Fó Mɛi Krokomɛi Anɔ̃ Mli—Kɛtsɔ Mlijɔlɛ Kpojiemɔ Nɔ
1 “Yehowa mli jɔ.” (Lala 145:8, NW) Eyɛ mli akɛ eji Jeŋ Muu Fɛɛ Maŋtsɛ moŋ, shi emli hi, esusuɔ mɔ he, ni ejieɔ bulɛ kpo etsɔɔ adesai ni yeee emuu lɛ. (1 Mose 13:14; 19:18-21, 29) Wɔbaanyɛ wɔha gbɛ ni wɔtsɔɔ nɔ wɔkɛ sanekpakpa lɛ haa lɛ aya hiɛ kɛtsɔ wɔ-Nyɔŋmɔ ni mli jɔ lɛ kasemɔ nɔ. (Kol. 4:6) Enɛ biɔ babaoo fe wɔhiɛ ni wɔɔtse wɔha mɛi, ní wɔkɛ amɛ awie yɛ bulɛ mli pɛ kɛkɛ.
2 Yɛ Shinaai Anaa: Kɛ́ wɔyasara shiatsɛ lɛ yɛ be ni ehiii kɛhaaa lɛ lɛ mli loo be mli ni ebɛ dekã kwraa bɔ ni ekɛ wɔ aaawie hu? Ebaahi jogbaŋŋ akɛ wɔɔkpɛlɛ shihilɛi ni tamɔ nɛkɛ lɛ anɔ kɛtsɔ wɔshiɛmɔ wiemɔ lɛ ni wɔɔha efee kuku kwraa loo ni wɔɔkɛɛ lɛ akɛ wɔbaaba be kroko lɛ nɔ. Wɔnyɛ̃ɛɛ mɛi anɔ doo akɛ amɛhé woji lɛ kɛ́ amɛsumɔɔɔ ni amɛfeɔ nakai, ni wɔkɛ mlihilɛ feɔ enɛ. Mɛi krokomɛi ahesusumɔ hu baatsirɛ wɔ koni wɔjie bulɛ kpo wɔtsɔɔ amɛnibii, tamɔ amɛshiai anaa agbói kɛ amɛtsũi anaa shinaai ni wɔɔŋamɔ kɛ agbɛnɛ hu ni wɔtsɔse wɔbii lɛ ni amɛfee nakai nɔŋŋ. Esa akɛ wɔkwɛ koni mɛi krokomɛi akana wolo fɛɛ wolo ni wɔshiɔ yɛ mɛi ni bɛ shĩai amli lɛ ashinaai anaa lɛ. Lɛɛlɛŋ, mlijɔlɛ baatsirɛ wɔ koni nɔ ni wɔbaasumɔ ni mɛi krokomɛi afee aha wɔ lɛ, wɔ hu wɔfee nakai nɔŋŋ wɔha amɛ.—Luka 6:31.
3 Yɛ Gbɛjegbɛ nɔ Nitsumɔ Mli: Yɛ be mli ni wɔkɛ wɔhe woɔ gbɛjegbɛ nɔ nitsumɔ mli lɛ, wɔbaanyɛ wɔjie bulɛ kpo kɛtsɔ gbɛ ni mɛi pii tsɔɔ nɔ kɛhoɔ lɛ anɔ ní wɔdamɔŋ kɛtsiŋ mɛi agbɛ lɛ nɔ, kɛ agbɛnɛ hu kɛtsɔ wɔhe naa ní wɔbuaŋ yɛ mɛi ashwapoi ahiɛ lɛ nɔ. Wɔbaaha wɔhiɛ ahi mɛi krokomɛi ashihilɛi anɔ waa, ni wɔtao akɛ wɔkɛ mɛi ni ekolɛ amɛbaaná minitii fioo amɛha wɔ lɛ awie moŋ fe nɔ ni wɔkɛ mɛi ni ekã shi faŋŋ akɛ amɛmiiye oyai waa lɛ aaawie. Yɛ bei komɛi amli lɛ, ekolɛ ehe baahia ni wɔwie waa koni anu nɔ ni wɔwieɔ lɛ yɛ gbɛjegbɛ ni nɔ efee hoo lɛ hewɔ. Ni kɛlɛ, esa akɛ wɔkɛ woo afee nakai, ní wɔkagbala mɛi ajwɛŋmɔ kɛmiiba wɔnɔ.—Mat. 12:19.
4 Kɛ́ Aaye Odase yɛ Tɛlifoŋ Nɔ: Mɛi krokomɛi ahesusumɔ baatsirɛ wɔ koni wɔdamɔ he ko ni hoofeemɔ bɛ jɛmɛ tsɔ kɛ́ wɔmiiye tɛlifoŋ nɔ odase lɛ. Wɔjieɔ subaŋ kpakpa kpo kɛ́ wɔha ale mɛi ni wɔji amrɔ nɔŋŋ, ni wɔtsɔɔ nɔ hewɔ ni wɔtswaa amɛ tɛlifoŋ lɛ. Kɛ wɔwie wɔwo tɛlifoŋ lɛ mli tɛ̃ɛ ni wɔtee nɔ wɔkɛ miishɛɛ gbee wie lɛ, ebaaye ebua ni eha mɛi krokomɛi kɛ amɛhe awo Ŋmalɛ mli sanegbaa ni tswaa mɔ emaa shi lɛ mli. (1 Kor. 14:8, 9) Kɛ wɔkɛ mlihilɛ, mɔ hesusumɔ kɛ bulɛ tsu nii yɛ gbɛ̀i srɔtoi ni tamɔ enɛɛmɛi anɔ lɛ, wɔkaseɔ Yehowa ni ji wɔ-Nyɔŋmɔ ní mli jɔ lɛ.