Namɛi Feɔ Yehowa Suɔmɔnaa Nii Ŋmɛnɛ?
1. Mɛɛ be wɔbaabɔi Namɛi Feɔ Yehowa Suɔmɔnaa Nii Ŋmɛnɛ? lɛ kasemɔ, ni mɛɛ gbɛ nɔ wɔbaaná he sɛɛ?
1 Kɛjɛ otsi ni jeɔ shishi October 28 lɛ nɔ lɛ, abaakase Namɛi Feɔ Yehowa Suɔmɔnaa Nii Ŋmɛnɛ? wolo bibioo lɛ yɛ Asafoŋ Biblia Nikasemɔ lɛ shishi. Afee wolo hee bibioo nɛɛ, ni ajie lɛ kpo yɛ “Ohiɛ Akã Otsui He!” Kpokpaa Wulu nɔ Kpee lɛ shishi lɛ, koni eye ebua mɛi ni wɔkɛkaseɔ Biblia lɛ ni amɛbale asafo lɛ. Wolo nɛɛ kasemɔ baaha hiɛsɔɔ ni wɔyɔɔ akɛ wɔyɛ Yehowa asafo lɛ mli lɛ aya hiɛ, ni agbɛnɛ hu, ebaaye ebua wɔ ni wɔle wolo ni he yɔɔ sɛɛnamɔ kɛha shiɛmɔ nitsumɔ nɛɛ mli saji jogbaŋŋ.—Lala 48:14.
2. Mɛɛ gbɛ nɔ abaatsɔ akase wolo bibioo lɛ yɛ asafo lɛ mli?
2 Bɔ ni Abaakase lɛ Aha: Esa akɛ nɔkwɛlɔ lɛ ato ebe lɛ he gbɛjianɔ bɔni afee ni aná be ni fa kɛsusu nikasemɔ fɛɛ nikasemɔ he jogbaŋŋ. Nikasemɔi 28 lɛ ateŋ eko fɛɛ eko saneyitso lɛ ji sanebimɔ, ni ebaakane sanebimɔ nɛɛ kɛkpa nikasemɔ lɛ hiɛ. Kɛkɛ lɛ, eha mɔ ni baakane mli lɛ ekane klɛŋklɛŋ kuku lɛ mli. No sɛɛ lɛ, nɔkwɛlɔ lɛ baabi toibolɔi lɛ sane ko ni lɛ diɛŋtsɛ esaa kɛha klɛŋklɛŋ kuku lɛ he susumɔ. Enɛ sɛɛ lɛ, kɛ́ akane fãi ni akɛ wiemɔi ni adiki mli eje shishi lɛ ekome agbe naa lɛ, esa akɛ asusu he dani aya nɔ ni nyiɛ sɛɛ lɛ nɔ. Kɛ́ akane agbe naa lɛ, nɔkwɛlɔ lɛ baaha toibolɔi lɛ atsɔɔ bɔ ni fã ni akane lɛ haa sanebimɔ ni ji nikasemɔ lɛ saneyitso lɛ hetoo. Mfonirii babaoo yɛ wolo bibioo lɛ mli ni abaanyɛ awie he. Esa akɛ akane ŋmalɛi titrii ni yɔɔ mli lɛ bɔ ni be baaŋmɛ gbɛ. Dani abaaya nikasemɔ ni nyiɛ sɛɛ lɛ nɔ lɛ, nɔkwɛlɔ lɛ baabi saji ni yɔɔ nikasemɔ lɛ shishi lɛ ni ekɛtĩ mli. Kɛ́ akrabatsa ni ji “Taomɔ Nibii Krokomɛi Kɛfata He” lɛ yɛ mli lɛ, ebaaha akane, ni no sɛɛ lɛ ebaaha toibolɔi lɛ atsɔɔ bɔ ni Biblia mli nikaselɔ ko baaná gbɛtsɔɔmɔ ni akɛha lɛ he sɛɛ. Kɛ́ nɔkwɛlɔ lɛ miimu nikasemɔ lɛ naa lɛ, ebaanyɛ ekɛ nikasemɔi lɛ asaneyitsei lɛ atsu nii akɛ sanebimɔi ni ekɛtĩ nikasemɔ lɛ mli, kɛ́ be baaŋmɛ gbɛ. Ha ehi ojwɛŋmɔŋ akɛ, enɛ etsɔɔɔ doo akɛ nɛkɛ ji bɔ ni esa akɛ afee kɛ́ akɛ wolo bibioo lɛ miifee shĩa Biblia mli nikasemɔ.
3. Kɛ́ wɔbaaná wolo bibioo nɛɛ kasemɔ lɛ he sɛɛ kɛmɔ shi lɛ, mɛni esa akɛ wɔfee?
3 Bɔni afee ni oná he sɛɛ kɛmɔ shi lɛ, kasemɔ wolo lɛ jogbaŋŋ dani oba kpee lɛ. Kɛ́ oba lɛ, bɔɔ mɔdɛŋ ni oha saji ahetoo. Beni nikasemɔ lɛ yaa nɔ lɛ, susumɔ bɔ ni Biblia mli nikaselɔi baaná nɔ ni akaseɔ lɛ he sɛɛ lɛ he. Eba akɛ, wolo bibioo nɛɛ ni wɔbaakase lɛ baasaa wɔ koni wɔnyɛ wɔye wɔbua mɛi krokomɛi ni amɛbafata wɔhe kɛfee Nyɔŋmɔ suɔmɔnaa nii, bɔni afee ni amɛ hu amɛná hiɛnɔkamɔ akɛ amɛbaahi shi kɛya naanɔ.—1 Yoh. 2:17.