Ye Obua Mɔ ni Okɛnyiɛ Shiɛmɔ nɔ Lɛ
1. Kɛ́ wɔkɛ mɔ ko nyiɛ shiɛmɔ nɔ lɛ, mɛni wɔbaanyɛ wɔfee kɛtsɔɔ akɛ wɔmiikase bɔfo Paulo?
1 Bɔfo Paulo na akɛ be ni eye yɛ enyɛmimɛi héyelilɔi lɛ amasɛi lɛ ji hegbɛ ni amɛbaanyɛ amɛkɛwowoo amɛhe hewalɛ. (Rom. 1:12) Kɛ́ okɛ shiɛlɔ ko nyiɛ yɛ shiɛmɔ nɔ lɛ, ani oŋɔɔ hegbɛ lɛ ni okɛwo lɛ hewalɛ ni okɛye obua lɛ? Yɛ nɔ najiaŋ ni ooomua onaa lɛ, mɛni hewɔ ogbaaa lɛ nɔ ni eha ohe esa yɛ shiɛmɔ nitsumɔ lɛ mli lɛ?
2. Mɛni wɔbaanyɛ wɔfee kɛwo mɔ ni wɔkɛnyiɛ lɛ ekãa, ni mɛni hewɔ enɛ he hiaa waa lɛ?
2 Wo lɛ Ekãa: Shiɛlɔi komɛi bɛ ekãa, ni anaa enɛ yɛ amɛhiɛ loo anuɔ yɛ amɛgbeŋ. Kɛ́ wɔjɛ wɔtsuiŋ wɔjie amɛyi lɛ, no baanyɛ aye abua amɛ ni amɛfee ekãa. Mɛɛ nibii krokomɛi wɔbaanyɛ wɔfee kɛwo amɛ ekãa? Nɔ ni nɔkwɛlɔ gbɛfalɔ ko feɔ ji, be fɛɛ be ni ekɛ mɔ ko baaya shiɛmɔ lɛ, ehaa mɔ lɛ leɔ akɛ lɛ diɛŋtsɛ lɛ esheɔ gbeyei, shi akɛni esɔleɔ kpitiokpitio hewɔ lɛ, enyɛɔ enáa ekãa. Beni nyɛmi nuu ko wieɔ nɔ ni yeɔ ebuaa lɛ ni ená ekãa lɛ he lɛ, ewie akɛ: “Mifeɔ mihiɛ ŋmɔlɔŋmɔlɔ. Ni no po lɛ, bei komɛi lɛ, ja misɔle mibi Yehowa yelikɛbuamɔ dã.” Ani nɔ ko eye ebua bo ni onyɛ ofee ekãa yɛ shiɛmɔ nitsumɔ lɛ mli? Gbaa mɔ ni okɛnyiɛ lɛ.
3. Mɛɛ saji wɔbaanyɛ wɔgba mɛi ni wɔkɛnyiɛ shiɛmɔ nɔ lɛ ni baanyɛ aye abua amɛ ni amɛhe asa waa yɛ shiɛmɔ nitsumɔ lɛ mli?
3 Gbaa lɛ Bɔ ni Ofeɔ lɛ Ohaa: Ani ole wiemɔ kuku loo sanebimɔ ko, ekolɛ nɔ ni kɔɔ sane ko ni eba yɛ he ni nyɛyɔɔ lɛ he, ni ewaaa akɛ akɛaaje sanegbaa shishi? Ani okɛ shiɛmɔ wiemɔ ko ni akɛha lɛ etsu nii yɛ bo diɛŋtsɛ ogbɛ nɔ ni eye omanye? Gbaa mɔ ni okɛnyiɛ lɛ. (Abɛi 27:17) Beni nyɛnyiɛ gbɛ ni nyɛyaafee sɛɛkuu-kɛsaramɔ lɛ, obaanyɛ otsɔɔ lɛ oti ni okɛma ohiɛ kɛ bɔ ni obaafee oshɛ nakai oti lɛ he. Beni nyɛgbe Biblia mli nikasemɔ ko naa lɛ, obaanyɛ otsɔɔ lɛ nɔ hewɔ ni okɛ oti ko, ŋmalɛ ko, loo nitsɔɔmɔ hesaa ko tsu nii kɛye obua nikaselɔ lɛ.
4. Mɛni hewɔ esa akɛ wɔná he miishɛɛ akɛ wɔɔye wɔbua wɔnyɛmimɛi ni wɔkɛshiɛɔ lɛ?
4 Shiɛlɔi ni hi shi yɛ klɛŋklɛŋ afii 100 lɛ mli lɛ yeee amɛbuaaa mɛi ni heee yeee lɛ pɛ. Amɛna hu akɛ sɛɛnamɔ yɛ he waa akɛ amɛaawie amɛtsɔɔtsɔɔ amɛhe ni amɛwowoo amɛhe hewalɛ. (Bɔf. 11:23; 15:32) Bɔfo Paulo tsɔɔ Timoteo nii, ni no sɛɛ lɛ, ewo lɛ hewalɛ ni egba mɛi krokomɛi nibii ni ekase lɛ. (2 Tim. 2:2) Kɛ́ wɔtee nɔ wɔkai ni wɔfee wɔnyɛmimɛi Kristofoi lɛ ejurɔ beni wɔkɛ amɛ nyiɛ shiɛmɔ nɔ lɛ, wɔbaasa wɔŋwɛi Tsɛ lɛ hiɛ, ni kɛfata he lɛ, wɔbaaha amɛmiishɛɛ afa ni amɛhe asa waa yɛ shiɛmɔ nitsumɔ lɛ mli.—Heb. 13:15, 16.