Sɔlemɔ kɛ Niianɔjwɛŋmɔ He Miihia Shiɛlɔi Koni Amɛkɛ Hiɛdɔɔ Ashiɛ
1. Mɛni ye ebua Yesu koni nɔ ko akagbala ejwɛŋmɔ kɛjɛ enitsumɔ titri lɛ nɔ?
1 Gbi ko gbɛkɛ lɛ, Yesu tsa mɛi ahelai ni efamɔ daimonioi. Enɔ jetsɛremɔ beni ekaselɔi lɛ na lɛ lɛ, amɛkɛɛ lɛ akɛ: “Bo, mɛi fɛɛ taoɔ nɛɛ,” ni amɛkɛwo lɛ hewalɛ koni eya nɔ etsu enaakpɛɛ nitsumɔi lɛ. Shi Yesu haaa nɔ ko agbala ejwɛŋmɔ kɛjɛ enitsumɔ titri ni ji sanekpakpa lɛ shiɛmɔ nɔ. Ekɛɛ amɛ akɛ: “Nyɛhaa wɔyaa maji ní jwere wɔhewɔhewɔ nɛɛ amli, koni mayashiɛ yɛ jɛi hu; ejaakɛ no hewɔ miba.” Mɛni ye ebua Yesu ni etee nɔ ekɛ ejwɛŋmɔ ma enitsumɔ titri lɛ nɔ? No mli lɛ, ete shi leebi mra ni eyasɔle ni ejwɛŋ nii anɔ. (Mar. 1:32-39) Mɛɛ gbɛ nɔ sɔlemɔ kɛ niianɔjwɛŋmɔ baanyɛ aye abua wɔ hu koni wɔkɛ hiɛdɔɔ ashiɛ?
2. Mɛɛ nibii wɔbaanyɛ wɔjwɛŋ nɔ koni eye ebua wɔ ni wɔya nɔ wɔkɛ hiɛdɔɔ atsu sɔɔmɔ nitsumɔ lɛ?
2 Mɛɛ Nibii Wɔbaanyɛ Wɔjwɛŋ Nɔ? Yesu yɔse akɛ “etɔ” mɛi, ni “amɛfee yuyaa tamɔ tooi ni bɛ kwɛlɔ.” (Mat. 9:36) Nakai nɔŋŋ wɔbaanyɛ wɔjwɛŋ bɔ ni sanekpakpa lɛ he hiaa mɛi waa lɛ nɔ. Wɔbaanyɛ wɔjwɛŋ bɔ ni be ni eshwɛ lɛ faaa dɔŋŋ lɛ hu nɔ. (1 Kor. 7:29) Wɔbaanyɛ wɔsusu Yehowa nitsumɔi kɛ esui, hegbɛ ni wɔná akɛ wɔji Yehowa Odasefoi, kɛ mumɔŋ jwetrii ni jara wa ni wɔkase kɛjɛ Nyɔŋmɔ Wiemɔ lɛ mli ni mɛi ni yɔɔ wɔshikpɔŋkuku lɛ mli lɛ leee lɛ ahe.—Lala 77:12-14; Yes. 43:10-12; Mat. 13:52.
3. Mɛɛ be wɔbaanyɛ wɔjwɛŋ nii anɔ?
3 Mɛɛ Be Wɔbaanyɛ Wɔjwɛŋ Nii Anɔ? Taakɛ Yesu fee lɛ, mɛi komɛi teɔ shi leebi mra beni jeŋ efee dioo ni amɛjwɛŋɔ nii anɔ. Mɛi komɛi hu ena akɛ, be ni hi jogbaŋŋ kɛha niianɔjwɛŋmɔ ji gbɛkɛ dani amɛbaaya saa mli. (1 Mose 24:63) Kɛ́ wɔbɛ dekã kwraa po lɛ, wɔbaanyɛ wɔtao be ni wɔkɛjwɛŋ nii anɔ. Mɛi komɛi jwɛŋɔ nii anɔ beni amɛta tsɔne mli. Mɛi krokomɛi hu kɛ amɛshwane hejɔɔmɔ be lɛ fã ko jwɛŋɔ nii anɔ beni nɔ ko gbalaaa amɛjwɛŋmɔ. Mɛi babaoo ena akɛ kɛ́ amɛkɛ minitii fioo po jwɛŋ nii anɔ dani amɛtee shiɛmɔ lɛ, eyeɔ ebuaa amɛ ni amɛkɛ hiɛdɔɔ kɛ ekãa babaoo shiɛɔ.
4. Mɛni hewɔ esa akɛ wɔjwɛŋ nii anɔ?
4 Sɔlemɔ kɛ niianɔjwɛŋmɔ baaha shwelɛ ni wɔyɔɔ akɛ wɔsɔmɔ Yehowa lɛ mli awa, ebaaha wɔkɛ wɔjwɛŋmɔ ama mumɔŋ nibii anɔ titri, ni ebaawaje wɔfai shi ni wɔtswa akɛ wɔbaaya nɔ wɔshiɛ lɛ. Yesu ni ji Nyɔŋmɔ Sɔɔlɔ Nukpa lɛ ná nii anɔ ni ejwɛŋ lɛ he sɛɛ, ni nakai nɔŋŋ wɔ hu wɔbaaná he sɛɛ.