Akɛ Jwetri ko Ewo Wɔdɛŋ
1 Bɔfo Paulo hiɛ sɔ nitsumɔ ni Nyɔŋmɔ kɛwo edɛŋ akɛ eshiɛ lɛ, ni etsɛ nitsumɔ nɛɛ akɛ “jwetri.” (2 Kor. 4:7) Edamɔ nɔnaai kɛ yiwaa naa kɛtsu nitsumɔ nɛɛ. Ekɛ ekãa shiɛ eha mɛi fɛɛ ni ekɛkpeɔ lɛ. Ekɛ tɔlɛ kɛ deŋmegbomɔ fã gbɛ̀i babaoo ni yɔɔ oshara yɛ ŋshɔ hiɛ kɛ gbɛjegbɛi anɔ. Mɛɛ gbɛ nɔ wɔɔtsɔ wɔkase Paulo ni wɔkɛtsɔɔ akɛ wɔhiɛ sɔɔ shiɛmɔ nitsumɔ lɛ waa? (Rom. 11:13) Mɛni haa shiɛmɔ nitsumɔ lɛ bafeɔ jwetri ni nɔ bɛ lɛ?
2 Jwetri ni Nɔ Bɛ: Bei pii lɛ nɔ ni jɛɔ je lɛŋ jwetrii ni anáa lɛ mli kɛbaa ji ŋkɔmɔyeli, ni sɛɛnamɔi ni jɛɔ mli kɛbaa lɛ hu faaa loo amɛsɛɛ etsɛɛɛ. Nɔ ni tamɔɔɔ nakai lɛ, wɔshiɛmɔ nitsumɔ lɛ haa wɔkɛ mɛi krokomɛi náa sɛɛnamɔi ni hiɔ shi daa. (1 Tim. 4:16) Ehaa mɛi ni hiɛ tsui ni ja lɛ baleɔ Yehowa, amɛfeɔ tsakemɔi ni sa yɛ amɛshihilɛ mli, ni amɛnáa anɔkwa hiɛnɔkamɔ akɛ amɛbaaná naanɔ wala. (Rom. 10:13-15) Kɛ́ wɔhiɛ sɔ wɔshiɛmɔ nitsumɔ lɛ waa lɛ, ehaa wɔnáa yiŋtoo kpakpa yɛ shihilɛ mli, ehaa wɔtsui nyɔɔ wɔmli daa akɛ wɔmiitsu nitsumɔ ni akɛwo wɔdɛŋ lɛ, ni wɔnáa hiɛnɔkamɔ kpakpa kɛha wɔsɛɛ.—1 Kor. 15:58.
3 Ha Ana akɛ Ohiɛ Sɔɔ Ojwetri Lɛ: Bei pii lɛ nibii ni wɔkɛshãa afɔle koni wɔnine ashɛ nɔ ko nɔ lɛ haa anaa bɔ ni nakai nɔ̃ lɛ he hiaa wɔ ha. Kwɛ hegbɛ kpele ni eji akɛ wɔkɛ wɔbe kɛ wɔhewalɛ aaatsu nii kɛjie Yehowa yi! (Efe. 5:16, 17) Esa akɛ bɔ ni wɔkɛ wɔbe tsuɔ nii wɔhaa lɛ aha ana akɛ wɔhiɛ sɔɔ nibii ni tswaa wɔkɛ Nyɔŋmɔ teŋ wekukpaa lɛ emaa shi lɛ ahe fe heloonaa nibii asɛɛtiumɔ. Akɛni sanekpakpa ni wɔshiɛɔ lɛ ji nɔ ko ni jara wa waa hewɔ lɛ, esa akɛ wɔkɛ miishɛɛ ashiɛ, ni wɔfee klalo hu akɛ wɔɔŋɔ hegbɛ fɛɛ hegbɛ ni wɔɔná lɛ kɛshiɛ sanekpakpa lɛ.
4 Aŋɔɔɔ jwetrii ni jara wa waa lɛ ateee, shi moŋ ajieɔ amɛ kpo koni mɛi krokomɛi hu ana. Kɛ́ wɔbuɔ wɔshiɛmɔ nitsumɔ lɛ akɛ eji jwetri lɛ, no lɛ abaana faŋŋ yɛ wɔshihilɛ mli akɛ ehe hiaa wɔ waa diɛŋtsɛ. (Mat. 5:14-16) Eba akɛ wɔɔná he miishɛɛ waa akɛ wɔɔkase bɔfo Paulo daa ni wɔŋɔ hegbɛ fɛɛ hegbɛ ni wɔɔná lɛ kɛtsɔɔ akɛ yɛ anɔkwale mli lɛ, wɔshiɛmɔ nitsumɔ lɛ jara wa ha wɔ waa, ni wɔbuɔ nitsumɔ nɛɛ akɛ eji jwetri.