛŋ ni wɔbɔɔ yɛ Kristofoi asɔɔmɔ nitsumɔ lɛ mli lɛ efeee yaka.—1 Kor. 15:58.