Saji ni Baaye Abua Wɔ yɛ Shiɛmɔ Nitsumɔ lɛ Mli
1. Mɛɛ yiŋtoi enyɔ sane ni yitso ji “Sane ko ní Odasefonyo ko kɛ Mɔ ko Gba” lɛ hiɛ?
1 Yɛ be kɛ beaŋ lɛ, akɛ sane ni yitso ji “Sane ko ní Odasefonyo ko kɛ Mɔ ko Gba” lɛ woɔ Buu-Mɔɔ ni ji maŋbii anɔ̃ lɛ mli. Saji nɛɛ hiɛ yiŋtoi enyɔ. Ekome ji, ni eha wɔnyɛ wɔtsɔɔ mɛi Biblia mli saji yɛ gbɛ ni amɛbaanya he lɛ nɔ. Nɔ ni ji enyɔ lɛ, etsɔɔ wɔ bɔ ni wɔɔfee wɔtsɔ ŋaa gbɛ nɔ wɔkɛ mɛi asusu saji komɛi ahe. (1 Pet. 3:15) Mɛɛ gbɛ nɔ wɔɔtsɔ wɔkɛ saji nɛɛ atsu nii jogbaŋŋ?
2. Mɛɛ gbɛ nɔ wɔbaanyɛ wɔkɛ saji nɛɛ atsu nii yɛ shiɛmɔ nitsumɔ lɛ mli?
2 Okɛtsu Nii yɛ Shiɛmɔ Nitsumɔ lɛ Mli: Obaanyɛ okɛ Buu-Mɔɔ ni saji nɛɛ yɔɔ mli lɛ ekomɛi ato. Kɛ́ shiatsɛ ko, mɔ ko ni yɔɔ wiemɔ lɛ he miishɛɛ, loo Biblia mli nikaselɔ ko bi sane ko loo ekɛ bo kpaaa gbee yɛ sane ko ni atsɔɔ mli yɛ Buu-Mɔɔ lɛ eko mli lɛ he lɛ, ha lɛ nakai Buu-Mɔɔ lɛ eko ni okɛ lɛ asusu sane lɛ he kɛjɛ mli. Kɛ́ ohiɛɛɛ Buu-Mɔɔ ni wieɔ nakai sane lɛ he lɛ eko lɛ, obaanyɛ oŋɔ eko kɛjɛ jw.org.
3. Mɛɛ gbɛ nɔ wɔbaanyɛ wɔtsɔ wɔkɛ shiatsɛ ko asusu saji nɛɛ eko he?
3 Mɛɛ gbɛ nɔ obaanyɛ otsɔ ni okɛ mɔ ko asusu saji nɛɛ eko he? Shiɛlɔi komɛi haa mɛi ni amɛshiɛɔ amɛhaa lɛ kaneɔ shiatsɛ lɛ wiemɔi lɛ, ni amɛ hu amɛkaneɔ Odasefonyo lɛ naa wiemɔi lɛ. Gbɛ nɛɛ baanyɛ aye omanye waa, ejaakɛ ehaa mɔ ni wɔkɛkaseɔ nii lɛ pɛiɔ wɔhemɔkɛyeli lɛ mli yɛ gbɛ ni yɔɔ mlɛo nɔ.—5 Mose. 32:2.
4. Mɛɛ gbɛ nɔ wɔbaanyɛ wɔkɛ saji nɛɛ atsu nii kɛtsɔse wɔhe?
4 Tsɔsemɔ Ohe ni Otsɔse Mɛi Krokomɛi Hu: Beni okaneɔ saji nɛɛ, kadimɔ ŋmalɛi, nɔkwɛmɔnii, kɛ bɔ ni akɛ mɛi lɛ susu saji ahe aha lɛ. Kadimɔ gbɛ ni atsɔ nɔ akɛ sane lɛ ha lɛ. No sɛɛ lɛ, okɛ gbɛ ni tamɔ nakai atsu nii yɛ oshiɛmɔ nitsumɔ lɛ mli. (Abɛi 1:5; 9:9) Nyɛmi yoo ko wie akɛ, “Kɛ́ ookane saji nɛɛ, etamɔ nɔ ni okɛ gbɛgbalɔ ko ni he esa waa ni be fɛɛ be lɛ ele nɔ ni sa akɛ ewie lɛ nyiɛ shiɛmɔ nɔ ni ookase nii kɛmiijɛ edɛŋ!”
5. Mɛɛ gbɛ nɔ wɔɔtsɔ wɔye wɔbua wɔ-Biblia mli nikaselɔi lɛ ni amɛsaa amɛhe kɛha shiɛmɔ?
5 Agbɛnɛ hu lɛ, obaanyɛ okɛ saji nɛɛ atsu nii kɛye obua o-Biblia mli nikaselɔi lɛ ni amɛsaa amɛhe kɛha shiɛmɔ. Nyɛfea ekome kɛkanea sane lɛ, ha o-Biblia mli nikaselɔ lɛ afee enii tamɔ lɛ ji shiɛlɔ lɛ. Enɛ baaha Biblia mli nikaselɔi akase bɔ ni amɛaafee amɛkɛ hiɛshikamɔ awie amɛhemɔkɛyeli lɛ he. (Kol. 4:6) Yɛ anɔkwale mli lɛ, saji nɛɛ ji gbɛi babaoo ni Yehowa tsɔɔ nɔ eyeɔ ebuaa wɔ koni ‘wɔgbe wɔsɔɔmɔ lɛ naa kwraa’ lɛ ateŋ ekome.—2 Tim. 4:5.