Wɔyɛ Jwetrii ni Jara Wa ni Esa akɛ Wɔkɛ Mɛi Krokomɛi Aja
1 Nyɔŋmɔ Wiemɔ lɛ mli eyi tɔ́ kɛ mumɔŋ jwetrii babaoo, ní wɔnyaa he. (Lala 12:7; 119:11, 14) Be ko lɛ, Yesu kɛ nɔkwɛmɔnii tsu nii kɛtsɔɔ nɔ ni Maŋtsɛyeli lɛ ji lɛ mli yɛ gbɛ̀i srɔtoi anɔ, kɛkɛ ni ebi ekaselɔi lɛ akɛ: “Nyɛna nii nɛɛ fɛɛ shishi lo?” Beni amɛha hetoo akɛ amɛnu fɛɛ shishi lɛ, ekɛɛ amɛ akɛ: “No hewɔ lɛ, woloŋmalɔ fɛɛ woloŋmalɔ ni afee lɛ kaselɔ aha ŋwɛi maŋtsɛyeli lɛ, etamɔ shiatsɛ ko ni jieɔ nii heei kɛ nii memeji kɛjɛɔ ejwetri lɛŋ.”—Mat. 13:1-52.
2 Abaanyɛ akɛ Biblia mli anɔkwalei ni wɔkase beni wɔbale anɔkwale lɛ klɛŋklɛŋ kwraa lɛ ato jwetrii memeji ahe. Kɛtsɔ Nyɔŋmɔ Wiemɔ lɛ mli nibii ni mlikwɔlɔ lɛ ni wɔɔkase wɔfata nɔ ni wɔle momo lɛ ahe lɛ nɔ lɛ, wɔnaa Biblia mli anɔkwalei krokomɛi ni feɔ jwetrii heei kɛhaa wɔ. (1 Kor. 2:7) Agbɛnɛ hu, “tsulɔ anɔkwafo kɛ nilelɔ” lɛ haa wɔnuɔ jwetrii heei ashishi.—Mat. 24:45.
3 Wɔhiɛ sɔɔ nɛkɛ mumɔŋ jwetrii memeji kɛ eheei nɛɛ fɛɛ waa diɛŋtsɛ. Enɛ haa wɔshweɔ akɛ wɔɔná tsɔsemɔ kɛ niiashikpamɔ ákɛ Nyɔŋmɔ Wiemɔ lɛ tsɔɔlɔi, koni wɔjɛ ejurɔfeemɔ mli wɔkɛ mɛi krokomɛi aja anɔkwale ní jara wa ni wɔkase lɛ.
4 Kasemɔ Nii Kɛjɛ Yesu Nɔkwɛmɔnii lɛ Mli: Bɔ ni Yesu hiɛ sɔ jwetrii nɛɛ tsirɛ lɛ ni efee nɔ fɛɛ nɔ ni eenyɛ ní ekɛ mɛi krokomɛi aja. Beni etɔ lɛ po lɛ, etee nɔ ejie jwetrii ni eyɔɔ lɛ akpo.—Yoh. 4:6-14.
5 Suɔmɔ ni Yesu ná kɛha mɛi ni bɛ Nyɔŋmɔ kɛ eyiŋtoi lɛ he anɔkwa nilee lɛ tsirɛ lɛ ni eha mɛi krokomɛi le anɔkwalei ni kɔɔ Nyɔŋmɔ he ní haa wala lɛ. (Lala 72:13) Emusuŋ tsɔ lɛ yɛ mɛi ni mumɔŋ hɔmɔ yeɔ amɛ lɛ ahe, ni ‘etsɔɔ amɛ nibii pii.’—Mar. 6:34.
6 Kasemɔ Yesu: Kɛ́ wɔhiɛ sɔ jwetrii ni wɔyɔɔ lɛ taakɛ Yesu fee lɛ, ebaatsirɛ wɔ koni wɔjɛ Biblia lɛ mli tɛ̃ɛ wɔtsɔɔ amɛ anɔkwalei ni jara wa lɛ. (Abɛi 2:1-5) Eyɛ mli akɛ ekolɛ bei komɛi lɛ ebaatɔ wɔ moŋ, shi wɔkɛ miishɛɛ baawie Ŋmalɛ mli anɔkwalei lɛ ahe. (Mar. 6:34) Hiɛsɔɔ ni mli kwɔ ni wɔyɔɔ kɛha jwetrii ni wɔyɔɔ lɛ baatsirɛ wɔ koni wɔtsu babaoo yɛ sɔɔmɔ nitsumɔ lɛ mli, ni wɔbaabɔ mɔdɛŋ akɛ wɔbaatsu babaoo be fɛɛ be.