Shiɛmɔ Biɔ Tsuishiŋmɛɛ
1 Bɔfo Paulo kɛ nɔ ni fe afii 30 tsu sanekpakpa jajemɔ nitsumɔ ni haa mɔ tsui nyɔɔ emli lɛ. Taakɛ eji yɛ nifeemɔi fɛɛ ni sɛɛnamɔ yɔɔ he lɛ mli lɛ, ekɛ naagbai komɛi kpe yɛ eshiɛmɔ nitsumɔ lɛ mli. (2 Kor. 11:23-29) Kɛlɛ, Paulo efɔ̃ɔɔ shiɛmɔ. (2 Kor. 4:1) Enu shishi akɛ, hewalɛ ni ekɛaaŋmɛ etsui shi beni etsuɔ esɔɔmɔ lɛ baajɛ Yehowa ŋɔɔ. (Fil. 4:13) Tsuishiŋmɛɛ he nɔkwɛmɔnɔ ni Paulo fee lɛ hewɔ lɛ, enyɛ ewie akɛ: “Nyɛkasea mi, taakɛ bɔ ni mi hu mikaseɔ Kristo lɛ.”—1 Kor. 11:1.
2 Tsuishiŋmɛɛ yɛ Kaai Amli Ŋmɛnɛ: Daa gbi lɛ, ayeɔ wɔnyɛmimɛi lɛ babaoo ahe fɛo, ateɔ shi awoɔ amɛ, loo wekumɛi, nanemɛi nitsulɔi, kɛ nanemɛi skulbii kɛ amɛ yeee yɛ gbɛ kpakpa nɔ. (Mat. 10:35; Yoh. 15:20) Ekolɛ nakai eji yɛ bo hu ogbɛfaŋ. Yɛ gbɛ kroko nɔ lɛ, ekolɛ okɛ gbɔmɔtsoŋ naagba, loo nibii ni gbalaa mɔ jwɛŋmɔ ni kaa ohemɔkɛyeli kɛ otsuishiŋmɛɛ lɛ miikpe. Wɔbaanyɛ wɔná hewalɛwoo kɛkpee naagbai nɛɛ anaa kɛtsɔ anɔkwafoi ni hi shi yɛ blema beaŋ, kɛ wɔnanemɛi Kristofoi ni ekpee naagbai anaa lɛ anɔkwɛmɔnɔ ni wɔɔkase lɛ nɔ.—1 Pet. 5:9.
3 Kɛ́ wɔbɔ mɔdɛŋ ‘wɔwo Nyɔŋmɔ tawuu nii lɛ fɛɛ’ lɛ, wɔbaanyɛ wɔná hewalɛ ni baaha wɔfĩ shi yɛ wɔsɔɔmɔ nitsumɔ lɛ mli. (Efe. 6:10-13, 15) Ehe miihia ni wɔsɔle koni wɔnyɛ wɔŋmɛ wɔtsui shi. Nyɔŋmɔ haa wɔ emumɔ krɔŋkrɔŋ lɛ bɔni afee ni wɔnyɛ wɔŋmɛ wɔtsui shi yɛ kaai amli. (2 Kor. 6:4-7) Bɔni afee ni wɔye kunim yɛ mumɔŋ ta ni wɔwuɔ lɛ mli lɛ, esa akɛ wɔbo Nyɔŋmɔ kaimɔi lɛ atoi ní ewo wɔ hewalɛ. (Lala 119:24, 85-88) Taakɛ bɔ ni bi ko baakane wolo ni jɛ etsɛ ni sumɔɔ lɛ lɛ ŋɔɔ shii abɔ lɛ, nakai wɔ daa gbi Biblia kanemɔ lɛ haa wekukpãa ni kã wɔ kɛ Yehowa teŋ lɛ mli waa. Wɔnáa sɛɛyoomɔ ni baaha wɔnyɛ wɔkpee kaai anaa lɛ kɛtsɔ aŋkro nikasemɔ ni wɔfeɔ daa lɛ nɔ, ni no haa bɔ ni Nyɔŋmɔ susuɔ nii ahe lɛ náa wɔyiŋkpɛi anɔ hewalɛ, ni ehaa wɔyaa nɔ wɔyeɔ Yehowa anɔkwa.—Abɛi 2:10, 11.
4 Tsuishiŋmɛɛ Haa Anáa Jɔɔmɔi: Taakɛ ebalɛ yɛ Paulo sane lɛ mli lɛ, wɔtsui shi ni wɔŋmɛɔ beni wɔtsuɔ sɔɔmɔ nitsumɔ lɛ haa Yehowa tsui nyɔɔ emli, ni ekɛ jɔɔmɔi bahaa wɔ kɛ mɛi krokomɛi. (Abɛi 27:11) Eba akɛ, wɔkɛ ekãa baaya nɔ atsu shiɛmɔ nitsumɔ lɛ, ní wɔkɛ nakai feemɔ atsɔɔ akɛ wɔhemɔkɛyeli lɛ mli wa, ni “ejara wa aahu fe shika ní fiteɔ ní aka yɛ la mli.”—1 Pet. 1:6, 7.