Tafãa Krɛdɛɛ ní Akɛbaatswa Kaimɔ lɛ He Adafi!

1. Mɛni Maŋtsɛyeli shiɛlɔi baafee yɛ je lɛŋ fɛɛ kɛjɛ March 21, 2009, ni mɛni hewɔ?

¹ Yehowa Nyɔŋmɔ jálɔi ni yɔɔ je lɛŋ fɛɛ lɛ baabua amɛhe naa yɛ Soo, April 9, 2009 ni amɛkai Nyɔŋmɔ suɔmɔ ni fe fɛɛ kɛha adesai lɛ. (Rom. 5:6-8) Wɔkɛ miishɛɛ miikpa gbɛ akɛ mɛi akpekpei abɔ ni yɔɔ wiemɔ lɛ he miishɛɛ lɛ baafata wɔhe be ni wɔkaiɔ Yesu gbele lɛ. Abaaja Kaimɔ lɛ he ninefɔ̃ɔ wolo krɛdɛɛ ko yɛ je lɛŋ fɛɛ kɛjɛ March 21 kɛyaa.

2. Mɛɛ nibii esa akɛ oha ehi ojwɛŋmɔŋ beni okɛ ninefɔ̃ɔ wolo lɛ haa lɛ?

² Nibii ni Esa akɛ Wɔha Ehi Wɔjwɛŋmɔŋ: Okɛ nɔkwɛmɔnii, sanebimɔi, kɛ ŋmalɛi ni aŋmalako amɛmli wiemɔi ni yɔɔ ninefɔ̃ɔ wolo lɛ nɔ lɛ atsu nii jogbaŋŋ. Ákɛ nɔkwɛmɔnɔ lɛ, obaanyɛ okɛ mfoniri ni yɔɔ wolo lɛ hiɛ lɛ atsɔɔ mɔ lɛ ni okɛɛ akɛ: “Miisumɔ ni mafɔ̃ bo nine koni obafata wɔhe kɛkai Yesu gbele lɛ yɛ Soo, April 9, 2009.” No sɛɛ lɛ, okɛ saneyitso ni yɔɔ ninefɔ̃ɔ wolo lɛ nɔ lɛ kɛ sanebimɔi ni fata he lɛ atsɔɔ lɛ. Bɔɔ mɔdɛŋ ni oma nɔ mi oha shiatsɛ lɛ akɛ, ebaanyɛ efɔ̃ eweku lɛ kɛ mɛi krokomɛi ni ebaasumɔ ni ekɛ amɛ aba lɛ nine efata ehe.

3. Kɛ́ ooku osɛɛ oyasara mɔ ko ni okɛ ninefɔ̃ɔ wolo lɛ eko ha lɛ yɛ tafãa lɛ mli lɛ, mɛni esa akɛ ofee?

³ Kɛ́ nyɛsafo lɛ shikpɔŋkuku lɛ da lɛ, ekolɛ onukpai lɛ kɛ gbɛtsɔɔmɔ baaha nyɛ koni kɛ́ nyɛnaaa mɛi yɛ shĩa lɛ, nyɛshi ninefɔ̃ɔ wolo lɛ yɛ amɛshinaai anaa. Yɛ otsii anaagbee lɛ, nyɛkɛ ninefɔ̃ɔ wolo lɛ kɛ woji tɛtrɛbii lɛ fɛɛ ahaa. Ha efee oti ni ma ohiɛ akɛ obaafɔ̃ mɛi ni obaaku osɛɛ oyasara amɛ, o-Biblia kaselɔi, owekumɛi, onanemɛi skulbii, onanemɛi nitsulɔi, okutsoŋbii, kɛ mɛi krokomɛi ni ole lɛ nine. Nyɛsɛɛ afi lɛ, nyɛmiyoo ko fɔ̃ ewekumɛi 30 nine, no sɛɛ lɛ ekai amɛ bɔ ni nifeemɔ lɛ he hiaa ha lɛ yɛ be kɛ beaŋ. Emii shɛ ehe waa akɛ amɛteŋ mɛi 25 tee, ni sɛɛ mli lɛ mɛi 4 kpɛlɛ ni akɛ amɛ akase Biblia lɛ!

4. Mɛɛ gbɛjianɔ esa akɛ wɔto bianɛ, ni mɛni hewɔ?

⁴ Too Gbɛjianɔ Bianɛ: Shiɛlɔi pii baanyɛ amɛtsu babaoo yɛ shiɛmɔ nitsumɔ lɛ mli yɛ March kɛ April mli. Kɛ́ oyɛ bii loo Biblia kaselɔi ni miiya amɛhiɛ waa lɛ, be nɛɛ baanyɛ afee be ni sa jogbaŋŋ akɛ amɛaatsɔmɔ shiɛlɔi ni abaptisiko amɛ. Amrɔ nɛɛ ji be ni sa jogbaŋŋ akɛ obaato gbɛjianɔ koni okɛ ohe awo tafãa nɛɛ ni tswaa suɔmɔ kpojiemɔi enyɔ ni fe fɛɛ ni abaakai lɛ he adafi lɛ mli.—Yoh. 3:16; 15:13.