Ani Ohaa Nyɔŋmɔ Wiemɔ lɛ Jieɔ Enaa?
1 Bei pii lɛ, je lɛ kpooɔ Biblia lɛ, shi anɔkwa Kristofoi kɛ ekãa fãa Nyɔŋmɔ Wiemɔ lɛ he. Akɛni wɔheɔ wɔyeɔ akɛ ‘Ŋmalɛ fɛɛ ŋmalɛ jɛ Nyɔŋmɔ Mumɔ lɛŋ’ hewɔ lɛ, wɔkɛ Yesu Kristo ni sɔle eha Yehowa akɛ, “Owiemɔ lɛ anɔkwaleŋ” lɛ kpaa gbee. (2 Tim. 3:16; Yoh. 17:17) Mɛɛ gbɛ nɔ wɔbaanyɛ wɔtsɔ wɔha Nyɔŋmɔ Wiemɔ lɛ ajie enaa jogbaŋŋ?
2 Kasemɔ Ŋmalɛi Lɛ: Ŋwanejee ko bɛ he akɛ Yesu kase Nyɔŋmɔ Wiemɔ lɛ jogbaŋŋ. Enɛ ye ebua lɛ ni ekɛ Ŋmalɛi lɛ tsu nii kɛtsɔɔ mɛi anii yɛ afii ni ekɛtsu esɔɔmɔ nitsumɔ lɛ fɛɛ mli. (Luka 4:16-21; 24:44-46) Te wɔɔfee tɛŋŋ wɔkase ŋmalɛi babaoo ni wɔbaanyɛ wɔkɛtsu nii wɔwo wɔyitsoŋ? Wɔbaanyɛ wɔfee enɛ kɛtsɔ Biblia lɛ ni wɔɔkane daa gbi, ni no sɛɛ lɛ wɔjwɛŋ emli kuku ko ni wɔna akɛ ewoɔ mɔ hewalɛ waa loo ebaanyɛ eye ebua wɔ yɛ sɔɔmɔ nitsumɔ lɛ mli lɛ nɔ lɛ nɔ. Kɛ́ wɔmiisaa wɔhe kɛha asafoŋ kpeei lɛ, esa akɛ wɔkane ŋmalɛi ni aŋmalako amɛmli wiemɔi lɛ yɛ Biblia lɛ mli, ni ekolɛ wɔsusu nɔ ni wɔbaawie yɛ ŋmalɛi nɛɛ ahe. Kɛ́ wɔtee kpee ni wielɔ lɛ tsɛ ŋmalɛ ko ni ebaakane lɛ, esa akɛ wɔgbele wɔ-Biblia lɛ ni wɔkɛ lɛ afee ekome kɛkane. Kɛ́ wɔkase Biblia mli kukuji wɔwo wɔyitsoŋ lɛ, ebaasaa wɔ koni ‘wɔja anɔkwale wiemɔ lɛ mli pɛpɛɛpɛ.’—2 Tim. 2:15.
3 Ha Biblia lɛ Awie: Kɛ́ wɔtee shiɛmɔ lɛ, esa akɛ wɔha Biblia lɛ awie. Ákɛ nɔkwɛmɔnɔ lɛ, esa akɛ wɔbɔ mɔdɛŋ ni wɔkane ŋmalɛ ko ni wɔkɛ shiatsɛ lɛ asusu he, kɛ́ shihilɛ lɛ baaŋmɛ gbɛ. Kɛ́ ebi sane ko loo ekɛ wɔ kpaaa gbee yɛ nɔ ko he lɛ, ehi jogbaŋŋ akɛ wɔkɛ Biblia lɛ aaatsu nii kɛha lɛ hetoo. Kɛ́ shiatsɛ lɛ bɛ dekã lɛ, wɔbaanyɛ wɔtsĩ Biblia mli susumɔ ko tã wɔtsɔɔ lɛ kɛtsɔ kɛɛmɔ ni wɔɔkɛɛ akɛ, “Dani mashi bo lɛ, ha makane ŋmalɛ kome ko maha bo” lɛ nɔ. Kɛ́ eeehi lɛ, kanemɔ kɛjɛ Biblia lɛ mli tɛ̃ɛ ni oha ena nɔ ni okaneɔ lɛ.
4 Beni akɛ ŋmalɛ ko ni tsɔɔ akɛ Triniti tsɔɔmɔ lɛ ejaaa lɛ tsɔɔ shiatsɛ ko lɛ, ebo akɛ, “Mitee sɔlemɔ miwala gbii abɔ fɛɛ, shi mileee kɔkɔɔkɔ akɛ enɛ yɛ Biblia lɛ mli!” Amrɔ nɔŋŋ lɛ, ekpɛlɛ ní akɛ lɛ akase Biblia lɛ. Yesu kɛɛ akɛ etooi lɛ baanu egbee. (Yoh. 10:16, 27) Gbɛ ni hi fe fɛɛ ni mɛi ni hiɛ tsui ni ja lɛ baanyɛ atsɔ nɔ ana anɔkwale lɛ ji ni amɛna kɛjɛ Ŋmalɛi lɛ amli tɛ̃ɛ. No hewɔ lɛ nyɛhaa wɔfea mɛi ni haa Nyɔŋmɔ Wiemɔ ni ji anɔkwale lɛ jieɔ enaa!