Sanebimɔhe
◼ Mɛni esa akɛ wɔkwɛ kɛji wɔbaaha mɔ ko wɔwoji lɛ eko?
Nɔ ni he hiaa fe fɛɛ ni esa akɛ wɔkwɛ ji bɔ ni mɔ lɛ yɔɔ he miishɛɛ. Kɛ́ mɔ lɛ jɛ etsuiŋ ejie miishɛɛ kpo lɛ, wɔbaanyɛ wɔha lɛ woji tɛtrɛbii lɛ enyɔ, loo wolo bibioo kome, loo wolo kome, loo wolo kroko ni wɔkɛhaa yɛ shiɛmɔ nitsumɔ lɛ mli lɛ. Nakai esa akɛ wɔfee kɛji wɔyɔse po akɛ mɔ lɛ bɛ shika loo shika fioo pɛ eyɔɔ ni ekɛaafi jeŋ muu fɛɛ nitsumɔ lɛ sɛɛ. (Hiob 34:19; Kpoj. 22:17) Nɔ ni tamɔɔɔ nakai lɛ, esaaa akɛ wɔkɛ wɔwoji ni he yɔɔ sɛɛnamɔ waa lɛ haa mɛi ni hiɛ esɔɔɔ wɔwoji lɛ.—Mat. 7:6.
Te wɔɔfee tɛŋŋ wɔna akɛ shĩatsɛ ko miijie miishɛɛ kpo? Kɛ́ mɔ lɛ miisumɔ ni ekɛ wɔ agba sane lɛ, no tsɔɔ akɛ eyɛ wiemɔ lɛ he miishɛɛ. Kɛ́ ebo wɔ toi beni wɔwieɔ lɛ, eha saji ni wɔbiɔ lɛ lɛ ahetoo, ni etsɔɔ ejwɛŋmɔ lɛ, no tsɔɔ akɛ ekɛ ehe miiwo sanegbaa lɛ mli. Kɛ́ enyiɛ sɛɛ beni wɔkaneɔ Biblia lɛ, no tsɔɔ akɛ ebuɔ Nyɔŋmɔ Wiemɔ lɛ. Bei pii lɛ, ehi akɛ wɔbi lɛ akɛ ebaakane wolo ni wɔkɛhaa lɛ lɛ lo. Esa akɛ shiɛlɔi kɛ hiɛshikamɔ atsu nii kɛkwɛ kɛji mɔ lɛ yɛ he miishɛɛ. Ákɛ nɔkwɛmɔnɔ lɛ, kɛ́ wɔmiiye odase yɛ gbɛjegbɛi ahe lɛ, ebafeŋ nɔ ni hi akɛ wɔɔjara woji tɛtrɛbii, woji bibii, loo woji wuji wɔha mɔ fɛɛ mɔ ni hoɔ lɛ kɛkɛ. Kɛ́ wɔnyɛɛɛ wɔna kɛji mɔ lɛ yɛ he miishɛɛ loo ebɛ he miishɛɛ lɛ, no lɛ ebaahi jogbaŋŋ akɛ wɔha lɛ ninefɔ̃ɔ wolo loo dɛhiɛmɔ wolo.
Nakai nɔŋŋ jeee onia falɛ ni shiɛlɔ ko baanyɛ atsu lɛ nɔ esa akɛ edamɔ ekɔlɔ woji yɛ woji akɔlɔmɔhe lɛ, shi moŋ woji abɔ ni etaoɔ ekɛtsu nii yɛ shiɛmɔ nitsumɔ lɛ mli lɛ. Akɛ oniai ni atsuɔ lɛ fiɔ wɔjeŋ muu fɛɛ shiɛmɔ nitsumɔ lɛ fãi srɔtoi lɛ fɛɛ sɛɛ, shi jeee woji lɛ ahe nyɔji pɛ akɛwoɔ. Ekɔɔɔ he eko kɛ́ wɔyɛ shika babaoo loo fioo lɛ, hiɛsɔɔ ni wɔyɔɔ lɛ baatsirɛ wɔ koni wɔjɛ wɔhia lɛ mli, shi jeee nɔ ni wɔná ni eteke nɔ lɛ mli, wɔha nɔ ko yɛ tsuijurɔnaa kɛfi Maŋtsɛyeli lɛ he nibii asɛɛ. (Mar. 12:41-44; 2 Kor. 9:7) Ebaatsirɛ wɔ hu koni wɔkɔlɔ woji ni he hiaa wɔ lɛ pɛ, ni nakai ni wɔɔfee lɛ haŋ wɔfite teokrase nibii.
[Wiemɔ ni akɔ ni akɛmiitsu nii ni yɔɔ baafa 2]
Esa akɛ shiɛlɔi kɛ hiɛshikamɔ atsu nii kɛkwɛ kɛji mɔ lɛ yɛ he miishɛɛ