Ani Obiɔ ni Atsĩ Mɛi Krokomɛi Atã Atsɔɔ Bo?
Kɛ oofee Biblia mli nikasemɔ amrɔ nɛɛ, mɛni hewɔ obiii nikaselɔ lɛ kɛji enanemɛi, ewekumɛi, loo mɛi ni ele amɛ lɛ ateŋ mɔ ko hu baasumɔ ni akɛ lɛ akase nɔ ni Biblia lɛ tsɔɔ lɛ he nii? Bei pii lɛ, atsĩɔ mɛi srɔtoi babaoo agbɛi atã atsɔɔ. Kɛ nikaselɔ lɛ baaŋmɛ bo gbɛ lɛ, obaanyɛ otsɛ́ egbɛi otsɔɔ nakai mɛi lɛ yɛ be mli ni otee amɛŋɔɔ ni okɛ amɛ ayafee Biblia mli nikasemɔ lɛ. Obaanyɛ okɛɛ akɛ, “[Nikaselɔ lɛ gbɛi] ená Biblia lɛ kasemɔ he miishɛɛ, ni esusuɔ akɛ ekolɛ bo hu ooosumɔ ni oná wɔ-Biblia kasemɔ he gbɛjianɔtoo ni aheee nɔ ko yɛ he lɛ he sɛɛ.” No sɛɛ lɛ, okɛ Biblia lɛ Tsɔɔ wolo lɛ afee bɔ ni afeɔ nikasemɔ lɛ ahaa lɛ he nɔkwɛmɔnɔ kuku otsɔɔ lɛ.
Kɛ oyɛ nikaselɔ ko ni miiya ehiɛ jogbaŋŋ lɛ, obaanyɛ owo lɛ hewalɛ koni egbála nikasemɔ he gbɛjianɔtoo lɛ mli etsɔɔ enanemɛi kɛ eweku mli bii ni ekolɛ amɛbaaná he miishɛɛ lɛ. Ebaanyɛ efɔ̃ amɛ nine koni amɛbafata ehe beni akɛ lɛ kaseɔ nii lɛ. Aloo kɛ́ no ehiii feemɔ lɛ, ebaanyɛ eto gbɛjianɔ koni okɛ amɛ akpe ní ofee nikasemɔ he gbɛjianɔtoo lɛ he nɔkwɛmɔnɔ otsɔɔ amɛ. Enɛ feemɔ baawo nikaselɔ lɛ hewalɛ koni eje shishi egba Biblia mli nilee ni ená lɛ he sane etsɔɔ mɛi krokomɛi.
Mɛi ni okuɔ osɛɛ oyasaraa amɛ daa lɛ hu baanyɛ atsĩ mɛi krokomɛi atã atsɔɔ bo, kɛ́ amɛ diɛŋtsɛ po lɛ, amɛkpɛlɛko nɔ akɛ okɛ amɛ afee Biblia mli nikasemɔ daa. Kɛ oha amɛ Biblia lɛ Tsɔɔ wolo lɛ eko lɛ, obaanyɛ obi kɛkɛ akɛ, “Ani ole mɔ kroko hu ni baasumɔ ni enine ashɛ wolo nɛɛ eko nɔ?”
Akɛni bei ni wɔyɔɔ mli nɛɛ faaa dɔŋŋ hewɔ lɛ, wɔmiisumɔ ni wɔtsɔ gbɛ fɛɛ gbɛ ni baahi nɔ wɔye wɔbua mɛi koni amɛnu sanekpakpa lɛ ni amɛkpɛlɛ nɔ. Ani obiɔ ni atsĩ mɛi krokomɛi atã atsɔɔ bo?