Bɔ ni Aaafee Akɛ Biblia lɛ Tsɔɔ Wolo lɛ Aha

Gbɛtsɔɔmɔi srɔtoi ni tsɔɔ bɔ ni aaafee akɛ Biblia lɛ Tsɔɔ wolo lɛ aha lɛ yɛ nɔ ni aŋma ahɔ mli nɛɛ mli. Bɔni afee ni shiɛmɔ wiemɔ lɛ amɔ shi jogbaŋŋ lɛ, okɛwo bo diɛŋtsɛ owiemɔ mli, ni oha ekɔ mɛi ni yɔɔ nyɛshikpɔŋkuku lɛ mli lɛ ahe, ni ole saji otii pɔtɛɛ ni yɔɔ wolo lɛ mli ni obaanyɛ okɛ mɛi agba he sane lɛ hu. Obaanyɛ okɛ shiɛmɔ wiemɔi krokomɛi ni baahi kɛha nyɛshikpɔŋkuku lɛ hu atsu nii.—Kwɛmɔ January 2005 Wɔ Maŋtsɛyeli Sɔɔmɔ lɛ, bf. 8.

Biblia

◼ “Bei pii lɛ mɛi wieɔ Biblia lɛ he akɛ eji Nyɔŋmɔ Wiemɔ. Ani osusu nɔ hewɔ ni esa jogbaŋŋ akɛ atsɛ́ɔ wolo ni adesai ŋma lɛ akɛ Nyɔŋmɔ Wiemɔ lɛ he pɛŋ? [Ŋmɛɛ gbɛ ni eha hetoo. No sɛɛ lɛ kanemɔ 2 Petro 1:21, kɛ kuku 5 ni yɔɔ baafa 19-20 lɛ.] Wolo nɛɛ kɛ sanebimɔi nɛɛ ahetooi ni damɔ Biblia lɛ nɔ lɛ haa.” Okɛ sanebimɔi ni yɔɔ baafa 6 lɛ atsɔɔ lɛ.

◼ “Gbii etɛ nɛɛ, mɛi anine nyɛɔ eshɛɔ saji babaoo anɔ fe tsutsu ko. Shi nɛgbɛ osusuɔ akɛ wɔbaanyɛ wɔná ŋaawoo kpakpa ni baanyɛ aye abua wɔ ni wɔná shihilɛ kpakpa ni yɔɔ miishɛɛ lɛ kɛjɛ? [Ŋmɛɛ gbɛ ni eha hetoo. No sɛɛ lɛ kanemɔ 2 Timoteo 3:16, 17, kɛ kuku 12 ni yɔɔ baafa 23 lɛ.] Wolo nɛɛ tsɔɔ gbɛ nɔ ni wɔbaanyɛ wɔtsɔ wɔhi shi bɔ ni he baaba sɛɛnamɔ kɛha wɔ ní wɔsa Nyɔŋmɔ hiɛ lɛ mli.” Okɛ akrabatsa kɛ mfoniri ni yɔɔ baafa 122-123 lɛ atsɔɔ lɛ.

Gbele kɛ Gbohiiashitee

◼ “Mɛi babaoo susuɔ nɔ ni baa mɔ nɔ diɛŋtsɛ yɛ gbele mli lɛ he. Ani osusuɔ akɛ wɔbaanyɛ wɔle? [Ŋmɛɛ gbɛ ni eha hetoo. No sɛɛ lɛ kanemɔ Jajelɔ 9:5, kɛ kuku 5-6 ni yɔɔ baafa 58-59 lɛ.] Wolo nɛɛ tsɔɔ bɔ ni mɛi ni egboi lɛ baaná gbohiiashitee he shiwoo ni yɔɔ Biblia lɛ mli lɛ he sɛɛ lɛ hu mli.” Okɛ mfoniri ni yɔɔ baafa 75 lɛ atsɔɔ lɛ.

◼ “Kɛ́ mɔ ko ni wɔsumɔɔ lɛ lɛ gbo lɛ, eji adebɔɔ naa su akɛ wɔsumɔɔ ni wɔna nakai mɔ lɛ ekoŋŋ. Ani okpɛlɛɛɛ nɔ nakai? [Ŋmɛɛ gbɛ ni eha hetoo.] Gbohiiashitee he shiwoo ni yɔɔ Biblia lɛ mli lɛ eshɛje mɛi babaoo amii. [Kanemɔ Yohane 5:28, 29, kɛ kuku 16-17 ni yɔɔ baafa 72 lɛ.] Yitso nɛɛ hu haa sanebimɔi nɛɛ ahetoo.” Okɛ sanebimɔi ni kpaa yitso lɛ hiɛ ni yɔɔ baafa 66 lɛ atsɔɔ lɛ.

Harmagedon

◼ “Kɛ́ wiemɔ ni ji ‘Harmagedon’ lɛ gbɛɛ yɛ mɛi atoiiaŋ lɛ, nɔ ni baa mɛi pii ajwɛŋmɔ mli ji mɛi babaoo ahiɛkpatamɔ. Ani ohiɛ baafee bo yaa kɛ́ ona ole akɛ Harmagedon ji nɔ ko diɛŋtsɛ ni esa akɛ akpa gbɛ lɛ? [Ŋmɛɛ gbɛ ni eha hetoo. No sɛɛ lɛ kanemɔ Kpojiemɔ 16:14, 16.] Kadimɔ wiemɔi nɛɛ ni tsɔɔ bɔ ni shihilɛ baatamɔ eha yɛ Harmagedon sɛɛ lɛ.” Gbelemɔ baafa 82-84, ni okane kuku 21 lɛ.

Jamɔ

◼ “Mɛi babaoo miiná susumɔ akɛ je lɛŋ jamɔi lɛ ji nɔ ni kɛ adesai anaagbai baa shi jeee nɔ ni kɛ naagbai lɛ anaa tsabaa baa. Ani osusuɔ akɛ jamɔ kɛ gbɛtsɔɔmɔ kpakpa miiha adesai? [Ŋmɛɛ gbɛ ni eha hetoo. No sɛɛ lɛ kanemɔ Mateo 7:13, 14, kɛ kuku 5 ni yɔɔ baafa 146 lɛ.] Yitso nɛɛ pɛiɔ kadimɔ nibii ekpaa ni akɛyɔseɔ jamɔ ni Nyɔŋmɔ kpɛlɛɔ nɔ lɛ mli.” Okɛ kadimɔ nibii ni yɔɔ baafa 147 lɛ atsɔɔ lɛ.

Naanɔ Wala

◼ “Mɛi pii sumɔɔ ni amɛná gbɔmɔtsoŋ hewalɛ kpakpa ní amɛhi shi be kakadaŋŋ yɛ shihilɛ mli hu. Shi eji obaanyɛ ohi shi kɛya naanɔ kulɛ, ani obaasumɔ? [Ŋmɛɛ gbɛ ni eha hetoo. No sɛɛ lɛ kanemɔ Kpojiemɔ 21:3, 4, kɛ kuku 17 ni yɔɔ baafa 53-54 lɛ.] Wolo nɛɛ tsɔɔ bɔ ni wɔbaafee wɔná naanɔ wala kɛ bɔ ni shihilɛ baatamɔ eha kɛ́ nakai shiwoo lɛ ba mli lɛ mli.”

Oshara kɛ Piŋmɔ

◼ “Kɛ́ oshara ko ba lɛ, mɛi babaoo ayiŋ feɔ amɛ kɔshikɔshi kɛji Nyɔŋmɔ susuɔ adesai ahe lɛɛlɛŋ ni enaa amɛpiŋmɔi lɛ. Ani osusu enɛ he pɛŋ? [Ŋmɛɛ gbɛ ni eha hetoo. No sɛɛ lɛ kanemɔ 1 Petro 5:7, kɛ kuku 11 ni yɔɔ baafa 11 lɛ.] Wolo nɛɛ tsɔɔ gbɛ nɔ ni Nyɔŋmɔ baatsɔ ejie adesai apiŋmɔi kɛya kwraa lɛ mli.” Okɛ sanebimɔi ni kpaa hiɛ yɛ baafa 106 lɛ atsɔɔ lɛ.

Sɔlemɔ

◼ “Ani osusu gbɛ nɔ ni Nyɔŋmɔ tsɔɔ ehaa sɔlemɔi ahetoo lɛ he pɛŋ? [Ŋmɛɛ gbɛ ni eha hetoo. No sɛɛ lɛ kanemɔ 1 Yohane 5:14, 15, kɛ kuku 16-18 ni yɔɔ baafa 170-172 lɛ.] Yitso nɛɛ hu tsɔɔ nɔ hewɔ ni esa akɛ wɔsɔle wɔha Nyɔŋmɔ kɛ nɔ ni esa akɛ wɔfee bɔni afee ni ebo wɔ toi.”

Ta kɛ Toiŋjɔlɛ

◼ “Gbɔmɛi ni yɔɔ he fɛɛ he lɛ miishwe ni amɛná toiŋjɔlɛ. Ani osusuɔ akɛ hiɛnɔkamɔ ni ayɔɔ akɛ toiŋjɔlɛ baaba shikpɔŋ lɛ nɔ lɛ ji lamɔ ko kɛkɛ? [Ŋmɛɛ gbɛ ni eha hetoo. No sɛɛ lɛ kanemɔ Lala 46:9, 10.] Wolo nɛɛ tsɔɔ bɔ ni Nyɔŋmɔ baaha eyiŋtoo lɛ aba mli ní ekɛ toiŋjɔlɛ aba je lɛŋ he fɛɛ he lɛ mli.” Okɛ mfoniri ni yɔɔ baafa 35 lɛ atsɔɔ lɛ, ni okɛ lɛ asusu kuku 17-21 ni yɔɔ baafa 34-36 lɛ he.

Weku

◼ “Wɔ fɛɛ wɔsumɔɔ ni wɔná weku shihilɛ ni yɔɔ miishɛɛ. Ani okpɛlɛɛɛ nɔ nakai? [Ŋmɛɛ gbɛ ni eha hetoo.] Biblia lɛ wieɔ nɔ ko ni weku lɛ mli bii lɛ fɛɛ baanyɛ afee koni akɛha weku lɛ aná miishɛɛ lɛ he—ni no ji ní akase Nyɔŋmɔ yɛ suɔmɔ kpojiemɔ mli.” Kanemɔ Efesobii 5:1, 2, kɛ kuku 4 ni yɔɔ baafa 135 lɛ.

Wɔɔhe

◼ “Yɛ hei babaoo lɛ, shihilɛhe ni sa ní jara waaa tsɔ̃ lɛ taomɔ ebafee nɔ ni wa waa diɛŋtsɛ. Ani osusuɔ akɛ gbi ko baaba ni mɔ fɛɛ mɔ baaná wɔɔhe ni hi bɔ ni sa? [Ŋmɛɛ gbɛ ni eha hetoo. No sɛɛ lɛ kanemɔ Yesaia 65:21, 22, kɛ kuku 20 ni yɔɔ baafa 34 lɛ.] Wolo nɛɛ tsɔɔ bɔ ni Nyɔŋmɔ shiwoo nɛɛ baaba mli eha lɛ mli.”

Yehowa Nyɔŋmɔ

◼ “Mɛi pii ni heɔ Nyɔŋmɔ nɔ amɛyeɔ lɛ baasumɔ ni amɛbɛŋkɛ lɛ. Ani ole akɛ Biblia lɛ fɔ̃ɔ wɔ nine ni wɔtsi wɔbɛŋkɛ Nyɔŋmɔ? [Ŋmɛɛ gbɛ ni eha hetoo. No sɛɛ lɛ kanemɔ Yakobo 4:8a, kɛ kuku 20 ni yɔɔ baafa 16 lɛ.] Ato wolo nɛɛ he gbɛjianɔ koni eye ebua mɛi ni amɛkɛ amɛ diɛŋtsɛ amɛ-Biblia lɛ atsu nii kɛkase Nyɔŋmɔ he nii babaoo.” Okɛ sanebimɔi ni kpaa yitso lɛ hiɛ yɛ baafa 8 lɛ atsɔɔ lɛ.

◼ “Mɛi babaoo sɔleɔ ni Nyɔŋmɔ gbɛi lɛ he atse loo afee lɛ krɔŋkrɔŋ. Ani ole nakai gbɛi lɛ? [Ŋmɛɛ gbɛ ni eha hetoo. No sɛɛ lɛ kanemɔ Lala 83:19, kɛ kuku 2-3 ni yɔɔ baafa 195 lɛ.] Wolo nɛɛ gbálaa nɔ ni Biblia lɛ tsɔɔ diɛŋtsɛ yɛ Yehowa Nyɔŋmɔ kɛ yiŋtoo ni eyɔɔ kɛha adesai lɛ he lɛ mli.”

Yesu Kristo

◼ “Mɛi ni yɔɔ je lɛŋ fɛɛ lɛ enu Yesu Kristo he sane. Mɛi komɛi kɛɔ akɛ eji nuu ko ni yɔɔ srɔto kɛkɛ. Mɛi krokomɛi hu jáa lɛ akɛ Nyɔŋmɔ Ofe. Ani osusuɔ akɛ nɔ ni wɔheɔ wɔyeɔ yɛ Yesu Kristo he lɛ he miihia?” Ŋmɛɛ gbɛ ni eha hetoo. No sɛɛ lɛ kanemɔ Yohane 17:3, kɛ kuku 3 ni yɔɔ baafa 37-38 lɛ. Gbalamɔ ejwɛŋmɔ kɛya sanebimɔi ni kpáa hiɛ ni yɔɔ yitso lɛ shishi lɛ nɔ.

[Caption on page 5]

Gbɛ̀i Anɔ ní Oootsɔ Otsĩ Oniatsumɔ He Gbɛjianɔtoo lɛ Tã

“Kɛ́ obaasumɔ ni otsu onia fioo ŋmɛnɛ kɛfĩ wɔjeŋ muu fɛɛ nitsumɔ lɛ sɛɛ lɛ, mikɛ miishɛɛ baakpɛlɛ nɔ.”

“Eyɛ mli akɛ ahɔ̃ɔɔ wɔwoji lɛ moŋ, shi wɔkpɛlɛɔ onia fioo ni atsuɔ kɛfĩɔ wɔjeŋ muu fɛɛ nitsumɔ lɛ sɛɛ lɛ nɔ.”

“Ekolɛ obaasusu bɔ ni feɔ ni wɔnyɛɔ wɔtsuɔ nitsumɔ nɛɛ lɛ he. Nɔ hewɔ ni wɔnyɛɔ wɔtsuɔ ji akɛ, oniai ni ajɛɔ suɔmɔ mli atsuɔ lɛ ji nɔ ni akɛfĩɔ wɔjeŋ muu fɛɛ nitsumɔ lɛ sɛɛ. Kɛ́ oosumɔ akɛ otsu onia fioo ŋmɛnɛ lɛ, maná he miishɛɛ akɛ makpɛlɛ nɔ.”