‘Nyɛjiea Hiɛsɔɔ Kpo Nyɛtsɔɔa’
1 Beni Yesu tsá kpitiyelɔi nyɔŋma lɛ, mɔ kome pɛ ku esɛɛ ebada lɛ shi. Yesu bi lɛ akɛ: “Ani jeee mɛi nyɔŋma he tã lɛ? Shi mɛi nɛɛhu lɛ, nɛɛgbɛ amɛyɔɔ?” (Luka 17:11-19) Kwɛ bɔ ni ehe hiaa akɛ wɔhiɛ aaasɔ nii, ni wɔda shi yɛ duromɔ nii kpakpai fɛɛ kɛ nikeenii ni hi kɛwula shi ni jɛɔ wɔ-ŋwɛi Tsɛ, Yehowa Nyɔŋmɔ, mɔ ni mli hi ni eyɔɔ suɔmɔ hu lɛ ŋɔɔ lɛ!—Kol. 3:15; Yak. 1:17.
2 Mɛɛ nibii komɛi wɔbaanyɛ wɔjie hiɛsɔɔ kpo yɛ he? Wɔhiɛ sɔɔ kpɔ̃mɔnɔ lɛ, ni ji Nyɔŋmɔ nikeenii ni fe fɛɛ ni ekɛha adesai lɛ. (Yoh. 3:16) Wɔdaa Yehowa shi hu akɛ egbala wɔ kɛba emasɛi. (Yoh. 6:44) Yiŋtoo kroko hewɔ ni esa akɛ wɔda shi lɛ ji ekomefeemɔ ni yɔɔ wɔteŋ akɛ Kristofoi lɛ. (Lala 133:1-3) Ŋwanejee ko bɛ he akɛ, nikeenii krokomɛi babaoo hu yɛ ni jɛ Yehowa ŋɔɔ. Ekã shi faŋŋ akɛ wɔsumɔŋ ni wɔtamɔ Israelbii otrumufeelɔi ni hiɛ kpá nibii ni Yehowa fee eha amɛ lɛ nɔ lɛ!—Lala 106:12, 13.
3 Jiemɔ Hiɛsɔɔ Kpo: Eyɛ mli akɛ ekolɛ kpitiyelɔi nyɔŋma lɛ fɛɛ hiɛ sɔ nɔ ni Yesu fee eha amɛ lɛ moŋ, shi mɔ kome pɛ jie hiɛsɔɔ kpo. (Luka 17:15) Nakai nɔŋŋ wɔjieɔ hiɛsɔɔ kpo kɛtsɔ ekãa ni wɔkɛtsuɔ shiɛmɔ nitsumɔ lɛ nɔ. Kɛji wɔhiɛ sɔɔ nɔ fɛɛ nɔ ni wɔ-ŋwɛi Tsɛ ni yɔɔ suɔmɔ lɛ efee eha wɔ lɛ lɛɛlɛŋ lɛ, wɔtsui baatsirɛ wɔ koni wɔjie esuɔmɔ kɛ emlihilɛ lɛ kpo kɛtsɔ mɛi krokomɛi ni wɔɔgba amɛ ehe sane lɛ nɔ. (Luka 6:45) Kɛ́ wɔgba mɛi krokomɛi ‘naakpɛɛ nii ni Yehowa tsuɔ, kɛ wɔhe ni ejwɛŋɔ babaoo lɛ,’ ehaa suɔmɔ kɛ hiɛsɔɔ ni wɔ hu wɔyɔɔ kɛha Yehowa lɛ yaa hiɛ.—Lala 40:6.
4 Ha Mɛi Krokomɛi Aná Hiɛsɔɔ: Esa akɛ wɔtao gbɛi anɔ ni wɔɔtsɔ wɔye wɔbua wɔbii kɛ wɔ-Biblia kaselɔi lɛ koni amɛjie hiɛsɔɔ kpo. Fɔlɔi yɛ gbɛi srɔtoi anɔ ni amɛaatsɔ amɛfee enɛ, tamɔ beni amɛkɛ amɛbii lɛ wieɔ nibii ni Yehowa ebɔ lɛ he lɛ nɛkɛ. (Rom. 1:20) Kɛ́ wɔmiifee Biblia mli nikasemɔ lɛ, wɔbaanyɛ wɔbi wɔ-Biblia kaselɔ lɛ akɛ, “Mɛni enɛ tsɔɔ wɔ yɛ nɔ̃ gbɔmɔ ni Yehowa ji lɛ he?” Beni hiɛsɔɔ ni Biblia kaselɔ lɛ yɔɔ lɛ yaa hiɛ lɛ, nakai nɔŋŋ suɔmɔ ni eyɔɔ kɛha Nyɔŋmɔ kɛ efaishi ni etswa akɛ ebaasa ehiɛ lɛ hu mli baawa.
5 Yɛ nɛkɛ naagbee gbii nɛɛ amli lɛ, mɛi babaoo ejieee hiɛsɔɔ kpo, ni amɛfeɔ otrumu. (2 Tim. 3:1, 2) Kwɛ bɔ ni Yehowa mii baashɛ ehe eha beni enaa etsuji ni amɛtuu amɛhe amɛha lɛ lɛ akɛ amɛmiijie hiɛsɔɔ kpo kɛtsɔ ekãa ni amɛkɛtsuɔ shiɛmɔ nitsumɔ lɛ nɔ lɛ!—Yak. 1:22-25.