Te Aaafee Tɛŋŋ ni Amɛaanu?
1. Mɛni hewɔ shiɛmɔ nitsumɔ lɛ baanyɛ afee nɔ ni wa lɛ, ni mɛni hewɔ wɔyaa nɔ wɔshiɛɔ lɛ?
1 Akɛni Yehowa gbi lɛ miibɛŋkɛ oyayaayai hewɔ lɛ, ehe ebahia akɛ aye abua mɛi babaoo koni amɛná Nyɔŋmɔ kɛ eyiŋtoo kɛha adesai lɛ ahe anɔkwa nilee. (Yoh. 17:3; 2 Pet. 3:9, 10) Bei komɛi lɛ enɛ feemɔ baanyɛ awa, akɛni mɛi babaoo booo wiemɔ lɛ toi loo ekolɛ amɛbaaye wɔhe fɛɔ yɛ wɔshiɛmɔ nitsumɔ lɛ mli lɛ hewɔ. (2 Pet. 3:3, 4) Fɛɛ sɛɛ lɛ, wɔyɛ yiŋtoo ní wɔɔdamɔ nɔ wɔhé wɔye akɛ mɛi babaoo yɛ wɔshikpɔŋkuku lɛ mli ni baakpɛlɛ sanekpakpa lɛ nɔ kɛ́ amɛná amɛnu he. Te mɛi nɛɛ aaafee tɛŋŋ amɛnu kɛ́ mɔ ko bɛ ni baashiɛ?—Rom. 10:14, 15.
2. Mɛɛ gbɛ nɔ bɔfo Paulo nɔkwɛmɔnɔ lɛ woɔ wɔ hewalɛ?
2 Shitee-kɛwoo Naa ní Wɔɔkpee: Akɛni mɛi babaoo miisumɔ ni amɛbo Maŋtsɛyeli shɛɛ sane lɛ toi hewɔ lɛ, esaaa akɛ wɔnijiaŋ jeɔ wui. Europa maŋtiase klɛŋklɛŋ ni bɔfo Paulo yashiɛ sanekpakpa lɛ yɛ mli ji Filipi. Beni akɛ amale naafolɔmɔi shi Paulo kɛ Sila sɛɛ lɛ, akɛ kpãai yi amɛ ni awo amɛ tsuŋ. (Bɔf. 16:16-24) Kɛlɛ, nakai niiashikpamɔ ni haa mɔ nuɔ dɔlɛ he lɛ haaa Paulo akpá shiɛmɔ yɛ gbeyeishemɔ hewɔ. Beni eshi Filipi kɛtee Tesalonika yɛ emaŋsɛɛ sanekpakpa shiɛmɔ nitsumɔ lɛ mli lɛ, ‘ená ekãa yɛ Nyɔŋmɔ mli.’ (1 Tes. 2:2) Ani Paulo nɔkwɛmɔnɔ lɛ emaaa nɔ̃ hewɔ ní ‘esaaa akɛ wɔnijiaŋ jeɔ wui’ lɛ nɔ mi?—Gal. 6:9.
3. Mɛni baanyɛ aha mɛi atsake amɛtsui, eyɛ mli akɛ tsutsu ko lɛ amɛbɛ wiemɔ lɛ he miishɛɛ?
3 Mɛi babaoo ní afii pii nɛ lɛ amɛbooo wɔ toi lɛ etsake amɛtsui. Shika he naagba ni baa trukaa, hela, wekunyo ko gbele, loo amaniɛbɔɔ ni kɔɔ nibii ni haoɔ mɔ ni yaa nɔ yɛ je lɛŋ fɛɛ lɛ he lɛ baanyɛ aha mɛi atsake. (1 Kor. 7:31) Mɛi komɛi ni amɛfɔlɔi te shi amɛwo wɔ lɛ edara amɛbatsɔmɔ onukpai, ni amɛmiisumɔ ni amɛbo toi. Kɛ́ wɔtee nɔ wɔshiɛ lɛ, ebaaha mɛi nɛɛ aná hegbɛ ni amɛbo ‘amɛtsɛ Yehowa gbɛi lɛ’ dani efee nɔ ni ekpe sɛɛ tsɔ.—Rom. 10:13.
4. Mɛni tsirɛɔ wɔ koni wɔya nɔ yɛ shiɛmɔ nitsumɔ lɛ mli ní ‘wɔkafɔ̃ɔ’?
4 ‘Wɔfɔ̃ɔɔ’ Shiɛmɔ: Suɔmɔ ni wɔyɔɔ kɛha Nyɔŋmɔ kɛ wɔnanemɛi lɛ baatsirɛ wɔ koni ‘wɔkafɔ̃ɔ’ shiɛmɔ kɛ kaselɔfeemɔ nitsumɔ lɛ, taakɛ bɔ ni bɔfoi lɛ fee yɛ klɛŋklɛŋ afii 100 lɛ mli lɛ. (Bɔf. 5:42) Mɛi ni yɔɔ ŋmɛnɛ lɛ ateŋ mɛi babaoo “dɔmɔɔ ŋtsɔi ni amɛyeɔ ŋkɔmɔ yɛ nihiinii fɛɛ” ni yaa nɔ amrɔ nɛɛ he. (Ezek. 9:4) Kwɛ hiɛnɔkamɔ kɛ miishɛɛ ni mɛi nɛɛ náa kɛ́ amɛnine shɛ sanekpakpa lɛ nɔ! Kɛ́ mɛi babaoo kpoo akɛ amɛaabo wɔ toi po lɛ, Ŋmalɛ lɛ maa nɔ mi kɛhaa wɔ akɛ Yehowa hiɛ sɔɔ wɔmɔdɛŋbɔi lɛ jogbaŋŋ diɛŋtsɛ.—Heb. 13:15, 16.