Jiemɔ Yehowa Yi Gbi Fɛɛ Gbi
1. Mɛni awoɔ Nyɔŋmɔ tsuji hewalɛ ni amɛfee, ni mɛni hewɔ?
1 Maŋtsɛ David tswa efai shi akɛ ebaajie Yehowa yi “gbi fɛɛ gbi,” kɛaatee naanɔ. (Lala 145:2, 7, 21) Wɔ hu wɔyɛ yiŋtoo kpakpa hewɔ ni esa akɛ wɔjie Yehowa yi gbi fɛɛ gbi.—Lala 37:10; 145:14, 18; 2 Pet. 3:13.
2. Mɛɛ gbɛ nɔ wekui baanyɛ ajie Yehowa yi gbi fɛɛ gbi?
2 Yɛ Wɔshiai Amli: Wɔyɛ woji ni akala ni tswaa mɔ emaa shi kɛha mumɔŋ nibii ahe susumɔ ni yeɔ ebua wɔ beni wɔsusuɔ daa gbi ŋmalɛ lɛ he, beni wɔfeɔ Weku Jamɔ kɛ beni wɔsaa wɔhe kɛha asafoŋ kpee. Wekui babaoo bɔɔ mɔdɛŋ akɛ kɛhoo kwraa lɛ amɛkpe kutuu kɛye nii shikome yɛ gbi lɛ mli. Enɛ haa amɛnáa be kɛgbaa sane, ni ehaa amɛnáa hegbɛi kɛjieɔ Yehowa yi. Kɛ́ fɔlɔi kɛ amɛbii fɔɔ sanegbaa yɛ nɛkɛ gbɛ nɔ lɛ, ebaanyɛ efee gbɛ ni hi jogbaŋŋ ni amɛaatsɔ nɔ amɛtsɔse amɛbii lɛ yɛ “Nuŋtsɔ [Yehowa] lɛ tsɔsemɔ kɛ ŋaawoo lɛ mli.”—Efe. 6:4; 5 Mose 6:5-7.
3. Mɛɛ hegbɛi wɔnáa kɛ́ wɔkɛ wɔnyɛmimɛi lɛ kpe?
3 Wɔkɛ Wɔnyɛmimɛi Lɛ: Wɔyɛ hegbɛ kpele ni wɔkɛ wɔnanemɛi Kristofoi krokomɛi lɛ aaajie Yehowa yi beni wɔtsuɔ shiɛmɔ nitsumɔ lɛ loo yɛ kpeei ashishi. (Abɛi 15:30; Fili. 4:8; Heb. 13:15) Akɛni wɔ fɛɛ wɔyɛ suɔmɔ kɛha Yehowa hewɔ lɛ, esaaa akɛ ewaa kɛhaa wɔ akɛ wɔɔwie nibii kpakpai ni Yehowa efee eha wɔ lɛ he beni wɔkɛ wɔnyɛmimɛi gbaa sane lɛ.—Lala 106:1.
4. Mɛɛ shihilɛi amli wɔbaanyɛ wɔjie Yehowa yi?
4 Kɛ́ Wɔkɛ Mɛi ni Heee Yeee Miigba Sane: Eyɛ mli akɛ shihilɛ lɛ haŋ wɔnyɛ wɔkɛ wɔhe awo shiɛmɔ nitsumɔ lɛ mli daa gbi moŋ, shi nanemɛi nitsulɔi, skulbii kɛ mɛi krokomɛi ni wɔkɛaagba Yehowa kɛ eyiŋtoi ahe sane kuku lɛ baaye abua mɛi ni tsui ja lɛ ni amɛná hiɛnɔkamɔ. (Lala 27:14; 1 Pet. 3:15) Beni nyɛmi yoo ko kɛ kɔɔyɔŋ lɛlɛ ko fãa gbɛ lɛ, enyɛ eye mɔ ko ni tá emasɛi lɛ odase, ni nɔ ni ekɛɛ mɔ lɛ shɛje emii ni ewo lɛ hewalɛ aahu akɛ ekɛ etɛlifoŋ nɔmba kɛ edrɛs ha nyɛmi yoo lɛ koni amɛnyɛ amɛtsa sanegbaa lɛ nɔ. Beni je lɛ mli shihilɛ fiteɔ ni naagbai amli woɔ wu lɛ, Yehowa tsuji miiya nɔ amɛkɛ “nɔ̃ kpakpa ko he sane kpakpa” miiha mɛi ni feɔ toiboo lɛ. Enɛ haa amɛnáa hiɛnɔkamɔ, ni etsirɛɔ amɛ ni amɛjieɔ Yehowa yi.—Yes. 52:7, NW; Rom. 15:11.
5. Mɛni hewɔ wɔshweɔ akɛ wɔjie Yehowa yi lɛ, ni mɛni baanyɛ ajɛ mli kɛba?
5 Eŋɔɔ Yehowa naa waa kɛ́ enu ni etsuji miijie eyi gbi fɛɛ gbi. Taakɛ Yehowa adebɔɔ nibii ni ebɔle wɔhe lɛ ji lɛ, wɔ hu wɔbaanyɛ wɔjie Yehowa yi gbi fɛɛ gbi yɛ wɔshĩai amli, yɛ asafo lɛ mli kɛ beni wɔkɛ mɛi krokomɛi ni fataaa Yehowa yijielɔi ahe lɛ gbaa sane lɛ.—Lala 19:2-5.