Wɔkɛ Mɛi Krokomɛi Gbaa Maŋtsɛyeli lɛ He Hiɛnɔkamɔ ni Wɔyɔɔ lɛ He Sane
1 Yɛ nɛkɛ naagbee gbii ni ji jaramɔ be nɛɛ mli lɛ, mɛi pii yɛ je lɛŋ ni amɛbɛ hiɛnɔkamɔ. (Efe. 2:12) Mɛi komɛi kɛ amɛhiɛ fɔ̃ɔ heloonaa ninamɔ, adesai nɔyelɔi, ŋmɛnɛŋmɛnɛ beaŋ jeŋ nilee, kɛ nibii krokomɛi anɔ yɛ gbɛ ni nilee bɛ mli nɔ. Kwɛ bɔ ni wɔmii shɛɔ wɔhe akɛ wɔyɛ hiɛnɔkamɔ diɛŋtsɛ kɛha wɔsɛɛ, hiɛnɔkamɔ ni ji “wɔsusuma sɛkɛ ni tseee ni efi shi shiŋŋ” lɛ!—Heb. 6:19.
2 Yɛ Nyɔŋmɔ Maŋtsɛyeli nɔyeli lɛ shishi lɛ, abaatsake shikpɔŋ lɛ afee lɛ paradeiso. Abaatee wɔsuɔlɔi ni egboi lɛ ashi. (Bɔf. 24:15) Ohia, jalɛsane ni ayeee, hela, gbɔlɛ, kɛ gbele sɛɛ baafo. (Lala 9:19; Mat. 12:20, 21; Kpoj. 21:3, 4) Enɛɛmɛi ji Yehowa shiwooi ní etsɛŋ ni baaba mli lɛ ekomɛi. Te wɔ hiɛnɔkamɔ lɛ ateŋ nɔ ni okpaa gbɛ waa akɛ eba mli lɛ?
3 Jajemɔ Sanekpakpa Lɛ: Esaaa akɛ wɔtsĩɔ Maŋtsɛyeli lɛ he hiɛnɔkamɔ lɛ naa wɔhaa wɔ pɛ wɔhe. Suɔmɔ ni wɔyɔɔ kɛha Nyɔŋmɔ kɛ adesai krokomɛi lɛ tsirɛɔ wɔ koni wɔkase Yesu ni ‘wɔjaje sanekpakpa lɛ wɔtsɔɔ ohiafoi, koni wɔshiɛ heyeli wɔtsɔɔ nomi lɛ, kɛ hiŋmɛigbelemɔ ha shwilafoi, koni wɔŋmɛɛ pilafoi lɛ ahe ní amɛye amɛhe.’ (Luka 4:18, 19) Bɔfo Paulo shiɛ sanekpakpa lɛ yɛ jara nɔ kɛ he fɛɛ he ni mɛi yɔɔ. Ekɛ ekãa tsu shiɛmɔ nitsumɔ lɛ. (Bɔf. 18:5) Kɛ́ wɔkase ekãa ni ekɛtsu shiɛmɔ nitsumɔ lɛ, “je nɛŋ he naagbamɔ kɛ ninámɔ he lakamɔ” nyɛŋ aha hiɛnɔkamɔ ni wɔyɔɔ akɛ Kristofoi lɛ aba shi.—Mar. 4:19.
4 Kɛ́ wɔkɛ mɛi ni bɛ sane lɛ he miishɛɛ kwraa, mɛi ni jieɔ miishɛɛ fioo ko pɛ kpo, loo mɛi ni teɔ shi amɛwoɔ wɔ yɛ faŋŋ mli lɛ kpe lɛ, no haaa Maŋtsɛyeli lɛ he hiɛnɔkamɔ ni wɔyɔɔ lɛ aba shi. ‘Wɔmɔɔ wɔhiɛnɔkamɔ jajemɔ lɛ mli waa ni ekagbugbã.’ (Heb. 10:23) ‘Wɔhiɛ gbooo yɛ sanekpakpa lɛ he.’ (Rom. 1:16) Ekolɛ kɛ́ mɛi na hiɛnɔkamɔ kɛ ekãa ni wɔyɔɔ lɛ, no baatsirɛ amɛteŋ mɛi komɛi koni amɛbo wɔ toi.
5 Eyɛ mli akɛ ehe miihia ni wɔgbala mɛi ajwɛŋmɔ kɛya bɔ ni je lɛŋ shihilɛ yaa nɔ efiteɔ taakɛ Biblia gbalɛ etsɔɔ lɛ nɔ moŋ, shi wɔjeee mɛi ni shiɛɔ osharai ni baa lɛ ahe sane. Yɛ no najiaŋ lɛ, wɔshiɛmɔ nitsumɔ lɛ gbalaa jwɛŋmɔ kɛyaa Maŋtsɛyeli lɛ he hiɛnɔkamɔ ni wɔyɔɔ—ni ji Nyɔŋmɔ Maŋtsɛyeli lɛ he sanekpakpa lɛ nɔ. Eba akɛ wɔkɛ mɔdɛŋbɔɔ aaashiɛ sanekpakpa nɛɛ kɛ ekãa “koni ama nɔhiɛkamɔ lɛ nɔ mi kɛyashi naagbee” aha wɔ.—Heb. 6:11.