Dɛhiɛmɔ Woji Hei ni Afee lɛ Anɔ Bɛ!
1. Mɛni afee ahã wɔ ni wɔkɛshiɛ?
1 Ajie dɛhiɛmɔ woji hei enumɔ kpo yɛ afi 2013 ‘Nyɔŋmɔ Wiemɔ lɛ Anɔkwale Ni!’ Kpokpaa Wulu nɔ Kpee lɛ shishi. Agbɛnɛ hu lɛ, akɛ Maŋtsɛyeli Sane ni Ji 38 lɛ, ni yitso ji “Ani Gbohii lɛ Baanyɛ Ahi Shi Ekoŋŋ Lɛɛlɛŋ?” lɛ efata dɛhiɛmɔ woji nɛɛ ahe. Bɔ ni afee dɛhiɛmɔ woji nɛɛ ahã lɛ nɔ bɛ. Mɛni hewɔ dɛhiɛmɔ woji nɛɛ yɔɔ srɔto lɛ? Kɛ́ wɔkɛ dɛhiɛmɔ woji nɛɛ miihã yɛ shĩa fɛɛ shĩa lɛ, mɛɛ gbɛ nɔ wɔbaanyɛ wɔtsɔ ni wɔkɛtsu nii jogbaŋŋ?
2. Mɛɛ yiŋtoo hewɔ afee dɛhiɛmɔ woji lɛ yɛ gbɛ ni yɔɔ srɔto nɔ lɛ?
2 Mɛni Hewɔ Dɛhiɛmɔ Woji Nɛɛ Yɔɔ Srɔto Lɛ?: Kɛ́ shĩa fɛɛ shĩa shiɛmɔ nitsumɔ lɛ baamɔ shi lɛ, bei pii lɛ, esa akɛ akɛ gbɛi ejwɛ ni nyiɛ sɛɛ nɛɛ atsu nii: (1) Bi shĩatsɛ lɛ sane ni baahã etsɔɔ ejwɛŋmɔ kɛje sanegbaa lɛ shishi. (2) Okɛ lɛ asusu Ŋmalɛ ko he. (3) Hã shĩatsɛ lɛ wolo ni ekane. (4) Bi shĩatsɛ lɛ sane ko, ni oto gbɛjianɔ ni oku osɛɛ ni okɛ lɛ ayasusu he. Bɔ ni afee dɛhiɛmɔ woji hei nɛɛ ahã lɛ yeɔ ebuaa wɔ ni wɔkɛ gbɛi ejwɛ nɛɛ fɛɛ tsuɔ nii yɛ gbɛ ni yɔɔ mlɛo nɔ.
3. Te wɔɔfee tɛŋŋ wɔkɛ dɛhiɛmɔ woji hei lɛ eko ahã yɛ shiɛmɔ nitsumɔ lɛ mli?
3 Bɔ ni Akɛbaatu Nii Ahã: (1) Kɛ́ oŋa shĩatsɛ lɛ, okɛ sanebimɔi ni yɔɔ dɛhiɛmɔ wolo lɛ hiɛ lɛ atsɔɔ lɛ ni obi lɛ ni etsɔɔ esusumɔ. (2) Gbelemɔ dɛhiɛmɔ wolo lɛ ni okɛ lɛ asusu sane ni ji “Nɔ ni Biblia lɛ Kɛɔ” lɛ he. Kanemɔ ŋmalɛ lɛ tɛ̃ɛ kɛjɛ Biblia lɛ mli kɛ́ hegbɛ yɛ. Kɛ́ shĩatsɛ lɛ yɛ be lɛ, okɛ lɛ asusu “Nɔ ni No Baanyɛ Atsɔɔ Kɛhã Bo” lɛ he. (3) Okɛ dɛhiɛmɔ wolo lɛ ahã lɛ, ni owo lɛ hewalɛ ni ekane nɔ ni eshwɛ lɛ yɛ be ni hi kɛhã lɛ lɛ mli. (4) Dani obaashi lɛ, bi lɛ sane ni yɔɔ wolo lɛ sɛɛ ni yɔɔ “Kɛha Hesusumɔ” lɛ shishi lɛ, ni oto gbɛjianɔ okɛ lɛ ayasusu hetoo ni Biblia lɛ kɛhãa lɛ he be kroko.
4. Te wɔɔfee tɛŋŋ wɔkɛ dɛhiɛmɔ woji hei lɛ atsu nii kɛ́ wɔmiifee sɛɛkuu-kɛsaramɔ?
4 Ehãa sɛɛkuu-kɛsaramɔ feemɔ feɔ mlɛo. Okɛ ŋmalɛi ni atsɛ yisɛɛ ni yɔɔ dɛhiɛmɔ wolo lɛ sɛɛ lɛ ahã sane ni obi lɛ be ni otee eŋɔɔ klɛŋklɛŋ lɛ hetoo. Dani obaashi shĩatsɛ lɛ, okɛ Sanekpakpa wolo bibioo lɛ he mfoniri lɛ atsɔɔ lɛ, ni ogbele wolo lɛ diɛŋtsɛ kɛya he ni wieɔ sane ni nyɛsusu he lɛ he babaoo, ni okɛ wolo bibioo lɛ ahã lɛ. Kɛ́ ehe wolo lɛ, too gbɛjianɔ ni oya eŋɔɔ be kroko ni okɛ lɛ ayatsa sanegbaa lɛ nɔ yɛ wolo bibioo lɛ mli. Kɛ́ ofee nakai lɛ, oje Biblia mli nikasemɔ shishi! Aloo yɛ nɔ najiaŋ ni obaahã lɛ wolo bibioo lɛ, obaanyɛ ohã lɛ dɛhiɛmɔ wolo kroko, ni oto gbɛjianɔ ni oya eŋɔɔ be kroko ni okɛ lɛ ayasusu he.
5. Mɛɛ sɛɛnamɔ yɔɔ dɛhiɛmɔ woji lɛ ahe yɛ wɔshiɛmɔ nitsumɔ lɛ mli?
5 Akɛ dɛhiɛmɔ woji etsu nii yɛ wɔshiɛmɔ nitsumɔ lɛ mli nɔ ni fe afii 130 sɔŋŋ. Eyɛ mli akɛ atee nɔ atsake amɛdaramɔ kɛ bɔ ni afee lɛ ahã lɛ mli moŋ, shi amɛji shiɛmɔ dɛŋdadei ni kɛ nitsumɔ mɔɔ shi waa. Eba akɛ wɔkɛ bɔ ni afee dɛhiɛmɔ woji nɛɛ ehee lɛ baatsu nii jogbaŋŋ koni wɔnyɛ wɔyanɔ wɔhã mɛi aná Biblia mli nilee lɛ yɛ jeŋ fɛɛ.—Abɛi 15:7a.