“Lɛ Ehaa Mɔ ni Egbɔjɔ lɛ Hewalɛ”
1 Etɔɔ wɔ fɛɛ yɛ be kɛ beaŋ. Jeee nitsumɔ loo nibii krokomɛi ni wɔfeɔ lɛ pɛ baanyɛ aha etɔ wɔ, shi moŋ naagbai ni wɔkɛkpeɔ yɛ “jaramɔ bei” nɛɛ mli lɛ hu baanyɛ aha etɔ wɔ. (2 Tim. 3:1) Ákɛ Yehowa tsuji lɛ, te wɔfeɔ tɛŋŋ wɔnáa hewalɛ ni jɛ Nyɔŋmɔ ŋɔɔ ni haaa ekãa ni wɔkɛshiɛɔ lɛ naa aba shi? Wɔfeɔ enɛ kɛtsɔ wɔhe ni wɔkɛfɔɔ Yehowa, mɔ ni yɔɔ ‘hewalɛ kpele’ lɛ nɔ lɛ nɔ. (Yes. 40:26) Ele nibii ni he hiaa wɔ, ni eyɛ he miishɛɛ diɛŋtsɛ akɛ eeeye ebua wɔ.—1 Pet. 5:7.
2 Nibii ni Yehowa Kɛyeɔ Buaa Wɔ: Yehowa tsɔɔ emumɔ krɔŋkrɔŋ lɛ ni ji hewalɛ kpele ni ekɛbɔ jeŋ muu lɛ fɛɛ lɛ nɔ ewoɔ wɔ hewalɛ. Kɛ́ etɔ wɔ lɛ, Nyɔŋmɔ mumɔ lɛ yeɔ ebuaa wɔ ni wɔnáa “hewalɛ hee.” (Yes. 40:31) Bi ohe akɛ, ‘Mɛɛ be ji naagbee be ni mije gbɛ misɔle kɛbi mumɔ krɔŋkrɔŋ lɛ koni ewo mi hewalɛ ni manyɛ matsu sɔ̃i ni kã minɔ akɛ Kristofonyo lɛ ahe nii?’—Luka 11:11-13.
3 Kɛ́ wɔkase Nyɔŋmɔ Wiemɔ ni ajɛ mumɔŋ aŋma lɛ daa ni wɔjwɛŋ nɔ, ni wɔkase wɔ-Kristofoi awoji lɛ daa koni ewaje wɔkɛ Nyɔŋmɔ teŋ wekukpaa lɛ, wɔbaafee tamɔ “tso” ni yɔɔ hewalɛ ‘ni atɛo yɛ faai atoi, ni woɔ eyibii yɛ ebe lɛ mli, ni eyibaai kpooo.’—Lala 1:2, 3.
4 Yehowa kɛ wɔnanemɛi Kristofoi ni baanyɛ ‘atsɔmɔ tsuiwoo’ kɛha wɔ lɛ hu tsuɔ nii. (Kol. 4:10, 11) Amɛwoɔ wɔ hewalɛ yɛ asafoŋ kpeei ashishi kɛtsɔ amɛsanegbaa, saji ahetooi ni amɛhaa, kɛ wiemɔi ni amɛhaa ni tswaa mɔ emaa shi lɛ nɔ. (Bɔf. 15:32) Kristofoi ni ji asafoŋ onukpai lɛ titri kɛ hewalɛwoo kɛ yelikɛbuamɔ ni tswaa wɔkɛ Nyɔŋmɔ teŋ wekukpaa lɛ emaa shi lɛ haa.—Yes. 32:1, 2.
5 Shiɛmɔ Nitsumɔ Lɛ: Kɛ́ oonu he akɛ eetɔ bo lɛ, kaafɔ̃ɔ shiɛmɔ! Ákɛ nɔ ni tamɔɔɔ nitsumɔi krokomɛi lɛ, shiɛmɔ nitsumɔ lɛ ni wɔkɛ wɔhe woɔ mli daa lɛ haa wɔnáa hewalɛ hee. (Mat. 11:28-30) Sanekpakpa lɛ ni wɔshiɛɔ lɛ yeɔ ebuaa wɔ ni wɔkɛ wɔjwɛŋmɔ maa Nyɔŋmɔ Maŋtsɛyeli lɛ nɔ, ni ehaa wɔsusuɔ naanɔ wala kɛ emli jɔɔmɔi lɛ ahe.
6 Wɔyɛ babaoo ni wɔɔtsu dani akpata nibii agbɛjianɔtoo fɔŋ nɛɛ hiɛ. Kɛ́ wɔkɛ wɔhe fɔ̃ “hewalɛ ni Nyɔŋmɔ duroɔ lɛ” nɔ lɛ, wɔbaaná yiŋtoo ni ja jogbaŋŋ ni wɔɔdamɔ nɔ koni wɔya nɔ wɔfi shi yɛ wɔshiɛmɔ nitsumɔ lɛ mli. (1 Pet. 4:11) Yehowa baaye abua wɔ kɛgbe wɔnitsumɔ lɛ naa, ejaakɛ “lɛ ehaa mɔ ni egbɔjɔ lɛ hewalɛ.”—Yes. 40:29.