Mɛɛ Gbɛ Nɔ Wɔɔtsɔ Wɔye Wɔbua?
1 Yehowa Odasefoi fɔɔ sane ni ji “Mɛɛ gbɛ nɔ wɔɔtsɔ wɔye wɔbua” lɛ bimɔ kɛ amɛnu akɛ oshara ko eba yɛ je lɛŋ he ko lɛ. Taakɛ sane ni yɔɔ Bɔfoi lɛ Asaji 11:27-30 lɛ tsɔɔ lɛ, Kristofoi ni hi shi yɛ klɛŋklɛŋ afii 100 lɛ mli lɛ ye amɛbua nyɛmimɛi ni yɔɔ Yudea lɛ beni hɔmɔ ko ba jɛmɛ lɛ.
2 Yɛ bei nɛɛ amli lɛ, wɔsafo lɛ mlai eŋmɛ gbɛ ni akɛ shika aye abua mɛi, ní akɛye abua mɛi ni adebɔɔ naa oshara eshara amɛ loo mɛi ni osharai ni jɛ adesai eba amɛnɔ lɛ, kɛ mɛi ní yajeɔ fĩmɔ shihilɛ krokomɛi amli lɛ.
3 Ákɛ nɔkwɛmɔnɔ lɛ, nyɛsɛɛ afi lɛ, nyɛmimɛi babaoo tsu onia kɛye amɛbua mɛi ni ŋshɔŋ shikpɔŋhosomɔ ni ba yɛ Asia Wuoyigbɛ lɛ gbá amɛnaa lɛ. Hiɛ sɔ amɛtsuiiaŋ ni amɛjɛ amɛkɛ shika yawo asafo lɛ fotro mli koni akɛye abua mɛi ni eyaje oshara mli lɛ waa. Shi yɛ maji komɛi amli lɛ, kɛ́ mɔ ko kɛ shika ha koni akɛtsu oshara pɔtɛɛ ko he nii lɛ, mla biɔ ni akɛ shika nɛɛ atsu yiŋtoo pɔtɛɛ ni mɔ ni kɛke lɛ tsɔɔ akɛ akɛtsu he nii lɛ he nii yɛ be pɔtɛɛ ko mli, ekɔɔɔ he eko kɛji akɛ atsu nyɛmimɛi ni yɔɔ he ni oshara lɛ ba yɛ lɛ ahiamɔ nii lɛ ahe nii aha amɛ momo loo atsuko he nii.
4 No hewɔ lɛ, aajie yi ákɛ akɛ shika ni akɛmajeɔ ní akɛye abua mɛi lɛ amaje kɛha jeŋ muu fɛɛ nitsumɔ lɛ tsumɔ. Akɛ shika nɛɛ yeɔ buaa kɛji akɛ naagba ko ba, ni agbɛnɛ hu akɛtsuɔ Kristofoi nyɛmimɛi lɛ amumɔŋ hiamɔ nii ahe nii. Kɛ́ yɛ yiŋtoo ko hewɔ lɛ, mɔ ko miisumɔ ni ekɛ shika amaje ni akɛye abua mɛi, shi jeee ní akɛfĩ jeŋ muu fɛɛ nitsumɔ lɛ sɛɛ lɛ, abaakpɛlɛ nɔ, ni akɛbaatsu nii kɛye abua yɛ he fɛɛ he ni yelikɛbuamɔ he miihia yɛ lɛ. Kɛlɛ, kɛ́ akɛ shikai nɛɛ ha shi atsɔɔɔ oshara pɔtɛɛ kɛ bɔ ni esa akɛ akɛtsu nii aha lɛ, hiɛ baasɔ enɛ waa.
5 Yiŋtoo titrii hewɔ ni wɔtsuɔ oniai wɔwoɔ jeŋ muu fɛɛ nitsumɔ lɛ fotro lɛ mli lɛ ji ni anyɛ aná shika pii ni akɛtsu Maŋtsɛyeli nitsumɔ lɛ fãi lɛ fɛɛ he nii, shi jeee ni ehi wɔfotro lɛ mli ni wɔnyɛɛɛ wɔkɛtsu nii, ákɛ ja oshara ko eba dã. Enɛ kɛ yiŋtoo ni yɔɔ Efesobii 4:16 ni tsɔɔ akɛ wɔkɛ ekomefeemɔ atsu nii ni ‘baaha gbɔmɔtso lɛ ada, ni ema ehe yɛ suɔmɔ mli’ lɛ kpaa gbee.