Wɔyɛ He Miishɛɛ akɛ Wɔkɛ Wɔhe Aaawo Yehowa Sɔɔmɔ lɛ Mli Kɛ Ekãa!
1 Bɔfo Paulo ná he miishɛɛ akɛ ‘afite lɛ kwraa’ loo ekɛ ehe ashã afɔle kwraa koni enyɛ egbe enitsumɔ akɛ Kristofonyo lɛ naa. (2 Kor. 12:15) Ŋmɛnɛ lɛ, Kristofoi babaoo hu kɛ ekãa tsuɔ nii akɛ gbɛgbalɔi. Kristofoi krokomɛi hu ni yɔɔ wekui sɔ̃i ni tsii lɛ bɛ deka kwraa, shi amɛtoɔ amɛbe he gbɛjianɔ ni amɛkɛ amɛhe woɔ shiɛmɔ nitsumɔ lɛ mli daa otsi. Mɛi krokomɛi ni bɛ gbɔmɔtsoŋ hewalɛ jogbaŋŋ lɛ kɛ hewalɛ fioo ni amɛyɔɔ lɛ tsuɔ nii koni amɛkɛha Maŋtsɛyeli lɛ he nibii aya hiɛ. Kwɛ bɔ ni ekãa ni Yehowa webii kɛtsuɔ nii yɛ esɔɔmɔ lɛ mli, ekɔɔɔ he eko afii abɔ ni amɛye kɛ shihilɛi amli ni amɛyɔɔ lɛ woɔ mɔ hewalɛ ha!
2 Suɔmɔ Kɛha Naanyo Gbɔmɔ: Kɛ́ wɔfee bɔ fɛɛ bɔ ni wɔɔnyɛ kɛsɔmɔ Yehowa, ni wɔjie suɔmɔ kɛha Nyɔŋmɔ kɛ naanyo gbɔmɔ kpo lɛ, ehaa wɔnáa henilee kpakpa. Akɛni Paulo kɛ esusuma fɛɛ shiɛ sanekpakpa lɛ hewɔ lɛ, enyɛ ekɛ miishɛɛ kɛɛ akɛ: “Ŋmɛnɛ gbi nɛɛ miiye odase miitsɔɔ nyɛ, akɛ miyeee nyɛteŋ mɔ ko mɔ ko lá yi sɔ̃.” (Bɔf. 20:24, 26; 1 Tes. 2:8) Kɛ́ wɔkɛ wɔhe wo shiɛmɔ nitsumɔ lɛ mli yɛ bɔ ni shihilɛ mli ni wɔyɔɔ lɛ baaŋmɛ wɔ gbɛ lɛ naa lɛ, ehaŋ wɔye mɔ ko lá yi sɔ̃.—Ezek. 3:18-21.
3 Mɔdɛŋ ni wɔbɔɔ kɛyeɔ buaa mɛi krokomɛi lɛ haa wɔnáa miishɛɛ. (Bɔf. 20:35) Nyɛminuu ko kɛɛ akɛ: “Kɛ je na, ni miku misɛɛ kɛtee shĩa beni mitsu nii yɛ Yehowa sɔɔmɔ mli sɛɛ lɛ, minuɔ he akɛ etɔ mi, nakai ebaalɛ. Shi miyɛ miishɛɛ, ni miida Yehowa shi akɛ eha mi miishɛɛ ko ni mɔ ko mɔ ko nyɛŋ ahe kɛjɛ midɛŋ.”
4 Suɔmɔ Kɛha Nyɔŋmɔ: Yiŋtoo titri hewɔ ni wɔkɛ wɔhe woɔ Yehowa sɔɔmɔ lɛ mli kɛ ekãa lɛ ji akɛ esaa wɔŋwɛi Tsɛ lɛ hiɛ. Suɔmɔ kɛha Nyɔŋmɔ tsirɛɔ wɔ koni wɔye ekitai lɛ, ní shiɛmɔ kɛ kaselɔfeemɔ nitsumɔ lɛ fata he lɛ anɔ. (1 Yoh. 5:3) Kɛ́ mɛi booo wiemɔ lɛ toi loo amɛteɔ shi amɛwoɔ wɔ po lɛ, wɔkɛ miishɛɛ yaa nɔ wɔtsuɔ Yehowa nitsumɔ lɛ kɛ ekãa.
5 Jeee be ni akɛfeɔ shɔ̃ɔ nɛ. Wɔyɛ nikpamɔ beaŋ. (Mat. 9:37) Bei pii lɛ okwaafoi kɛ ŋmɛlɛtswai babaoo tsuɔ nii yɛ nikpamɔ beaŋ, ejaakɛ be fioo pɛ amɛyɔɔ kɛha nikpamɔ lɛ koni amɛŋmɔshi nibii lɛ akafite. Be ni eshwɛ kɛha mumɔŋ nikpamɔ lɛ hu faaa. Beni wɔhaa be ni wɔyɔɔ mli lɛ hiɔ wɔjwɛŋmɔ mli lɛ, eba akɛ wɔ fɛɛ wɔɔya nɔ wɔkɛ ekãa babaoo atsu shiɛmɔ nitsumɔ lɛ.—Luka 13:24; 1 Kor. 7:29-31.