Ani Oyɛ Bo Diɛŋtsɛ Oshikpɔŋkuku?
1. Mɛni ji mɔ diɛŋtsɛ shikpɔŋkuku?
1 Mɔ diɛŋtsɛ shikpɔŋkuku ji shikpɔŋkuku ni akɛwo edɛŋ koni eshiɛ yɛ mli. Ekolɛ abaaha bo he ni bɛŋkɛ bo bɔni afee ni jɛmɛ yaa afee mlɛo aha bo, koni okome oshiɛ yɛ mli loo okɛ mɔ kroko afata ohe kɛshiɛ yɛ mli. Eyɛ mli akɛ sɛɛnamɔ yɛ he ákɛ akɛ he aaawo gbɛjianɔ ni asafo lɛ toɔ kɛha kutuu odaseyeli lɛ mli kɛ́ aaanyɛ moŋ, shi mɔ diɛŋtsɛ shikpɔŋkuku ni eeená koni etsu mli nii yɛ bei krokomɛi amli lɛ baanyɛ aye abua ni anyɛ aye odase kɛmɔ shi, titri lɛ yɛ asafoi ni yɔɔ shikpɔŋkukuji ni dara lɛ amli.—Bɔf. 10:42.
2. Mɛɛ sɛɛnamɔi yɔɔ mɔ diɛŋtsɛ shikpɔŋkuku ni eeená lɛ he?
2 Sɛɛnamɔi ni Yɔɔ He: Mɛi komɛi ena akɛ sɛɛnamɔi yɛ he waa akɛ aaaha amɛ amɛ diɛŋtsɛ amɛshikpɔŋkuku ni bɛŋkɛ amɛnitsumɔhe lɛ koni amɛshiɛ yɛ jɛmɛ beni amɛkpa kɛha shwane niyeli loo beni amɛkpa nitsumɔ sɛɛ nɔŋŋ. Mɛi krokomɛi hu ená shiɛmɔ ni amɛweku lɛ feɔ ekome kɛshiɛɔ yɛ amɛkutso lɛ mli ŋmɛlɛtswaa kome loo nɔ̃ dani amɛyaa Asafo Woloŋ Nikasemɔ lɛ he miishɛɛ waa. Enɛ haa mɔ feɔ sɛɛkuu-kɛsaramɔi kɛ Biblia mli nikasemɔi yɛ he ni bɛŋkɛ lɛ, ni ehaaa efite ehewalɛ, ebe, kɛ eshika babaoo. Akɛni mɔ diɛŋtsɛ shikpɔŋkuku ni eyɔɔ lɛ haa etsuɔ babaoo yɛ be fioo mli hewɔ lɛ, enɛ baanyɛ eha mɛi komɛi kɛ amɛhe awo gbɛgbalɔi awamɔ nitsumɔ lɛ mli yɛ be kɛ beaŋ loo amɛkɛ amɛhe awo daa gbɛgbamɔ nitsumɔ lɛ mli po. Kɛfata he lɛ, mɔ diɛŋtsɛ shikpɔŋkuku mli nitsumɔ kɛ mɛi ni yɔɔ shikpɔŋkuku lɛ mli lɛ ni wɔɔle amɛ jogbaŋŋ lɛ baanyɛ aha mɛi lɛ aná wɔmli hekɛnɔfɔɔ, ni enɛ baaha wɔha wɔshiɛmɔ wiemɔi lɛ akɔ amɛhiamɔ nii ahe, koni wɔshiɛmɔ nitsumɔ lɛ amɔ shi jogbaŋŋ.
3. Mɛɛ niiashikpamɔ gbɛgbalɔ ko ni yabi ni aha lɛ lɛ diɛŋtsɛ eshikpɔŋkuku lɛ ná?
3 Gbɛgbalɔ ko ní kpokpaa nɔkwɛlɔ ko wo lɛ hewalɛ koni eyabi ni aha lɛ lɛ diɛŋtsɛ eshikpɔŋkuku lɛ kɛɛ akɛ: “Mikɛ ŋaawoo nɛɛ tsu nii ni etsɛɛɛ ni mibale mɛi ni yɔɔ shikpɔŋkuku lɛ mli lɛ jogbaŋŋ ni shihilɛ kpakpa bakã mikɛ amɛ teŋ. Miyaa amɛŋɔɔ yɛ bei ni hi kɛha amɛ lɛ mli. Enɛ ha sɛɛkuu-kɛsaramɔi 35 ni mifeɔ daa nyɔŋ nɔ lɛ tee hiɛ kɛyashi nɔ ni fa fe 80, ni miná Biblia mli nikaselɔi kpawo.”
4. Mɛɛ gbɛ nɔ oootsɔ oná bo diɛŋtsɛ oshikpɔŋkuku ni otsu mli nii?
4 Gbɛ Nɔ ni Atsɔɔ ni Nine Shɛɔ Nɔ: Kɛ́ ootao oná bo diɛŋtsɛ oshikpɔŋkuku lɛ, yaana sɔɔlɔ ni kwɛɔ shikpɔŋkuku lɛ nɔ lɛ. Obaanyɛ ofɔ̃ shiɛlɔ kroko nine koni ekɛ bo atsu mli nii, ni kadimɔ shĩai ni oyanaaa mɛi yɛ jɛmɛ lɛ. Esa akɛ obɔ mɔdɛŋ ni ogbe shikpɔŋkuku lɛ mli nitsumɔ naa yɛ nyɔji ejwɛ mli. Kɛ́ ona akɛ onyɛŋ ogbe naa yɛ nyɔji ejwɛ mli lɛ, obaanyɛ obi Asafo Woloŋ Nikasemɔ kuu mli ni oyɔɔ lɛ nɔkwɛlɔ lɛ loo mɛi krokomɛi ní amɛye amɛbua bo. Kɛ́ nyɔji ejwɛ lɛ ba naagbee lɛ, obaanyɛ okɛ shikpɔŋkuku ni otsu mli nii ogbe naa lɛ aha loo obi ni aha otsu mli nii ekoŋŋ. Esaaa akɛ ohaa shikpɔŋkuku lɛ tsɔɔ onɔ kwraa, shi esa akɛ okɛha koni mɛi krokomɛi hu anyɛ atsu mli nii. Kɛ́ nyɛsafo lɛ shikpɔŋkuku lɛ edaaa, ni no hewɔ lɛ anyɛŋ aha bo bo diɛŋtsɛ oshikpɔŋkuku lɛ, no lɛ obaanyɛ obi osafo woloŋ nikasemɔ nɔkwɛlɔ lɛ koni eha bo nyɛkuu lɛ shikpɔŋkuku lɛ eko.
5. Kɛ́ wɔɔnyɛ wɔtsu shiɛmɔ nitsumɔ ni akɛwo wɔdɛŋ lɛ wɔgbe naa lɛ, mɛni ebiɔ ni wɔfee?
5 Nitsumɔ ni kã wɔhiɛ akɛ wɔshiɛ ‘wɔtsɔɔ je nɛŋ fɛɛ’ lɛ ji nitsumɔ kpele diɛŋtsɛ. (Mat. 24:14) Enɛ biɔ ni wɔto gbɛjianɔ kpakpa kɛtsu. Wɔ diɛŋtsɛ wɔshikpɔŋkuku ni wɔɔshiɛ yɛ mli kɛfata kutuu odaseyeli nitsumɔ lɛ he lɛ baanyɛ aha wɔshiɛ sanekpakpa lɛ wɔtsɔɔ mɛi babaoo.