Nyɛkasea Gbalɔi Lɛ—Zefania
1. Mɛɛ shihilɛ mli Zefania sɔmɔ yɛ akɛ gbalɔ, ni mɛɛ nɔkwɛmɔnɔ kpakpa efee ehã wɔ?
1 Yɛ aaafee afi 650 D.Ŋ.B. afii lɛ amli lɛ, Yehowa wó Zefania gbalɔ koni ejaje E-kojomɔ sane lɛ. No beaŋ lɛ, Baal jamɔ ehe shi waa yɛ Yuda. Agbe Maŋtsɛ Amon ni fee nibii gbohii lɛ etsɛko, ni amrɔ nɛɛ oblanyo fioo Yosia miiye maŋtsɛ. (2 Kron. 33:21–34:1) Eeenyɛ efee akɛ Zefania jɛ Yuda odehei aweku lɛ mli, shi ejaje kojomɔ sane ni Yehowa kɛtsu lɛ lɛ etsɔɔ Yuda nɔyelɔi lɛ ni eshiuuu eko nɔ. (Zef. 1:1; 3:1-4) Ŋmɛnɛ lɛ, wɔ hu wɔbɔɔ mɔdɛŋ ni wɔkase Zefania ekãa lɛ, ni wɔhãaa wekukpaa ni kã wɔ kɛ wɔwekumɛi ateŋ lɛ afite jamɔ ni wɔkɛhãa Yehowa lɛ. (Mat. 10:34-37) Mɛɛ sane Zefania jaje, ni mɛɛ yibii ewo?
2. Mɛni esa akɛ wɔfee koni Yehowa aŋɔ wɔ atee yɛ emlifu gbi lɛ nɔ?
2 Nyɛtaoa Yehowa Sɛɛgbɛ: Yehowa pɛ ji mɔ ni baanyɛ ahere mɛi yɛ emlifu gbi lɛ nɔ. Enɛ hewɔ lɛ, Zefania wo Yudafoi lɛ hewalɛ ni amɛtao Yehowa sɛɛgbɛ, amɛtao jalɛ sɛɛgbɛ, ni amɛtao heshibaa sɛɛgbɛ, dani Yehowa gbi lɛ aba. (Zef. 2:2, 3) Ŋmɛnɛ lɛ, nakai pɛpɛɛpɛ esa akɛ wɔfee. Wɔwoɔ mɛi krokomɛi hewalɛ ni amɛtao Yehowa sɛɛgbɛ, taakɛ Zefania fee lɛ, shi esa akɛ wɔ hu wɔbo nakai ŋaawoo lɛ toi, ni wɔtswa wɔfai shi akɛ ‘wɔkpaleŋ kɛjɛŋ Yehowa sɛɛ’ kɔkɔɔkɔ. (Zef. 1:6) Wɔtaoɔ Yehowa sɛɛgbɛ kɛtsɔ e-Wiemɔ lɛ ni wɔkaseɔ jogbaŋŋ kɛ sɔlemɔ ni wɔsɔleɔ kɛbiɔ egbɛtsɔɔmɔ lɛ nɔ. Wɔtaoɔ jalɛ sɛɛgbɛ kɛtsɔ wɔjeŋ ni wɔbaa jogbaŋŋ lɛ nɔ. Ni wɔtaoɔ heshibaa sɛɛgbɛ kɛtsɔ wɔhe shi ni wɔbaa kɛ gbɛtsɔɔmɔi fɛɛ ni Yehowa asafo lɛ kɛhãa wɔ lɛ toi ni wɔboɔ lɛ nɔ.
3. Mɛni hewɔ esa akɛ wɔya nɔ wɔhiɛ jwɛŋmɔ kpakpa yɛ wɔshiɛmɔ nitsumɔ lɛ he lɛ?
3 Yibii Kpakpai: Yudafoi lɛ ateŋ mɛi komɛi kɛ̃ bo kojomɔ sane ni Zefania jaje lɛ toi, shi ekolɛ mɔ titri ni esane lɛ ta etsuiŋ waa ji oblanyo fioo Yosia, ni no hã ebɔi Yehowa sɛɛgbɛ taomɔ be ni edako. Sɛɛ mli lɛ, Yosia kɛ ekãa jie amagai lɛ fɛɛ kɛjɛ Yuda kɛ Yerusalem. (2 Kron. 34:2-5) Ŋmɛnɛ lɛ, eyɛ mli akɛ Maŋtsɛyeli dumɔwui ni wɔshwãa lɛ ekomɛi yashwieɔ gbɛhe, tɛsai anɔ, kɛ ŋmei ateŋ moŋ, shi ekomɛi hu yashwieɔ shikpɔŋ kpakpa nɔ ni ewoɔ yibii. (Mat. 13:18-23) Wɔyɛ hemɔkɛyeli akɛ Yehowa baaya nɔ ejɔɔ mɔdɛŋ ni wɔbɔɔ kɛshwãa Maŋtsɛyeli dumɔwui lɛ nɔ.—Lala 126:6.
4. Mɛni hewɔ esa akɛ wɔya nɔ ‘wɔkwɛ Yehowa gbɛ’ lɛ?
4 Yudafoi lɛ ekomɛi yasusu akɛ Yehowa gbi lɛ baŋ kɔkɔɔkɔ. Shi Yehowa hã mɔ fɛɛ mɔ le akɛ egbi wulu lɛ ebɛŋkɛ. (Zef. 1:12, 14) Ni ehã ale akɛ, mɛi ni baaba lɛ abo lɛ pɛ ayiwala abaahere. (Zef. 3:12, 17) Be ni wɔyaa nɔ ‘wɔkwɛɔ Yehowa gbɛ’ lɛ, eba akɛ wɔkɛ wɔnyɛmimɛi lɛ baafee ekome kɛsɔmɔ wɔ-Nyɔŋmɔ ofe lɛ kɛ miishɛɛ!—Zef. 3:8, 9.