Shiɛmɔ He Tafãa ní Ehé Gbɛi Fe Fɛɛ Je Lɛŋ Fɛɛ!
Akɛ nɔ ni fa fe afii 100 eto Yehowa Odasefoi lɛ ahe gbɛjianɔ koni amɛjaje sanekpakpa lɛ. (1 Kor. 9:23) Yɛ shiɛmɔ he tafãa ní ehé gbɛi fe fɛɛ yɛ je lɛŋ fɛɛ nɛɛ mli lɛ, wɔkɛ shɛɛ sane lɛ haa yɛ wiemɔi ohai abɔ mli. Wɔkɛhaa yɛ shikpɔji ni fa fe 230 anɔ. (Mat. 24:14) Shi mɛni hewɔ nitsumɔ nɛɛ he hiaa lɛ? Ni te atsuɔ he nii ahaa tɛŋŋ yɛ je lɛŋ fɛɛ?
Vidio ni ji Jehovah’s Witnesses—Organized to Share the Good News (Yehowa Odasefoi—Ato Amɛhe Gbɛjianɔ Koni Amɛshiɛ Sanekpakpa Lɛ) lɛ haa nakai sanebimɔi lɛ ahetoo kɛtsɔ wɔnitsumɔi srɔtoi ni atsuɔ yɛ je lɛŋ fɛɛ lɛ he amaniɛbɔi fitsofitso ni ekɛhaa lɛ nɔ. Susumɔ sanebimɔi ni nyiɛ sɛɛ nɛɛ ahe beni okwɛɔ lɛ: (1) Te ato wɔnitsumɔ lɛ he gbɛjianɔ aha tɛŋŋ, ni te akudɔɔ lɛ ahaa tɛŋŋ? (2) Mɛɛ gbɛ nɔ Nitsumɔhei ni Kwɛɔ Woji Aŋmalamɔ, Wiemɔi Ashishitsɔɔmɔ, Nitɛŋmɔ, kɛ agbɛnɛ Kasɛt kɛ Vidio anɔ lɛ haa anyɛɔ atsuɔ sanekpakpa jajemɔ nitsumɔ lɛ? (3) Mɛni ji yiŋtoo ni yɔɔ woji babaoo ní wɔkalaa ni akɛmajeɔ lɛ sɛɛ? (Yoh. 17:3) (4) Woji enyiɛ akalaa yɛ afi mli? (5) Mɛni wɔ-Biblia kasemɔ woji lɛ enyɛ etsu? (Heb. 4:12) (6) Mɛni afeɔ koni eha mɛi ni enaaa nii jogbaŋŋ kɛ mɛi ni nuuu nii jogbaŋŋ lɛ anyɛ akase Biblia lɛ? (7) Nɛgbɛ anáa shika yɛ ni akɛfiɔ wɔnitsumɔ lɛ sɛɛ? (8) Mɛɛ gbɛ nɔ wɔnáa Nitsumɔhei ni Kwɛɔ Helatsamɔ He Saji, Sɔɔmɔ Nitsumɔ lɛ, kɛ Kpeei Ahe Gbɛjianɔtoi anɔ lɛ ahe sɛɛ? (9) Ákɛ Yehowa Odasefonyo lɛ, mɛɛ gbɛ nɔ vidio nɛɛ eha hiɛsɔɔ ni oyɔɔ kɛha (a) mɔdɛŋ ni Yehowa asafo lɛ bɔɔ koni anyɛ ashiɛ sanekpakpa lɛ etee hiɛ? (b) Betel wekui ni fa fe 100 ni yɔɔ je lɛŋ fɛɛ lɛ etee hiɛ? (d) gbɛjianɔ ni ato ni akɛtsɔseɔ nɔkwɛlɔi kɛ maŋsɛɛ sanekpakpa shiɛlɔi lɛ etee hiɛ? (e) sɛɛnamɔ ni yɔɔ gbi fɛɛ gbi ni akɛkwɛɔ Biblia ŋmalɛ ko mli kɛ he ni asaa kɛha asafoŋ kpeei otsi fɛɛ otsi lɛ etee hiɛ? (ɛ) sɛɛnamɔi ni wɔnáa kɛ́ wɔtee Kristofoi ahenaabuamɔi ashishi etee hiɛ etee hiɛ? (f) bɔ ni shihilɛ yɛ Paradeiso mli yɛ shikpɔŋ lɛ nɔ lɛ baaji aha etee hiɛ? (Yes. 11:9) (g) nikpamɔ nitsumɔ lɛ ni aŋkro fɛɛ aŋkro kɛ ehe woɔ mli lɛ etee hiɛ?—Yoh. 4:35.
Beni ojieɔ vidio nɛɛ otsɔɔ owekumɛi, onanemɛi, mɛi ni okuɔ osɛɛ oyasaraa amɛ yɛ shiɛmɔ nitsumɔ lɛ mli, kɛ o-Biblia kaselɔi lɛ, mɛni nibii kpakpai oyɔse? Mɛni hewɔ ojieee vidio nɛɛ ohaaa mɔ kroko, ni okɛ sanekpakpa lɛ hu aha lɛ yɛ be kukuoo ni kã wɔhiɛ nɛɛ mli?—Mat. 28:19, 20.