Shɛjemɔ Ŋkɔmɔyelɔi lɛ Amii
1. Mɛni hewɔ esa akɛ ashɛje mɛi ni yeɔ ŋkɔmɔ lɛ amii lɛ?
1 Kɛ́ mɔ ko suɔlɔ ko gbo lɛ, ehaoɔ waa, shi mɛi ní haoɔ titri ji mɛi ni bɛ Maŋtsɛyeli hiɛnɔkamɔ lɛ. (1 Tes. 4:13) Mɛi babaoo fɔ̃ɔ bimɔ akɛ: ‘Mɛni hewɔ gbɔmɛi gboɔ? Nɛgbɛ gbohii lɛ yaa? Ani manyɛ mana misuɔlɔ ni egbo lɛ ekoŋŋ?’ Saji ni nyiɛ sɛɛ nɛɛ ji gbɛtsɔɔmɔi komɛi ni wɔbaanyɛ wɔkɛtsu nii kɛshɛje mɛi ni yeɔ amɛwekumɛi loo amɛnanemɛi ni egboi lɛ ahe ŋkɔmɔ lɛ amii yɛ shiɛmɔ nitsumɔ lɛ mli.—Yes. 61:2.
2. Kɛ́ shiatsɛ ko kɛɛ wɔ akɛ agbo yɛ enɔ lɛ, ani be fɛɛ be ni esa akɛ wɔkɛ be babaoo aye lɛ odase?
2 Yɛ Shĩa kɛ Shĩa: Ekolɛ shiatsɛ ko baakɛɛ wɔ akɛ, ewekunyo ko gbo etsɛko. Ani ehao? Ani wekumɛi ni miiye ŋkɔmɔ yɛ shĩa lɛ mli? Yɛ shihilɛi ni tamɔ nɛkɛ mli lɛ, ebaafee nɔ ni sa akɛ wɔkatsɛ yɛ jɛmɛ ni wɔkɛ miiye odase. (Jaj. 3:1, 7) Ekolɛ wɔbaanyɛ wɔye lɛ ŋkɔmɔ, wɔha lɛ dɛhiɛmɔ wolo, wolo tɛtrɛɛ, loo wolo bibioo ni kɔɔ shihilɛ lɛ he, koni no sɛɛ lɛ wɔshi lɛ. Kɛkɛ lɛ, wɔbaanyɛ wɔku wɔsɛɛ yɛ be ni sa mli koni wɔjɛ Biblia lɛ mli wɔshɛje emii babaoo.
3. Kɛ́ shihilɛ lɛ ŋmɛɔ gbɛ lɛ, mɛɛ ŋmalɛi wɔbaanyɛ wɔkɛ shiatsɛmɛi ni yeɔ ŋkɔmɔ lɛ asusu he?
3 Bei komɛi lɛ, ekolɛ wɔbaana akɛ ehe miihia ni wɔwie saŋŋ gbi klɛŋklɛŋ kwraa ni wɔkɛ mɔ ko ekpe lɛ. Eyɛ mli akɛ jeee nakai beaŋ esa akɛ wɔjaje amɛsusumɔi ni ejaaa lɛ moŋ, shi wɔbaanyɛ wɔkɛ amɛ akane shiwoi komɛi ni yɔɔ Biblia lɛ mli ni kɔɔ gbohiiashitee lɛ he. (Yoh. 5:28, 29) Aloo wɔbaanyɛ wɔkɛ amɛ asusu nɔ ni Biblia lɛ kɛɔ yɛ shihilɛ mli ni gbohii lɛ yɔɔ lɛ he. (Jaj. 9:5, 10) Ekolɛ Biblia mli saji ni kɔɔ gbohiiashitee ko he lɛ hu baanyɛ ashɛje amɛmii. (Yoh. 11:39-44) Nɔ kroko hu ni wɔbaanyɛ wɔfee ji, ni wɔkɛ amɛ asusu anɔkwafo Hiob wiemɔi ni tsɔɔ hiɛnɔkamɔ ni eyɔɔ yɛ Yehowa mli lɛ he. (Hiob 14:14, 15) Dani wɔbaashi lɛ, wɔbaanyɛ wɔkɛ woji tamɔ Mɛni Baa Wɔnɔ Kɛ́ Wɔgboi?, Beni Mɔ Ko ni Osumɔɔ Lɛ Egbo, aloo woji bibii loo dɛhiɛmɔ wolo ko ni sa aha amɛ. Aloo wɔbaanyɛ wɔshi Biblia lɛ Tsɔɔ wolo lɛ wɔha amɛ, ni wɔgbala amɛjwɛŋmɔ kɛya sane ni yɔɔ yitso 6 lɛ nɔ, koni wɔkɛ amɛ ato gbɛjianɔ ni wɔkɛ amɛ abasusu he be kroko kɛ́ wɔku wɔsɛɛ.
4. Mɛɛ shihilɛi krokomɛi amli wɔbaanyɛ wɔshɛje mɛi amii?
4 Yɛ Shihilɛi Krokomɛi Amli: Kɛ́ aafee yara lɛ yɛ Maŋtsɛyeli Asa lɛ nɔ lɛ, ani mɛi komɛi ni amɛjeee Yehowa Odasefoi lɛ baaba jɛmɛ? No lɛ, abaanyɛ ato woji komɛi ni abaanyɛ akɛshɛje mɔ mii lɛ ahe gbɛjianɔ aha amɛ. Be fɛɛ be ni obaaya yara lɛ, hiɛmɔ Biblia kɛ woji krokomɛi, ni ofee klalo akɛ obaashɛje mɛi ni yeɔ ŋkɔmɔ lɛ amii. (1 Pet. 3:15) Shĩai komɛi ni afeɔ yara yɛ mli lɛ ahiɛ esɔ woji ni shɛjeɔ mɔ mii ni akɛhaa wekui ni yeɔ ŋkɔmɔ lɛ waa. Bei komɛi lɛ, Shiɛlɔi kwɛɔ yarafeemɔ he adafitswai ni jeɔ kpo yɛ adafitswaa woji amli lɛ, ni amɛŋmalaa woji ni sɛɛ kɛlɛɛɛ tsɔ kɛshɛjeɔ wekui ni agbo yɛ amɛnɔ lɛ amii. Beni nuu okulafo ko kɛ ebiyoo nine shɛ wolo ni aŋma ni akɛ dɛhiɛmɔ woji wo mli lɛ nɔ lɛ sɛɛ lɛ, amɛtee shiɛlɔ lɛ shĩa, ni amɛyabi akɛ: “Ani nyɛji mɛi ni kɛ wolo nɛɛ maje mi lɛ? Miitao male nibii babaoo yɛ Biblia lɛ mli!” Nuu lɛ kɛ ebi yoo lɛ kpɛlɛ ni akɛ amɛ akase Biblia lɛ, ni amɛbɔi asafoŋ kpeei yaa.
5. Mɛni hewɔ esa akɛ wɔŋɔ hegbɛi fɛɛ ni wɔɔná lɛ ni wɔkɛshɛje mɛi ni yeɔ ŋkɔmɔ lɛ amii lɛ?
5 Jajelɔ 7:2 lɛ kɛɔ akɛ: “Ŋkɔmɔyeli shia yaa hi fe nɔ ni aaatee shia ni aŋmɛ okpɔlɔ yɛ mli.” No hewɔ lɛ, kɛ́ wɔfee wɔjwɛŋmɔ akɛ wɔbaaya yara ko lɛ, esa akɛ wɔha yiŋtoo ko ahi wɔjwɛŋmɔ mli. Esa akɛ wɔteŋ mɔ fɛɛ mɔ aŋɔ hegbɛi fɛɛ ni eeená lɛ ni ekɛshɛje mɛi ni yeɔ amɛsuɔlɔi ni egboi lɛ ahe ŋkɔmɔ lɛ amii.