‘Nyɛhia Nyɔŋmɔ Suɔmɔ lɛ Mli’
1. Mɛɛ yiŋtoo hewɔ afee ‘Nyɛhia Nyɔŋmɔ Suɔmɔ lɛ Mli’ wolo lɛ?
1 Kwɛ bɔ ni wɔshweɔ akɛ yɛ otsi ni jeɔ shishi February 23 lɛ, wɔbaakase wolo hee ni gbɛi ji ‘Nyɛhia Nyɔŋmɔ Suɔmɔ lɛ Mli’ yɛ Asafoŋ Biblia Nikasemɔ lɛ shishi! Nɔyeli Kuu lɛ mu wolo ni eŋma eha mɛi fɛɛ ni sumɔɔ Yehowa lɛ naa kɛ wiemɔi nɛɛ akɛ: “Wɔyɛ hiɛnɔkamɔ diɛŋtsɛ akɛ wolo nɛɛ baaye abua bo ní oya nɔ ohi shi yɛ anɔkwale lɛ naa ní no aha ohi ‘Nyɔŋmɔ suɔmɔ lɛ mli, koni oná naanɔ wala.’—Yuda 21.”
2. Wolo hee nɛɛ baaye abua wɔ yɛ mɛɛ shihilɛi amli?
2 Nɔ ni Wɔbaakase: Mɛɛ gbɛ nɔ wɔbaanyɛ wɔkɛ Biblia mli shishitoo mlai atsu shihilɛi tamɔ naanyobɔɔ, hiɛtserɛjiemɔ, bulɛ ni aaajie lɛ kpo atsɔɔ mɛi ni kwɛɔ wɔ nɔ, jeŋba, gbalashihilɛ, wiemɔi, kɛ kusumii ahe nii? Nikasemɔ lɛ baaye abua wɔ ni wɔtsɔse wɔhenilee koni ekɛ jalɛ shishitoo mlai ni nɔ kwɔlɔ ní yɔɔ Nyɔŋmɔ Wiemɔ lɛ mli lɛ akpã gbee. (Lala 19:8, 9) Beni shishinumɔ ni wɔyɔɔ yɛ bɔ ni Yehowa susuɔ nibii ahe ehaa lɛ yaa hiɛ lɛ, shwelɛ ni wɔyɔɔ akɛ wɔbaasa ehiɛ lɛ baatsirɛ wɔ koni wɔbo lɛ toi yɛ wɔshihilɛ gbɛ̀i fɛɛ amli.—Abɛi 27:11; 1 Yoh. 5:3.
3. Mɛni hewɔ esa akɛ wɔbɔ mɔdɛŋ ni wɔkɛ wɔhe awo nikasemɔ lɛ mli daa otsi lɛ?
3 Tswaa Ofai Shi Akɛ Okɛ Ohe Baawo Mli: Be mli ni osaa ohe lɛ, ha efee oti ni ma ohiɛ akɛ obaajie Nyɔŋmɔ yi yɛ ewebii lɛ ateŋ. (Heb. 13:15) Asafo muu lɛ fɛɛ baakase wolo hee nɛɛ. Akɛni abaakase wolo lɛ mli saji fioo ko pɛ daa otsi hewɔ lɛ, wɔ fɛɛ wɔbaaná hegbɛ kɛsaa wɔhe jogbaŋŋ bɔni afee ni wɔná ekãa ni wɔkɛ wɔhe awo nɔ ni wɔbaakase lɛ mli. Wɔsaji ahetoo ni yɔɔ tɛ̃ɛ ni tsɔɔ wɔhe ni wɔsaa lɛ baawo mɛi krokomɛi hewalɛ ni amɛhiɛ adɔ suɔmɔ kɛ nitsumɔi kpakpai ahe, ni no baaye abua ni sane ni wɔsusuɔ he lɛ afee nɔ ni yɔɔ miishɛɛ ní mli kã shi faŋŋ. (Heb. 10:24) Agbɛnɛ hu lɛ, wɔmiishɛɛ lɛ baafa babaoo beni wɔhaa saji ahetoo yɛ wɔhemɔkɛyeli lɛ he lɛ.
4. Mɛni hewɔ ehe hiaa waa akɛ wɔye Yehowa mlai lɛ anɔ lɛ?
4 Yɛ naagbee gbɛkɛ ni Yesu ye yɛ shikpɔŋ lɛ nɔ akɛ adesa lɛ, etsɔɔ akɛ esa akɛ wɔye Yehowa mlai lɛ anɔ bɔni afee ni wɔhi Nyɔŋmɔ suɔmɔ lɛ mli. (Yoh. 15:10) Wolo ni ji ‘Nyɔŋmɔ Suɔmɔ’ lɛ baaye abua wɔ ni wɔtswa wɔfai shi akɛ, wɔkɛ Biblia shishitoo mlai baatsu nii yɛ wɔ daa gbi shihilɛ mli fe be fɛɛ ni eho, ní ‘wɔhi Nyɔŋmɔ suɔmɔ lɛ mli.’—Yuda 21.