Wɔbaaye Odase Kpele Ko
1. Kɛfata wiemɔ ni abaaha lɛ he lɛ, mɛni hu ekolɛ gbɔi ni baaba Kaimɔ lɛ ahiɛ baasɔ? Tsɔɔmɔ mli.
1 Mɛɛ be? Gbi gbɛkɛ ni abaaye Kaimɔ lɛ. Enɛ hewɔ lɛ, aabɔ mɔdɛŋ waa akɛ abaafɔ̃ mɛi babaoo nine koni amɛbafata wɔhe kɛye Kaimɔ lɛ. Jeee nɔ ni gbɔi ni baa Kaimɔ lɛ nuɔ lɛ pɛ amɛhiɛ sɔɔ. Yoo ko ni tee Kaimɔ lɛ eko lɛ wie nɔ ni ena lɛ he—ewie naanyobɔɔ su ni mɔ fɛɛ mɔ jie kpo etsɔɔ lɛ kɛ tsũ fɛfɛo ni emli kɛ ehewɔŋ fɛɛ tse keŋkeŋ, ni mɛi jɛ amɛsuɔmɔ mli amɛkɛ amɛhe ha kɛma ni amɛkura lɛ lɛ he. No hewɔ lɛ, jeee wielɔ lɛ pɛ, shi esa akɛ wɔ fɛɛ wɔye wɔbua kɛye odase yɛ nifeemɔ nɛɛ ni he hiaa fe fɛɛ yɛ afi lɛ mli lɛ shishi.—Efe. 4:16.
2. Mɛɛ gbɛ nɔ wɔteŋ mɔ fɛɛ mɔ baanyɛ aye gbɔi lɛ odase?
2 Okɛ Miishɛɛ Aŋa Gbɔi Lɛ: Kɛ́ wɔkɛ hiɛ ŋmɔlɔŋmɔlɔ kɛ miishɛɛ here gbɔi lɛ, ebaafee odaseyeli kɛha amɛ. (Yoh. 13:35) Kɛ́ onyɛɛɛ okɛ mɔ fɛɛ mɔ awie po lɛ, obaanyɛ okɛ miishɛɛ aŋa mɛi ni yɔɔ omasɛi lɛ ni otsɔɔ amɛ ogbɛi. (Heb. 13:1, 2) Okɛ ohiɛ afɔ̃ shi ni okwɛ akɛ obaana gbɔi ni etamɔ nɔ ni amɛleee mɔ ko mɔ ko lɛ lo. Ekolɛ amɛnine shɛ ninefɔ̃ɔ wolo lɛ eko nɔ yɛ tafãa be lɛ mli. Obaanyɛ obi akɛ, “Ani enɛ ji klɛŋklɛŋ ni obaa biɛ?” Ha ebata omasɛi, ni oha ele akɛ, kɛ́ eyɛ sanebimɔi komɛi lɛ, obaasumɔ ni oha hetoo. Kɛ́ esa akɛ nyɛsafo lɛ ashi he ni afee Kaimɔ lɛ yɛ lɛ oya nɔŋŋ nyɛha asafo kroko lɛ, obaanyɛ obi akɛ: “Te ona nifeemɔ lɛ tɛŋŋ? Te mafee tɛŋŋ minine ashɛ onɔ lɛ?”
3. Mɛɛ gbɛ nɔ wɔɔtsɔ wɔhere mɛi ni ekpa shiɛmɔyaa lɛ hiɛmɛɛ?
3 Heremɔ Mɛi ni Ekpa Shiɛmɔyaa lɛ Hiɛmɛɛ: Ŋwanejee ko bɛ he akɛ, mɛi ni ekpa shiɛmɔyaa, ni amɛteaŋ mɛi komɛi lɛ, ja daa afi Kaimɔ lɛ shishi pɛ anaa amɛ yɛ lɛ baaba Kaimɔ lɛ. Heremɔ amɛ atuu, ni oha amɛle akɛ eŋɔɔ onaa waa akɛ amɛba. (Rom. 15:7) Asafoŋ onukpai lɛ baanyɛ aya amɛshĩai kɛ́ agbe Kaimɔ lɛ naa etsɛɛɛ nɔŋŋ, ni amɛyawo amɛ hewalɛ ni amɛya nɔ amɛkɛ asafo lɛ abɔ. Wɔshwelɛ ji akɛ, mɛi ni baaba Kaimɔ lɛ ateŋ mɛi babaoo baawo Nyɔŋmɔ hiɛ nyam, yɛ nɔ ni amɛbaanu lɛ kɛ agbɛnɛ hu ‘wɔnitsumɔi kpakpai lɛ ni amɛbaana lɛ’ hewɔ.—1 Pet. 2:12.