Nyɛkasea Gbalɔi Lɛ—Mika
1. Mɛɛ sane eeenyɛ efee akɛ Mika susu he, ni mɛni hewɔ wɔbaanyɛ wɔkɛɛ akɛ nɔ ni ejaje lɛ ba mli?
1 ‘Mɛɛ be kwraa jeŋ fɔŋ nɛɛ baaba naagbee?’ Beni gbalɔ Mika jajeɔ hiɛkpatamɔ ni Yehowa ewie akɛ ekɛbaaba Israel kɛ Yuda maŋtsɛyelii lɛ anɔ lɛ etsɔɔ amɛ lɛ, ekolɛ esusu sanebimɔ ko ni tamɔ nɛkɛ he. Kɛlɛ, nɔ ni Mika jaje lɛ ba mli. Yɛ afi 740 D.Ŋ.B., beni Mika yɔɔ wala mli lolo lɛ, nɔ ni Yehowa wie yɛ Samaria he lɛ ba mli. (Mika 1:6, 7) Sɛɛ mli lɛ, akpata Yerusalem hu hiɛ yɛ afi 607 D.Ŋ.B. (Mika 3:12) Te wɔɔfee tɛŋŋ wɔkase Mika beni wɔmɛɔ be ni Yehowa baakpata jeŋ fɔŋ nɛɛ hiɛ lɛ?
2. Mɛni wɔfeɔ kɛtsɔɔ akɛ wɔmiimɛ Yehowa gbi lɛ, ni mɛni hewɔ esa akɛ wɔto wɔtsui shi lɛ?
2 Yaa nɔ Omɛ: Mika ŋma akɛ: “Shi mi lɛ, makwɛ Yehowa gbɛ, mamɛ miyiwalaheremɔ Nyɔŋmɔ lɛ.” (Mika 7:7) Enɛ etsɔɔɔ akɛ Mika ta shi emɛ kɛkɛ ni efeee nɔ ko. Etee nɔ etsu nii waa akɛ Yehowa gbalɔ. Be ni wɔmɛɔ Yehowa gbi lɛ, esa akɛ wɔjeŋba he atse ni wɔkɛ wɔhe awo Nyɔŋmɔjamɔ mli daa. (2 Pet. 3:11, 12) Yehowa toɔ etsui shi ehaa adesai koni amɛtsake amɛtsui. (2 Pet. 3:9) No hewɔ lɛ, esa akɛ wɔkɛ ŋaa ni Biblia lɛ woɔ wɔ akɛ wɔkase gbalɔ Mika tsuishitoo lɛ atsu nii.—Yak. 5:10.
3. Mɛni hewɔ esa akɛ wɔbi Yehowa ni eduro wɔ emumɔ krɔŋkrɔŋ lɛ?
3 Okɛ Ohe Afɔ̃ Yehowa nɔ Kɛha Hewalɛ: Eyɛ mli akɛ nitsumɔ ni akɛwo Mika dɛŋ lɛ wa moŋ, shi ená hekɛnɔfɔɔ yɛ Yehowa mli akɛ ebaaha lɛ hewalɛ ni ekɛtsu. (Mika 3:8) Yehowa le akɛ ja eha wɔ hewalɛ dani wɔbaanyɛ wɔtsu nɔ ni ekɛwo wɔdɛŋ lɛ, no hewɔ ni Biblia lɛ woɔ wɔ hewalɛ ni wɔkɛ wɔhe afɔ̃ enɔ kɛha hewalɛ lɛ. Eduroɔ mɛi ni egbɔjɔ lɛ hewalɛ, bɔni afee ni amɛnyɛ amɛtsu teokrase sɔ̃i ni akɛwo amɛdɛŋ lɛ ahe nii. (Lala 84:6, 8; Yes. 40:28-31) Ani bo diɛŋtsɛ oná enɛ mli niiashikpamɔ? Ani be fɛɛ be lɛ osɔleɔ ni Yehowa kɛ emumɔ krɔŋkrɔŋ lɛ, ni yɔɔ hewalɛ lɛ, aye abua bo?—Luka 11:13.
4. Mɛɛ nɔkwɛmɔnɔ ni nɔ bɛ Mika fee eha wɔ, ni te wɔɔfee tɛŋŋ wɔkase lɛ?
4 Mika kɛ Nyɔŋmɔ suɔmɔnaa nii ye klɛŋklɛŋ gbɛhe yɛ eshihilɛ mli. Eyɛ mli akɛ mɛi ni ebɔle lɛ lɛ ajeŋba ekpɔtɔ moŋ, shi etswa efai shi akɛ ebaahi shi akɛ anɔkwafo. Daa gbi lɛ, wɔ hu wɔkɛ kai ni baanyɛ aha wɔŋmɛɛ wɔnɔkwayeli lɛ he lɛ kpeɔ. No hewɔ lɛ, nyɛhaa wɔwajea wɔfai shi ni wɔtswa akɛ “wɔɔnyiɛ yɛ Yehowa, wɔ-Nyɔŋmɔ lɛ, gbɛ́i amli kɛaatee naanɔi anaanɔ” lɛ.—Mika 4:5.