Odaseyeli yɛ Shĩa kɛ Shĩa
1. Mɛɛ saji abiɔ yɛ shĩa kɛ shĩa shiɛmɔ nitsumɔ lɛ he, ni mɛni hewɔ?
1 Beni Zion’s Watch Tower ni je kpo yɛ July 1, afi 1893 lɛ maa sɛɛnamɔ ni yɔɔ shĩa kɛ shĩa shiɛmɔ lɛ he lɛ nɔ mi lɛ, ekɛɛ akɛ: “Mɛi ni he ekwakwao yɛ gbɛ̀i srɔtoi anɔ ni atsɔɔ ahaa mɛi leɔ Anɔkwale lɛ baakpɛlɛ nɔ akɛ MILLENNIAL DAWN wolo ni afã nɔ ta kɛtsɔ shĩa kɛ shĩa shiɛmɔ nitsumɔ lɛ nɔ lɛ ji gbɛ ni mɔɔ shi fe fɛɛ ni atsɔɔ nɔ akɛ Anɔkwale lɛ haa yɛ bei nɛɛ amli.” Shĩa kɛ shĩa shiɛmɔ nitsumɔ lɛ ji nifeemɔ ko ni akɛkadiɔ Yehowa Odasefoi yɛ jeŋ fɛɛ. Akɛni yɛ maji komɛi anɔ lɛ, ewa waa akɛ aaana mɛi yɛ amɛshĩai amli hewɔ lɛ, ani abaanyɛ akɛɛ akɛ shĩa kɛ shĩa shiɛmɔ lɛ kã he emɔɔ shi?
2. Mɛɛ Ŋmalɛi fiɔ shĩa kɛ shĩa odaseyeli lɛ sɛɛ?
2 Ŋmalɛi Fiɔ Sɛɛ ni Ehe Miihia: Ŋmalɛi fiɔ shĩa kɛ shĩa odaseyeli lɛ sɛɛ. Yesu fã kaselɔi 70 ní etsu amɛ enyɔnyɔɔnyɔ lɛ akɛ amɛya mɛi ashĩai amli. (Luka 10:5-7) Beni Biblia lɛ wieɔ Yesu kaselɔi lɛ ahe yɛ egbele sɛɛ etsɛɛɛ lɛ, ekɛɛ akɛ: “Amɛfɔ̃ɔɔ nitsɔɔmɔ kɛ . . . shiɛmɔ yɛ sɔlemɔwe lɛ kɛ shĩai be fɛɛ be.” (Bɔf. 5:42) Bɔfo Paulo hu kɛ ekãa tsɔɔ mɛi anii yɛ shĩa kɛ shĩa.—Bɔf. 20:20.
3. Mɛni ji sɛɛnamɔi komɛi ni yɔɔ shĩa kɛ shĩa odaseyeli lɛ he?
3 Odaseyeli yɛ shĩa kɛ shĩa lɛ kã he efata gbɛ̀i ni he hiaa ni atsɔɔ nɔ agbɛɔ sanekpakpa lɛ ashwãa ŋmɛnɛ lɛ ahe. Eyeɔ ebuaa wɔ ni wɔtoɔ naa ‘kɛtaoɔ’ mɛi ni sa lɛ yɛ gbɛjianɔtoo naa. (Mat. 10:11) Bei pii kɛ́ mɛi yɛ shĩa lɛ, amɛhe jɔɔ amɛ babaoo. No hewɔ lɛ, kɛ́ wɔkɛ amɛ miiwie hiɛ kɛ hiɛ—wɔmiinu amɛgbee, wɔmiina bɔ ni amɛfeɔ amɛhiɛ, kɛ bɔ ni shĩa lɛ shikamɔ yɔɔ—lɛ no haa wɔnaa nibii ni amɛnáa he miishɛɛ kɛ nibii ni gbaa amɛnaa. Bei pii lɛ, nibii tamɔ enɛɛmɛi haa wɔnáa hegbɛ wɔkɛ amɛ gbaa sane be kakadaŋŋ.
4. Mɛɛ gbɛ nɔ wɔɔtsɔ wɔha shĩa kɛ shĩa shiɛmɔ lɛ awo yibii babaoo?
4 Feemɔ Tsakemɔi yɛ Oshihilɛ Mli: Bɔfo Paulo kɛ miishɛɛ fee tsakemɔi yɛ eshihilɛ mli yɛ “sanekpakpa lɛ hewɔ.” (1 Kor. 9:23) Ekolɛ, wɔbaanyɛ wɔfee tsakemɔi yɛ wɔgbɛjianɔtoo mli bɔni afee ni wɔnyɛ wɔkɛ wɔhe awo shiɛmɔ nitsumɔ lɛ mli yɛ be ni mɛi yɔɔ shĩa, tamɔ gbɛkɛnaashi, otsii lɛ anaagbee, loo yɛ hejɔɔmɔ gbii anɔ. Kɛ́ obote shĩai ko mli ni onaaa mɔ ni yɔɔ jɛi lɛ, ŋmaa ofɔ̃ shi koni oya jɛi ekoŋŋ yɛ gbi kroko yɛ otsi lɛ mli aloo yɛ be kroko mli yɛ nakai gbi lɛ nɔ nɔŋŋ.
5. Mɛɛ gbɛ nɔ wɔɔtsɔ wɔha mɛi ni bɛ gbɔmɔtsoŋ hewalɛ tsɔ lɛ aná gbɛfaŋnɔ yɛ shĩa kɛ shĩa nitsumɔ lɛ mli?
5 Mɛi po ni bɛ gbɔmɔtsoŋ hewalɛ tsɔ lɛ baanyɛ amɛkɛ amɛhe awo shĩa kɛ shĩa shiɛmɔ lɛ mli. Wɔbaanyɛ wɔto gbɛjianɔ koni wɔkɛ mɛi ni tamɔ nakai lɛ afata wɔhe kɛtsu nii yɛ shĩai ni amɛmlibotemɔ bɛ shilɔgɔmɔ amli, koni wɔŋmɛ amɛgbɛ ni amɛtsu nii lɛ yɛ gbɛ ni baaha amɛmii ashɛ amɛhe nɔ. Akɛni nyɛmiyoo ko nyɛɛɛ emu jogbaŋŋ hewɔ lɛ, kɛ́ ekɛ mɔ ko gba sane yɛ shĩa kome mli lɛ, ja eyajɔɔ ehe ŋmɛlɛtswaa fã dani enyɛɔ eyaa shĩa kroko mli. Kɛlɛ, emii shɛ ehe ni etsui hu nyɔ emli jogbaŋŋ akɛ efata kuu lɛ he kɛshiɛ!
6. Mɛni hewɔ esa akɛ wɔkɛ shĩa kɛ shĩa odaseyeli lɛ afata wɔshiɛmɔ nitsumɔ lɛ he, ni wɔkɛ wɔhe awo mli daa lɛ?
6 Akã he aaná mɛi babaoo ni tamɔ gwantɛŋi yɛ shĩa kɛ shĩa nitsumɔ lɛ mli. Be ko lɛ shiɛlɔ ko yatswa shinaa ko, ni mɔ ni hɔ tsũ lɛ mli lɛ kɛɛ lɛ akɛ: “Ba mli. Mile mɔ ni oji. Mikã he miisɔle miiha Nyɔŋmɔ koni etsu mɔ ko ni ebaye ebua mi kɛkɛ ni minu akɛ aatswa mishinaa lɛ. Ebo mi toi ni etsu bo.” Nɔ ni jɛ mli kɛba lɛ yeɔ odase akɛ Yehowa fiɔ gbɛ nɛɛ ni atsɔɔ nɔ ashiɛɔ lɛ sɛɛ. (Mat. 11:19) Okɛ shĩa kɛ shĩa odaseyeli lɛ afata oshiɛmɔ nitsumɔ lɛ he, ni otswa ofai shi ni okɛ ohe awo mli daa.