Gbi Kome Kpee Krɛdɛɛ He Gbɛjianɔtoo Hee

Yɛ mumɔ krɔŋkrɔŋ lɛ kanyamɔ naa lɛ, mra be mli Kristofoi lɛ kɛ ekãa jaje sanekpakpa lɛ yɛ hei fɛɛ ni amɛaanyɛ. (Bɔf. 1:8; Kol. 1:23) Gbi Kome Kpee Krɛdɛɛ He gbɛjianɔtoo kɛha afi 2007 sɔɔmɔ afi ni saneyitso ji ‘Okɛ Ohe Awo Wiemɔ lɛ Jajemɔ Mli Vii’ lɛ baaye ebua wɔ ni wɔkase amɛnɔkwɛmɔnɔ ni nɔ bɛ nɛɛ.—Bɔf. 18:5.

Beni Maŋtsɛ David wieɔ Nyɔŋmɔ wiemɔ lɛ he lɛ, ekɛɛ akɛ: “Yehowa odase [loo kaimɔ] lɛ ma shi shiŋŋ, ehaa kwashia leɔ nii.” (Lala 19:8) Ato gbi kome kpee krɛdɛɛ kɛha afi 2007 lɛ he gbɛjianɔ jogbaŋŋ koni ema sɛɛnamɔ ni yɔɔ Ŋmalɛi lɛ ni akɛaatsu nii ‘kɛsaa mɔ’ lɛ he nɔ mi, ni ebaawo wɔ hewalɛ hu koni wɔkɛ Nyɔŋmɔ Wiemɔ lɛ atsu nii kɛshiɛ ni wɔkɛtsɔɔ nii, ni wɔkɛ oyaiyeli afee enɛ. (2 Tim. 3:16, 17) Kpee nɛɛ baatsɔɔ bɔ ni wɔɔfee wɔjo osharai anaa foi kɛ bɔ ni Biblia mli shishitoo mlai ni wɔkɛaatsu nii yɛ wɔdaa gbi shihilɛ mli lɛ he baaba sɛɛnamɔ kɛha wɔ. Ebaaye ebua wɔ hu ni wɔkɛ Nyɔŋmɔ Wiemɔ lɛ atsu nii kɛye wɔbua oblahii kɛ oblayei kɛ mɛi ni kɛ asafo lɛ bɔi bɔɔ etsɛko lɛ koni amɛya amɛhiɛ yɛ Nyɔŋmɔjamɔ nifeemɔi amli.

Tswaa ofai shi akɛ obaahi kpee lɛ shishi beni gbɛjianɔtoo lɛ jeɔ shishi lɛ, ni obo toi jogbaŋŋ. Ŋmalamɔ saji otii ni obaanyɛ okɛtsu nii yɛ oshihilɛ mli. Okɛ miishɛɛ abo gbɛtsɔɔmɔi kɛ kaimɔi ni akɛaaha yɛ kpee lɛ shishi lɛ toi, ni ojwɛŋ bɔ ni ooofee okɛ nibii ni oookase yɛ jɛmɛ lɛ baatsu nii lɛ nɔ.

Gbi kome kpee krɛdɛɛ nɛɛ baaha hiɛsɔɔ ni wɔyɔɔ kɛha Nyɔŋmɔ Wiemɔ lɛ aya hiɛ, ebaakai wɔ ni wɔya nɔ wɔfi shi ni wɔkɛ ekãa ashiɛ Maŋtsɛyeli lɛ he sanekpakpa lɛ, ni ebaatsɔɔ wɔ bɔ ni wɔɔfee wɔye wɔbua mɛi krokomɛi koni amɛ hu amɛfee nakai nɔŋŋ. No hewɔ lɛ ŋmɔɔ oyiŋ kpɔ akɛ ohaŋ gbɛtsɔɔmɔi kɛ famɔi ni tswaa mɔ kɛ Nyɔŋmɔ teŋ wekukpaa emaa shi ni Yehowa kɛhaa yɛ nɛkɛ gbɛ nɔ lɛ eko aŋmɛɛ bo kɔkɔɔkɔ!—Yes. 30:20b, 21.