Bɔ ni Wɔɔfee Wɔkɛ Mɛi ni Wɔhaa Amɛ Woji Tɛtrɛbii lɛ Aje Biblia Mli Nikasemɔ Shishi
1. Mɛni ji oti ni ma wɔhiɛ kɛ́ wɔkɛ woji tɛtrɛbii lɛ miiha?
1 Wɔkɛ Buu-Mɔɔ kɛ Awake! woji tɛtrɛbii lɛ fɔɔ hamɔ yɛ shiɛmɔ nitsumɔ lɛ mli daa Hɔɔ. Shi enɛ ji klɛŋklɛŋ nifeemɔ ni baaha wɔshɛ oti ni ma wɔhiɛ akɛ wɔtsɔɔ mɛi ni yɔɔ wiemɔ lɛ he miishɛɛ lɛ anɔkwale lɛ he kɛkɛ. Gbɛtsɔɔmɔi ni nyiɛ sɛɛ nɛɛ tsɔɔ bɔ ni aaafee akɛ Biblia lɛ Tsɔɔ wolo lɛ aha kɛ́ aafee sɛɛkuu-kɛsaramɔ, kɛ bɔ ni aaafee akɛje Biblia mli nikasemɔ shishi. Obaanyɛ otsake shiɛmɔ wiemɔi nɛɛ amli ni ekɔ mɛi ni yɔɔ nyɛshikpɔŋkuku lɛ mli lɛ ahe, ni okwɛ bɔ ni bo diɛŋtsɛ obaanyɛ owie lɛ oha. Obaanyɛ okɛ shiɛmɔ wiemɔ kroko atsu nii kɛ́ ona akɛ obaanyɛ okɛ no atsu nii jogbaŋŋ kɛmɔ shi.
2. Mɛɛ gbɛ nɔ obaanyɛ otsɔ okɛ baafai ni akɛkpa Biblia lɛ Tsɔɔ wolo lɛ hiɛ lɛ atsu nii ni okɛje Biblia mli nikasemɔ shishi?
2 Okɛ Baafai ni Akɛkpa Wolo lɛ Hiɛ lɛ Atsu Nii: Kɛ́ oku osɛɛ otee lɛ, obaanyɛ okɛɛ akɛ: “Woji tɛtrɛbii ni mishi miha bo lɛ gbalaa jwɛŋmɔ kɛyaa Biblia lɛ nɔ. Kadimɔ nɔ hewɔ ni Biblia lɛ kanemɔ he hiaa waa lɛ yɛ ŋmalɛ nɛɛ mli.” Kanemɔ Yesaia 48:17, 18; Yohane 17:3; loo ŋmalɛ kroko ni sa. Beni okɛ Biblia lɛ Tsɔɔ wolo lɛ etsɔɔ shiatsɛ lɛ ní oha lɛ eko sɛɛ lɛ, obaanyɛ otsa nɔ akɛ:
◼ “Biblia lɛ kɛ wɔsɛɛ be he hiɛnɔkamɔ diɛŋtsɛ haa wɔ.” Okɛ baafa 4-5 lɛ atsɔɔ shiatsɛ lɛ, ni obi lɛ akɛ, “Te shiwoi nɛɛ ateŋ nɔ ni obaasumɔ ni eba mli lɛ?” Gbalamɔ ejwɛŋmɔ kɛya saneyitso ni wieɔ Ŋmalɛ mli shiwoo ni ehala akɛ ebaasumɔ ni eba mli lɛ nɔ, ni kɛ́ ebaaŋmɛ bo gbɛ lɛ, okɛ lɛ asusu kuku kome loo enyɔ he kuku.
◼ Aloo obaanyɛ okɛɛ akɛ, “Biblia lɛ haa shihilɛ mli sanebimɔi ni he hiaa fe fɛɛ lɛ ahetoo.” Gbalamɔ ejwɛŋmɔ kɛya baafa 6 lɛ nɔ, ni obi lɛ kɛ́ esusu sanebimɔi ni yɔɔ baafa lɛ shishigbɛ lɛ eko he pɛŋ. Gbelemɔ saneyitso ni haa sanebimɔ ni ehala lɛ hetoo, ni okɛ lɛ asusu kuku kome loo enyɔ he kuku.
◼ Aloo obaanyɛ okɛ saneyitsei ni ato naa yɛ baafa 2 lɛ ekomɛi atsɔɔ lɛ, ni obi lɛ ni etsɔɔ bo nɔ ni eyɔɔ he miishɛɛ. Gbelemɔ nakai saneyitso lɛ, ni ofee bɔ ni afeɔ Biblia mli nikasemɔ ahaa lɛ he nɔkwɛmɔnɔ kuku.
3. Te wɔɔfee tɛŋŋ wɔje Biblia mli nikasemɔ shishi beni wɔkɛ woji tɛtrɛbii ni wieɔ nibii ni nyiɛ sɛɛ nɛɛ ahe lɛ eha sɛɛ? (a) Bɔ ni je lɛŋ shihilɛ yaa nɔ efiteɔ. (b) Weku lɛ. (d) Bɔ ni abaanyɛ akɛ he afɔ̃ Biblia lɛ nɔ.
3 Shi Sanebimɔ yɛ Klɛŋklɛŋ Saramɔ lɛ Mli: Gbɛ kroko ni obaanyɛ otsɔ nɔ ji ni oha shiatsɛ lɛ ale yɛ klɛŋklɛŋ saramɔ lɛ mli akɛ obaaku osɛɛ oba ekoŋŋ. Kɛ́ shiatsɛ lɛ hé woji tɛtrɛbii lɛ, shi sanebimɔ ko oha lɛ, ni owo lɛ shi akɛ obaaba obaha nakai sanebimɔ lɛ hetoo kɛ́ oku osɛɛ oba ekoŋŋ. Bɔɔ mɔdɛŋ ni oto gbɛjianɔ ni oku osɛɛ kɛya, ní otswa ofai shi akɛ obaaye obe nɔ. (Mat. 5:37) Kɛ́ oku osɛɛ otee lɛ, kaimɔ shiatsɛ lɛ sane ni obi lɛ lɛ, ni okane hetoo lɛ kɛjɛ Biblia lɛ tsɔɔ wolo lɛ mli ní okɛ lɛ asusu he kuku. Okɛ wolo lɛ eko aha lɛ ni enyiɛ sɛɛ beni okaneɔ lɛ. Naa nɔkwɛmɔnii fioo komɛi:
◼ Kɛ́ wolo tɛtrɛɛ ni okɛha lɛ wieɔ bɔ ni je lɛŋ shihilɛ yaa nɔ efiteɔ lɛ he lɛ, obaanyɛ okɛɛ akɛ, “Kɛ́ miku misɛɛ miba be kroko lɛ, wɔbaajɛ Biblia lɛ mli wɔha sanebimɔ nɛɛ hetoo, Mɛɛ tsakemɔi Nyɔŋmɔ kɛbaaba shikpɔŋ lɛ nɔ?” Kɛ́ oku osɛɛ otee lɛ, okɛ baafa 4-5 lɛ atsu nii. Aloo obaanyɛ obi akɛ, “Ani eji Nyɔŋmɔ suɔmɔnaa nii akɛ osharai aba?” Kɛ́ oku osɛɛ otee lɛ, okɛ baafa 7-8 ni yɔɔ yitso 1 lɛ mli lɛ atsɔɔ shiatsɛ lɛ.
◼ Kɛ́ wolo tɛtrɛɛ ni okɛha lɛ wieɔ weku shihilɛ he lɛ, no lɛ dani obaashi lɛ obaanyɛ obi akɛ, “Mɛni weku lɛ mli bii lɛ ateŋ mɔ fɛɛ mɔ baanyɛ afee koni weku lɛ aná miishɛɛ?” Kɛ́ oku osɛɛ otee lɛ, okɛ lɛ asusu yitso 14 kuku 4 lɛ he.
◼ Kɛ́ wolo tɛtrɛɛ ni okɛha lɛ kɔɔ bɔ ni abaanyɛ akɛ he afɔ̃ Biblia lɛ nɔ lɛ he lɛ, obaanyɛ obi sane nɛɛ koni nyɛsusu he be kroko, “Ani Biblia lɛ ja yɛ jeŋ nilee naa?” Kɛ́ oku osɛɛ otee lɛ, okɛ lɛ asusu yitso 2 kuku 8 lɛ he.
4. Mɛni esa akɛ wɔfee kɛ́ shiatsɛ lɛ eŋɔɔɔ Biblia lɛ Tsɔɔ wolo lɛ?
4 Kɛ́ nyɛgbe sanegbaa lɛ eko fɛɛ eko naa lɛ, bi shiatsɛ lɛ sane koni be kroko kɛ́ oku osɛɛ otee lɛ oyaha hetoo. Kɛ́ ona akɛ nikasemɔ lɛ baakã he aya nɔ daa lɛ, nyɛtoa nikasemɔ lɛ naa kɛjɛa wolo lɛ shishijee kɛyashi naagbee. Ni kɛ́ shiatsɛ lɛ eŋɔɔɔ Biblia lɛ Tsɔɔ wolo lɛ hu? No lɛ obaanyɛ oya nɔ okɛ woji tɛtrɛbii lɛ ayaha lɛ, ní okɛ lɛ agba sane kɛjɛ Ŋmalɛ lɛ mli. Be mli ni oyaa nɔ ohaa enáa wiemɔ lɛ he miishɛɛ lɛ, ekolɛ ebaakpɛlɛ ni akɛ lɛ akase Biblia lɛ yɛ sɛɛ mli.
5. Mɛni hewɔ esa akɛ wɔbɔ mɔdɛŋ ni wɔfee babaoo fe woji tɛtrɛbii lɛ ní wɔɔshi wɔha mɛi kɛkɛ lɛ?
5 Buu-Mɔɔ kɛ Awake! woji tɛtrɛbii lɛ baanyɛ atee mɔ ko miishɛɛ shi ni ekase nɔ ni Biblia lɛ tsɔɔ diɛŋtsɛ. Enɛ hewɔ lɛ, bɔɔ mɔdɛŋ waa koni okɛ mɛi ni ŋɔɔ woji tɛtrɛbii lɛ aje Biblia mli nikasemɔ shishi. Kɛ́ wɔfee nakai lɛ, ebaaha wɔbo Yesu famɔ akɛ ‘wɔfee mɛi kaselɔi, ni wɔtsɔɔ amɛ nii’ lɛ toi.—Mat. 28:19, 20.