Sanebimɔ He

◼ Ani Esa akɛ Yehowa Odasefoi ajara wiemɔi ni aha ni arikɔdi loo aŋmala awo woji anɔ lɛ amɛha mɛi krokomɛi?

Biblia mli wiemɔi srɔtoi ni ahaa lɛ woɔ wɔ hewalɛ ni ekanyaa wɔ. (Bɔf. 15:32) Enɛ hewɔ lɛ, ewaaa kwraa akɛ wɔbaasumɔ ni wɔkɛ mɛi krokomɛi ni bɛ kpee lɛ shishi lɛ aja hewalɛwoo wiemɔi ni tamɔ nɛkɛ. Akɛni afee tsɔji srɔtoi ni akɛrikɔdiɔ nii hewɔ lɛ, ewaaa kwraa akɛ abaarikɔdi wiemɔ ko ní ajara aha mɛi krokomɛi. Mɛi komɛi ebua wiemɔi ni amɛrikɔdi lɛ babaoo naa, ni wiemɔi ni aha afii babaoo ni eho nɛ lɛ hu fata he, ni amɛkɛ rikɔdiŋ nɛɛ maa amɛnanemɛi loo amɛfeɔ eko amɛhaa amɛ kɛ jwɛŋmɔ kpakpa. Mɛi komɛi hu egbele Web sites ni amɛkɛ wiemɔi ni aha lɛ woɔ jɛmɛ koni mɛi ni sumɔɔ lɛ ajie.

Yɛ anɔkwale mli lɛ, tɔmɔ ko bɛ he akɛ wɔbaarikɔdi wiemɔi ni ahaa lɛ wɔha wɔ diɛŋtsɛ wɔhe loo kɛha wɔweku lɛ mlibii. Kɛfata he lɛ, asafoŋ onukpai lɛ baanyɛ ato gbɛjianɔ koni arikɔdi wiemɔi aha asafo lɛ mlibii ni bɛ gbɔmɔtsoŋ hewalɛ ni nyɛɛɛ aba kpeei lɛ. Shi kɛlɛ, wɔyɛ yiŋtoi kpakpai ahewɔ ni esaaa akɛ wɔjaraa wiemɔi ni arikɔdi loo aŋmala awo woji anɔ lɛ.

Akɛni bei pii lɛ, adamɔɔ asafo lɛ hiamɔ nii anɔ ahaa wiemɔi hewɔ lɛ, ekolɛ wɔbaanu otii komɛi ni yɔɔ rikɔdiŋ lɛ mli lɛ shishi yɛ gbɛ ni ejaaa nɔ akɛni wɔleee shihilɛ mli ni ajɛ aha nakai wiemɔ lɛ hewɔ. Kɛfata he lɛ, ebaawa kɛha wɔ akɛ wɔɔle mɔ ni ha wiemɔ lɛ kɛ be ni ekɛha, bɔni afee ni wɔná nɔmimaa akɛ saji ni awie lɛ yɛ ebe naa ni eja hu. (Luka 1:1-4) Agbɛnɛ hu lɛ, wiemɔi ni arikɔdi loo aŋmala awo woji anɔ ní wɔbaajara lɛ baanyɛ aha mɛi komɛi agbala jwɛŋmɔ kɛya wielɔi komɛi anɔ loo amɛkɛ woo aha amɛ bɔ ni esaaa.—1 Kor. 3:5-7.

Tsulɔ anɔkwafo kɛ nilelɔ kuu lɛ bɔɔ mɔdɛŋ akɛ eha wɔ mumɔŋ niyenii ni fa bɔ ni sa “yɛ be ní sa mli.” (Luka 12:42) Nɔ ni fata niyenii nɛɛ he ji gbɛjianɔ ni atoɔ koni aha wiemɔ yɛ Yehowa Odasefoi asafoi srɔtoi lɛ amli kɛ rikɔdiŋ srɔtoi ni abaanyɛ ajie kɛjɛ intanɛt lɛ nɔ yɛ jw.org Web site lɛ. Wɔbaanyɛ wɔná nɔmimaa akɛ tsulɔ anɔkwafo kɛ nilelɔ lɛ kɛ e-Nɔyeli Kuu lɛ kɛ nɔ ni he baahia wɔ lɛ baaha wɔ bɔni afee ni wɔnyɛ wɔfĩ shi shiŋŋ yɛ hemɔkɛyeli lɛ mli.—Bɔf. 16:4, 5.