Sanebimɔhe

◼ Mɛni esa akɛ gbekɛbii akase bɔ ni afee ni amɛnyɛ amɛdara yɛ mumɔŋ?

Fɔlɔi ni ji Kristofoi lɛ bɔɔ mɔdɛŋ waa ní amɛlɛ amɛbii lɛ yɛ “Nuŋtsɔ lɛ tsɔsemɔ kɛ ŋaawoo lɛ mli.” (Efe. 6:4) Akɛ nɔkwɛmɔnɔ lɛ, fɔlɔi ena akɛ, kɛ́ amɛkɛ amɛbii lɛ susu daa gbi ŋmalɛ lɛ he daa leebi lɛ, eyeɔ ebuaa waa. Wekui baanyɛ akwɛ wɔvidio lɛ eko ni amɛgba he sane, amɛsusu sane pɔtɛ̃ɛ ko ni yɔɔ Young People Ask wolo lɛ mli lɛ he, amɛfee Biblia mli sane ko he drama, loo ni amɛfee saji komɛi ahe nɔkwɛmɔnɔ. Kɛ̃lɛ, bɔ ni afee ni aye abua gbekɛbii lɛ, ni ‘amɛfoŋ kɛya dalɛ mli’ lɛ, esa akɛ atsɔɔ amɛ Biblia mli anɔkwalei ni mli kwɔlɔ lɛ.​—Heb. 6:1.

Susumɔ nɔ ni wɔtsɔɔ mɛi ni yɔɔ wɔshikpɔŋkuku lɛ mli lɛ he okwɛ. Kɛ́ wɔtee mɛi aŋɔɔ klɛŋklɛŋ kwraa loo wɔku wɔsɛɛ wɔyasara amɛ lɛ, bei pii lɛ wɔbɔɔ mɔdɛŋ ni wɔkɛ amɛ aje Biblia mli nikasemɔ shishi kɛjɛ Mɛni Biblia lɛ Tsɔɔ Diɛŋtsɛ? wolo lɛ mli. Kɛ́ wɔkɛ amɛ kase nakai wolo lɛ wɔgbe naa lɛ, wɔkɛ amɛ tsaa nikasemɔ lɛ nɔ yɛ ‘Nyɛhia Nyɔŋmɔ Suɔmɔ lɛ Mli,’ wolo lɛ mli. Mɛni hewɔ? Biblia lɛ Tsɔɔ wolo lɛ yeɔ ebuaa nikaselɔi ni amɛnáa Ŋmalɛ lɛ mli shishijee nilee. “Nyɔŋmɔ Suɔmɔ” wolo lɛ tsɔɔ amɛ ní amɛkɛ Biblia mli shishitoo mlai atsu nii daa yɛ amɛshihilɛ mli. Kɛ́ mɛi hee lɛ kase woji enyɔ nɛɛ fɛɛ lɛ, ehãa ‘amɛshishifãi mɔmɔɔ shi’ yɛ Kristo mli, ni ‘amɛfĩɔ shi yɛ hemɔkɛyeli lɛ mli.’ (Kol. 2:6, 7) Ani wolo nɛɛ yeŋ ebuaŋ wɔbii lɛ hu? Esa akɛ amɛ hu atsɔɔ amɛ kpɔmɔnɔ lɛ, Maŋtsɛyeli lɛ, kɛ shihilɛ mli ni gbohii lɛ yɔɔ lɛ he nii. Esa akɛ gbekɛbii lɛ ale nɔ hewɔ ni Nyɔŋmɔ ŋmɛɔ piŋmɔ gbɛ kɛ bɔ ni amɛaafee amɛna akɛ wɔyɛ nibii agbɛjianɔtoo nɛɛ naagbee gbii lɛ amli lɛ hu. Esa akɛ amɛná nɔmimaa akɛ Yehowa Odasefoi lɛ ji mɛi ni tsɔɔ anɔkwale lɛ. Ehe miihia ni gbekɛbii lɛ anu Biblia mli shishitoo mlai ashishi kɛ bɔ ni amɛaafee amɛtsɔse “amɛhenumɔ nii lɛ.” (Heb. 5:14) Kɛ̃lɛ, esa akɛ fɔlɔi asusu afii ni amɛbii lɛ eye kɛ bɔ ni amɛnuɔ nii ashishi amɛhãa lɛ he. Shi, gbekɛbii pii yɛ ni nyɛɔ amɛkaseɔ Biblia mli anɔkwalei ni mli kwɔlɔ lɛ be ni amɛdarako po.​—Luka 2:42, 46, 47.