Wɔshiɛmɔ Nitsumɔ Lɛ—Etsɔɔ Musuŋtsɔlɛ ní Wɔyɔɔ
1 Yesu na akɛ “etɔ” asafo babaoo ni boɔ eshɛɛ sane lɛ toi lɛ “ni amɛfee yuyaa tamɔ tooi ni bɛ kwɛlɔ.” (Mat. 9:36) Enɛ ha ejɛ mlihilɛ kɛ suɔmɔ mli etsɔɔ amɛ Yehowa gbɛ̀i lɛ, eshɛje amɛmii, ni ekɛ musuŋtsɔlɛ tsu amɛmumɔŋ hiamɔ nii lɛ ahe nii. Kɛ́ wɔjwɛŋ gbɛ̀i anɔ ni Yesu feɔ nii ehaa lɛ anɔ lɛ, no baaha wɔsusu nii ahe ni wɔfee wɔnii tamɔ lɛ, kɛkɛ lɛ musuŋtsɔlɛ ni wɔyɔɔ lɛ baaje kpo faŋŋ yɛ wɔshiɛmɔ nitsumɔ lɛ mli.
2 Susumɔ bɔ ni Yesu fee enii eha beni mɛi komɛi ni yelikɛbuamɔ he hiaa amɛ waa lɛ tsi amɛbɛŋkɛ lɛ lɛ he okwɛ. (Luka 5:12, 13; 8:43-48) Enu he eha mɛi ni yelikɛbuamɔ pɔtɛɛ komɛi he hiaa amɛ lɛ. (Mar. 7:31-35) Ele bɔ ni mɛi nuɔ nii ahe amɛhaa, ni ekuuu ehiɛ eshwieee amɛnɔ. Bɔ ni anaa mɛi ahaa yɛ kponɔgbɛ lɛ náaa enɔ hewalɛ. (Luka 7:36-40) Yɛ anɔkwale mli lɛ, bɔ ni Nyɔŋmɔ musuŋ tsɔɔ lɛ lɛ, nakai nɔŋŋ Yesu hu musuŋ tsɔɔ lɛ.
3 “Emusuŋ Tsɔ Lɛ”: Jeee akɛni eji sɔ̃ ni kã Yesu nɔ akɛ etsu shiɛmɔ nitsumɔ lɛ hewɔ efee nakai, shi moŋ efee nakai hu akɛni “emusuŋ tsɔ lɛ” yɛ gbɔmɛi lɛ ahewɔ. (Mar. 6:34) Nakai nɔŋŋ ŋmɛnɛ lɛ, jeee shɛɛ sane kɛkɛ wɔjajeɔ, shi moŋ wɔmiibɔ mɔdɛŋ koni wɔha mɛi ayi aná wala. No hewɔ lɛ, bɔɔ mɔdɛŋ ni otao nɔ̃ hewɔ ni mɛi náaa shɛɛ sane lɛ he miishɛɛ lɛ mli. Mɛni hewɔ ni amɛfee yeyeeye loo amɛha nibii krokomɛi ehé amɛjwɛŋmɔ lɛ? Ani apasa jamɔŋ hiɛnyiɛlɔi elaka amɛ ni amɛkpoo amɛ? Kɛ́ wɔha mɛi na akɛ wɔyɛ amɛhe miishɛɛ diɛŋtsɛ lɛ, ekolɛ no baakanya koni amɛbo sanekpakpa lɛ toi.—2 Kor. 6:4, 6.
4 Kɛ́ mɔ jie musuŋtsɔlɛ kpo lɛ etaa mɛi atsuiŋ. Ákɛ nɔkwɛmɔnɔ lɛ: Gbekɛyoo abifao ko ni eye nyɔji etɛ lɛ gbo eshi enyɛ mɔbɔmɔbɔ. Be ko ni Odasefoi enyɔ komɛi yatswa eshinaa lɛ, eha amɛ sɛi kɛ jwɛŋmɔ akɛ ebaaha amɛna akɛ yiŋtoo ni amɛtsɔɔ akɛ no hewɔ ni Nyɔŋmɔ eŋmɛ amanehulu gbɛ lɛ ejaaa. Shi sɛɛ mli lɛ, yoo lɛ wie akɛ: “Amɛjɛ musuŋtsɔlɛ babaoo mli amɛbo mi toi, ni beni amɛshɛ mi akɛ amɛmiiya lɛ no mli lɛ mimii eshɛ mihe saŋŋ, no hewɔ lɛ mikɛ amɛba gbeekpãmɔ koni amɛbasara mi ekoŋŋ.” Ani obɔɔ mɔdɛŋ koni ojie musuŋtsɔlɛ kpo atsɔɔ mɛi fɛɛ ni okɛkpeɔ yɛ shiɛmɔ nitsumɔ lɛ mli?
5 Kɛ́ wɔmusuŋ tsɔɔ wɔ lɛ, no baaye abua wɔ koni wɔshɛje mɛi amii diɛŋtsɛ. Wɔtsɔɔ nakai feemɔ nɔ wɔwoɔ Yehowa ni ji “musuŋtsɔlɛi atsɛ” lɛ hiɛ nyam.—2 Kor. 1:3.