◼ Nifeemɔ Bei: Abaaje kpee lɛ shishi leebi 9:20 gbii etɛ lɛ fɛɛ. Kɛ́ nakai be lɛ shɛ lɛ, esa akɛ wɔteŋ mɔ fɛɛ mɔ atao he ko eta bɔ ni afee ni aje kpee lɛ shishi yɛ gbɛ ni yɔɔ nyam nɔ. Sohaa kɛ Hɔɔ lɛ, akɛ lala kɛ sɔlemɔ baakpa gbɛkɛ 4:55 ni Hɔgbaa lɛ, abaakpa gbɛkɛ 3:50.
◼ Majimaji Ateŋ Kpeei: Abaafee majimaji ateŋ kpeei yɛ hei komɛi. Hã ehi ojwɛŋmɔŋ akɛ nitsumɔhe nine lɛ damɔ sɛ̃i abɔ ni yɔɔ, tsɔji amaamɔhei lɛ adaramɔ kɛ gbɔiatoohei ni yɔɔ lɛ anɔ efɔ̃ asafoi pɔtɛ̃ɛ kɛ mɛi komɛi ni jɛ maŋsɛɛ lɛ anine koni amɛya kpee lɛ. Kɛ́ nyɛmimɛi tee majimaji ateŋ kpee ko ni afɔ̃ko amɛnine lɛ, ebaahã kpee lɛ shishi ayi tsɔ kɛ mɛi. Kɛ́ shihilɛ ko hã okpɛ oyiŋ akɛ obaaya kpee kroko yɛ nɔ ni ato he gbɛjianɔ ahã bo lɛ sɛɛ lɛ, ofainɛ kaaya majimaji ateŋ kpee.
◼ Tsɔji Amaamɔhe: Kɛ́ jeee wɔhe ni miiye loo naagba ko ni tamɔ nakai lɛ, no lɛ ebaahi akɛ be fɛɛ be lɛ wɔɔta he ni wɔbaanu wiemɔ ni ahãa lɛ moŋ fe ni wɔbaayata tsɔne ni wɔkɛba lɛ mli, ejaakɛ kɛ́ wɔta tsɔne lɛ mli lɛ, wɔbaanyɛ wɔwɔ loo nibii krokomɛi baanyɛ agbala wɔjwɛŋmɔ kɛjɛ wiemɔ ni ahãa lɛ nɔ. Kɛ́ wɔta mɛi lɛ ateŋ ni wɔjwɛŋmɔ nyiɛ wiemɔ ni ahãa lɛ sɛɛ lɛ, no tsɔɔ akɛ wɔhiɛ sɔɔ mumɔŋ niyenii kpakpa ni Yehowa eto he gbɛjianɔ ehã wɔ lɛ. Akɛni bei pii lɛ hei ni akɛ tsɔji mamɔɔ lɛ daraaa hewɔ lɛ, esa akɛ mɛi ni yɔɔ kar lɛ ayafata mɛi krokomɛi ahe yɛ amɛkar lɛ mli kɛ́ amɛbaanyɛ.
◼ Sɛ̃i ni Ashiɔ Ahãa Mɛi: Mɛi ni kɛ bo ta tsɔne mli kɛba loo amɛkɛ bo yɔɔ shĩa lɛ loo o-Biblia kaselɔ hee lɛ pɛ esa akɛ oshi sɛ̃i ohã. Ato sɛ̃ii krɛdɛi ahe gbɛjianɔ ahã mɛi ni he miiye kɛ mɛi ni egbɔjɔ lɛ. Akɛni sɛ̃ii ni ashi nɛɛ faaa hewɔ lɛ, esa akɛ mɔ kome loo mɛi enyɔ ni baakwɛ mɛi nɛɛ lɛ pɛ ata mɔ ni akwɛɔ lɛ lɛ masɛi.
◼ Shwane Niyenii: Ofainɛ okɛ niyenii ni etsiii ni obaaye shwane ajɛ shĩa kɛba moŋ fe nɔ ni kɛ́ eshɛ shwane hejɔɔmɔ be lɛ, obaashi kpee lɛ shishi akɛ oyaahé niyenii. Obaanyɛ okɛ nibii ni akɛ niyenii woɔ mli ní daraaa tsɔ ní baaya sɛ̃i lɛ shishi aba. Okɛ nibii ni dara ni akɛ mɛi pii aniyenii woɔ mli kɛ nibii ni akɛ glase fee akaba kpee lɛ shishi.
◼ Oniatsumɔ: Wɔbaanyɛ wɔtsɔɔ bɔ ni wɔhiɛ sɔɔ kpee lɛ kɛtsɔ wɔsuɔmɔ mli ni wɔɔjɛ wɔtsu onia yɛ kpee lɛ shishi kɛfĩ jeŋ muu fɛɛ nitsumɔ lɛ sɛɛ lɛ nɔ. Kɛ́ mɔ ko kɛ tsɛki miitsu onia yɛ kpee lɛ shishi lɛ, no lɛ esa akɛ eŋma “Watch Tower” yɛ nɔ ákɛ mɛi ni esa akɛ awo shika lɛ ahã.
◼ Osharai kɛ Helai loo Pilamɔi ní Baa Trukaa: Kɛ́ hela mɔ mɔ ko loo epila trukaa yɛ kpee lɛ shishi lɛ, ofainɛ wo mɛi ni kwɛɔ shitaramɔ nɔ lɛ ateŋ mɔ ni bɛŋkɛ bo lɛ toi nɔ, ni lɛ hu ebaahã mɛi ni yɔɔ Tsofahemɔhe lɛ ale enɛ amrɔ nɔŋŋ koni mɛi ni yɔɔ tsofahemɔhe lɛ ni atsɔse amɛ lɛ abakwɛ yelikɛbuamɔ ni amɛbaanyɛ amɛkɛhã mɔ lɛ.
◼ Falefalefeemɔ: Eji sɔ̃ ni kã mɛi fɛɛ ni yaa kpee lɛ anɔ akɛ amɛbaasaa hei ni amɛtara lɛ kɛ́ amɛye nii amɛgbe naa. Akɛni akɛ jwɛinii baamamɔ kpee lɛ shishi hewɔ lɛ, nyɛfainɛ nyɛkwɛa ni nyɛkɛ woji, niyenii, nu rɔbai, kɛ nibii krokomɛi awo jwɛinii lɛ amli. Nakai feemɔ baatsɔɔ akɛ wɔhe tse.
◼ Mfonirishamɔ: Akɛni wɔsumɔɔɔ ni wɔkɛ jarayeli saji baa teokrase henaabuamɔi ashishi hewɔ lɛ, esaaa akɛ wɔhãa mɛi ni shaa mfonirii ni amɛheɔ shika lɛ baa Kpee Asa lɛ nɔ amɛbashaa mfonirii loo vidioi kɛyeɔ jara.—w84-E 7/1 bf. 25; kwɛmɔ Gbɛjianɔ wolo lɛ, baafa 142, kuku 3 lɛ hu.
◼ Ní Aaata Shi Kutuu ákɛ Weku: Esa akɛ fɔlɔi kɛ amɛbii atara shi be ni kpee lɛ yaa nɔ lɛ moŋ fe ni amɛaahã amɛbii lɛ kɛ gbekɛbii loo oblahii kɛ oblayei bibii krokomɛi sɔŋŋ ata shi yɛ he kome. Enɛ baahã awo gbekɛbii lɛ hewalɛ ni amɛŋmala otii be ni kpee lɛ yaa nɔ lɛ.
◼ Tsofafeemɔ: Kɛ́ tsofa ko ni okɔɔ lɛ he baahia bo lɛ, ofainɛ kɛ́ ooba lɛ kɛ bɔ ni sa aba ejaakɛ ahaŋ bo eko yɛ kpee lɛ shishi.
◼ Wɔhe nɔ ni Wɔɔkwɛ Jogbaŋŋ Koni Wɔkapila: Nyɛfainɛ, nyɛhãa wɔkwɛa jogbaŋŋ koni nɔ ko akahã wɔshane loo wɔtɛ ni wɔpila. Daa afi lɛ, mɛi babaoo pilaa yɛ tokotai ni nɔ kwɔlɔ ni amɛwo lɛ hewɔ. Ebaahi akɛ aaawo tokota ni sa ni baamɔ nane lɛ jogbaŋŋ, ní abaanyɛ akɛnyiɛ atrakpoi anɔ kɛ he fɛɛ he ni apilaaa.
◼ Nibii ni Abaajie Kpo: Nyɔŋmɔ Wiemɔ lɛ woɔ wɔ ŋaa koni ‘wɔfee wɔnii fɛɛ yɛ suɔmɔ mli.’ (1 Kor. 16:14) Kɛ́ ajie nɔ ko kpo yɛ kpee lɛ shishi lɛ, suɔmɔ ni wɔyɔɔ kɛhã mɛi krokomɛi kɛ mɛi ahe ni wɔsusuɔ lɛ haŋ wɔwó foi gidigidi ni wɔtsirɛ mɛi bɔ ni afee ni wɔ klɛŋklɛŋ wɔnine ashɛ eko nɔ. Kɛ́ wɔkɛ henɔyeli tsu nii ni asaŋ wɔto wɔtsui shi yɛ gbɛ ni tamɔ nakai nɔ lɛ, no hãa anaa akɛ wɔji Kristofoi ni edara yɛ mumɔŋ, ni agbɛnɛ hu ehãa anaa akɛ wɔsumɔsumɔɔ wɔhe ákɛ nyɛmimɛi.—Yoh. 13:35.
◼ Niiasɛɛyaahei: Nyɛfainɛ, nyɛkaŋmɛa nyɛbii bibii lɛ agbɛ ni amɛyaa niiasɛɛyaahei lɛ bɔ ni esaaa be ni kpee lɛ yaa nɔ lɛ. Kɛ́ ehe bahia ni gbɛkɛbii bibii lɛ aya niiasɛɛyaahei lɛ, nyɛhãa mɔ ko ni eda loo gbekɛ lɛ nyɛmi onukpa ko kɛ lɛ aya.
◼ Please Follow Up (S-43) Wolo Lɛ: Kɛ́ aye mɔ ko odase yɛ he ni afeɔ kpee lɛ yɛ, ni ejie miishɛɛ kpo lɛ, no lɛ esa akɛ aŋmala mɔ lɛ he saji yɛ Please Follow Up wolo lɛ nɔ. Kɛ́ oŋmala wolo nɛɛ eko nɔ nii ogbe naa lɛ, obaanyɛ oyashi ohã mɛi ni yɔɔ Woji Ahemɔhe lɛ loo okɛhã nyɛsafoŋ woloŋmalɔ lɛ kɛ́ nyɛku nyɛsɛɛ koni atsu he nii.
◼ Niyelihei: Kɛ́ otee niyelihe ko lɛ, ba ojeŋ jogbaŋŋ kɛwo Yehowa hiɛ nyam. Esa akɛ ohesaamɔ lɛ atsɔɔ akɛ oji Kristofonyo. Shi nɔ ko fioo ohã mɔ ni hɔɔ nii lɛ, kɛ́ afeɔ nakai yɛ he ni nyɛyɔɔ lɛ.
◼ Wɔɔhe:
Kɛ́ oyahai he ko ni awɔɔ lɛ, no lɛ ofainɛ okɛ mɛi ni fa fe bɔ ni akpaa gbɛ akawɔ jɛi.
Kɛ́ mɔ ko kɛ etsũ hã bo ni owɔ mli lɛ, feemɔ jɛmɛ falefale, ni okagbɛ nibii oshwã, ni ohiɛ asɔ nibii ni akɛhã bo lɛ ni okɛtsɔɔ akɛ osusuɔ mɔ lɛ he.
Nyɛmimɛi hii kɛ yei akawɔ tsũ kome mli ja amɛji wekumɛi.
Kɛ́ akpɛlɛɛɛ ni ahoɔ nii yɛ tsũ lɛ mli lɛ, no lɛ kaafee nakai.
Ákɛ mɔ ni baa ejeŋ jogbaŋŋ lɛ, kaayadamɔ agbo naa oju ohe. Kɛ́ hejuuhe bɛ jɛi lɛ, no lɛ obaanyɛ okɛ saa loo mama afee hejuuhe fioo ni oju ohe yɛ mli.
Ákɛ Kristofoi lɛ, esaaa akɛ wɔkɛ nibii ni atoɔ he gbɛjianɔ ahãa gbɔi lɛ tsuɔ nii bɔ ni esaaa.
Jiemɔ mumɔ lɛ yibii lɛ kpo otsɔɔ mɛi ni tsuɔ nii yɛ gbɔiatoohe ni oyɔɔ lɛ loo weku ni oyato amɛ lɛ.
Esa akɛ fɔlɔi akwɛ amɛbii lɛ anɔ be fɛɛ be yɛ gbɔiatoohe loo he ni ahã amɛ akɛ amɛwɔ lɛ.
Kɛ́ oná naagba ko yɛ owɔɔhe loo gbɔiatoohe lɛ, ofainɛ ni ohã nyɛmimɛi ni yɔɔ Rooming Department lɛ ale yɛ kpee lɛ shishi.
◼ Mɛi ni kɛ Amɛhe Hãa Kɛhã Nitsumɔ: Mɔ fɛɛ mɔ ni miisumɔ akɛ ekɛ ehe ahã lɛ baanyɛ aya Volunteer Service Department lɛ, yɛ kpee lɛ shishi. Gbekɛbii ni yeko afii 16 lɛ hu baanyɛ amɛkɛ amɛhe awo nitsumɔ lɛ mli yɛ amɛfɔlɔ loo mɔ ko ni kwɛɔ amɛnɔ lɛ shishi, ni amɛbaanyɛ amɛfee nakai hu yɛ onukpa kroko kwɛmɔ shishi kɛ́ fɔlɔ lɛ loo mɔ ni kwɛɔ amɛnɔ lɛ kpɛlɛɔ nɔ. Shi kɛlɛ, aakpa gbɛ akɛ nitsumɔhei lɛ anɔkwɛlɔi lɛ baahala mɛi ni fa saŋŋ dani kpokpaa wulu nɔ kpee lɛ aje shishi. Amɛbaatsɔ mɛi ni akɛ nitsumɔ woɔ amɛdɛŋ yɛ kpokpaa lɛ mli lɛ anɔ amɛhala mɛi lɛ.