Nyiɛmɔ Kristo lɛ Sɛɛ Kɛtsɔ Bulɛ Kpo ní Ooojie lɛ Nɔ
1. Mɛɛ gbɛ nɔ afi nɛɛ kpee lɛ saneyitso lɛ kɔɔ bulɛ kpo ni aaajie lɛ he?
1 Biblia lɛ wieɔ Yehowa, ni ji Jeŋ Muu Fɛɛ Maŋtsɛ lɛ he akɛ ekɛ woo ehà ehe. (Lala 104:1) Yesu wieɔ ni efeɔ enii yɛ gbɛ ni woɔ e-Tsɛ lɛ kɛ gbɛjianɔi ni e-Tsɛ toɔ lɛ hiɛ nyam be fɛɛ be. (Yoh. 17:4) Wɔteŋ mɔ fɛɛ mɔ baaná hegbɛi ni ekɛaakase Yesu, ni etsɔ nakai feemɔ nɔ ekɛ anunyam aha Yehowa yɛ bei ni akɛbaafee “Nyiɛmɔ Kristo lɛ Sɛɛ!” Kpokpaa Wulu nɔ Kpeei lɛ mli.
2. Gbɛjianɔ ni wɔtoɔ koni wɔya kpee lɛ fã fɛɛ fã shishi lɛ woɔ Yehowa hiɛ nyam yɛ mɛɛ gbɛ nɔ?
2 Jamɔ ní Bulɛ Yɔɔ He: Wɔbaanyɛ wɔwo Yehowa hiɛ nyam kɛtsɔ gbɛjianɔ ni wɔɔto koni wɔhi mumɔŋ okpɔlɔ ni esaa eto wɔ lɛ shishi lɛ nɔ. Amaniɛbɔi ni nine eshɛ nɔ lɛ tsɔɔ akɛ mɛi babaoo baaa Sohaa Kpee lɛ lolo. Ani obi onitsumɔtsɛ lɛ gbɛ, ni oto gbɛjianɔ bɔni afee ni onyɛ oya kpee lɛ gbi fɛɛ gbi ní Sohaa hu fata he? Ani oto gbɛjianɔ koni onyɛ oyashɛ kpee lɛ shishi mra, ni otao heni obaata bɔni afee ni oná shishijee lala kɛ sɔlemɔ lɛ mli gbɛfaŋnɔ? Ani oto gbɛjianɔ koni okɛ shwane niyenii aya koni ofata nyɛmimɛi lɛ ahe kɛye nii yɛ kpee lɛ shishi? Kɛ́ abaaje fã fɛɛ fã shishi ni kpee lɛ sɛinɔtalɔ lɛ tswa adafi akɛ wɔtao heko wɔtara dani abɔi lala lɛ tswaa lɛ, esa akɛ wɔfo wɔsanegbaa lɛ sɛɛ oyá nɔŋŋ koni wɔyatara shi dani gbɛjianɔtoo lɛ aje shishi.
3. (a) Mɛɛ gbɛ nɔ kpee lɛ shishi nifeemɔi lɛ atoi ni wɔɔbo jogbaŋŋ lɛ haa bulɛ baa wɔjamɔ lɛ he? (b) Mɛni esaaa akɛ wɔfeɔ beni kpee lɛ yaa nɔ lɛ?
3 Kpee lɛ shishi nifeemɔi lɛ atoi ni wɔɔbo jogbaŋŋ lɛ hu baawo wɔŋwɛi Tsɛ lɛ hiɛ nyam. Beni adafitswalɔ ko na bɔ ni afee kpokpaa nɔ kpee ko yɛ kpokpaa nɔ ni eyɔɔ lɛ, eŋma akɛ mɛi ni na bɔ ni kpee lɛ tee nɔ ha lɛ baanya “bɔ ni mɛi ni tee kpee lɛ ba amɛjeŋ jogbaŋŋ, ní amɛkɛ bulɛ fee dioo kɛbo wiemɔi ni ahaa lɛ toi, kɛ bɔ ni amɛyɔɔ mumɔŋ nibii ahe miishɛɛ lɛ he.” Ewie “gbekɛbii babaoo . . . ni jie jeŋba kpakpa kpo kɛ bɔ ni amɛhiɛ edɔ kɛgbeleɔ Ŋmalɛ Krɔŋkrɔŋ lɛ hu he.” Be ní kpee lɛ yaa nɔ lɛ jeee be ni akɛgbaa sane, be ni akɛŋmalaa saji yɛ tɛlifoŋ nɔ ni akɛmajeɔ mɛi krokomɛi, be ni akɛyeɔ nii, be ni akɛwɔɔ loo be ni akɛkpaa shi yɛ kpee lɛ shishi. Esa akɛ oblahii kɛ oblayei bibii lɛ atara amɛfɔlɔi amasɛi koni fɔlɔi lɛ aye abua amɛ ni amɛná nifeemɔ lɛ he sɛɛ. (5 Mose 31:12; Abɛi 29:15) Nakai feemɔ tsɔɔ bulɛ ni ayɔɔ kɛha mɛi krokomɛi kɛ hiɛsɔɔ kpo ni ajieɔ yɛ mumɔŋ niyenii ni he hiaa ni akɛhaa wɔ lɛ he.
4. Mɛni hewɔ esa akɛ wɔkɛ bulɛ asaa wɔhe beni wɔyaa kpee lɛ?
4 Hesaamɔ ni Bulɛ Yɔɔ He: Mɛi pii hiɛ sɔ kaimɔi ni akɛha yɛ nyɛsɛɛ afi lɛ kpokpaa wulu nɔ kpee lɛ shishi wiemɔ ni ji “Ha Ana Bulɛ ni Sa Kristofoi Yɛ Ohe Be Fɛɛ Be,” ni ma nɔ mi akɛ esa akɛ Nyɔŋmɔ tsuji abɔ mɔdɛŋ ni amɛha ana bulɛ ni sa Kristofoi yɛ amɛhesaamɔ kɛ amɛtadewoo mli lɛ. Esa akɛ wɔkɛ hiɛdɔɔ asusu sane nɛɛ he afi nɛɛ hu. Atadei ni wɔwoɔ lɛ haa mɛi krokomɛi naa nɔ ni yɔɔ wɔtsuii amli. (Mat. 6:21) Wɔhesaamɔ haa anaa bɔ ni wɔbuɔ Yehowa kɛ hegbɛ ni wɔná akɛ wɔji e-Dasefoi lɛ wɔhaa. Esa akɛ wɔsaa wɔhe akɛ mɛi ni “tsɔɔ amɛhe akɛ Nyɔnmɔ jálɔi” be fɛɛ be.—1 Tim. 2:9, 10.
5. Mɛɛ gbɛ nɔ wɔbaanyɛ wɔya nɔ wɔha bulɛ ahi wɔhesaamɔ he beni wɔjɔɔ wɔhe yɛ maŋ ni afeɔ kpee lɛ yɛ mli lɛ mli?
5 Ani esa akɛ wɔkɛ bulɛ asaa wɔhe beni wɔyaa kpee lɛ pɛ? Kaimɔ akɛ kɛ́ akpá kpee lɛ, mɛi babaoo baayɔse wɔ ni wɔtsɛ wɔ tsitsinaa-tsɛɛ nii lɛ yɛ maŋ ni afeɔ kpee lɛ yɛ mli lɛ mli. Esa akɛ wɔhesaamɔ lɛ aha esoro wɔ yɛ maŋbii lɛ ahe. No hewɔ lɛ, kɛ́ wɔmiijɔɔ wɔhe po, tamɔ kɛ wɔyaaye nii lɛ, esa akɛ wɔsaa wɔhe akɛ Nyɔŋmɔ tsuji ni eba maŋ lɛ mli kɛha Kristofoi akpee, ni esaaa akɛ wɔwoɔ atadei tamɔ jeans, nika, loo T-Shirt ni aŋmala nibii yɛ amɛmli. Enɛ baafee odaseyeli kɛha mɛi ni yɔɔ akutso lɛ mli lɛ waa! Kɛ́ wɔsaa wɔhe akɛ Nyɔnmɔ tsuji lɛ, Yehowa náa he miishɛɛ.
6. Kɛ́ wɔjie bulɛ ni sa Kristofoi kpo lɛ, mɛɛ nibii kpakpai baajɛ mli kɛba?
6 Yibiiwoo ni Haa Mɔ Tsui Nyɔɔ Emli: Kɛ́ wɔha ana bulɛ ni sa Kristofoi yɛ wɔhe yɛ wɔkpeei lɛ ashishi lɛ, ebaaha wɔná hegbɛi kɛye trukaa odase, ni ebaaná mɛi ni naa wɔ lɛ anɔ hewalɛ kpakpa. Nɔ ni maŋ onukpa ko kɛɛ beni agbe kpee ko ni afee lɛ naa ji akɛ: “Wɔnako mɛi komɛi ni baa amɛjeŋ jogbaŋŋ tamɔ nɛkɛ pɛŋ. Bɔ ni nyɛyɔɔ lɛ ji bɔ ni Nyɔŋmɔ kpaa gbɛ akɛ wɔhi shi.” Kɛ́ wɔjie bulɛ kpo lɛ, ewoɔ Yehowa hiɛ nyam, ni no tsɔɔ akɛ wɔyɛ bulɛ kɛ suɔmɔ kɛha wɔhe. (1 Pet. 2:12) Etsɔɔ akɛ wɔyɛ Nyɔŋmɔ gbeyeishemɔ kɛ hiɛsɔɔ kɛha hegbɛ ni wɔná akɛ wɔ-Tsɛ lɛ aaatsɔɔ wɔ nii lɛ. (Heb. 12:28) Eba akɛ wɔbaabɔ mɔdɛŋ ni wɔjie bulɛ kpo beni wɔkpaa “Nyiɛmɔ Kristo lɛ Sɛɛ!” Kpokpaa Wulu nɔ Kpee ni abaafee afi nɛɛ gbɛ lɛ.